ନୂଆଦିଲ୍ଲୀ,୮।୧୦: ଶିବସେନା ଓ ଏହାର ଚିହ୍ନକୁ ନେଇ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କ ଗୋଷ୍ଠୀ ଏବଂ ବର୍ତ୍ତମାନର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଗୋଷ୍ଠୀ ମଧ୍ୟରେ ବିବାଦ ଲାଗି ରହିଥିବାବେଳେ ସୁପ୍ରିମକୋର୍ଟ ଏହାର ନିଷ୍ପତ୍ତି ନିର୍ବାଚନ କମିଶନଙ୍କ ଉପରେ ଛାଡ଼ିଥିଲେ। ଏକନାଥ ଓ ତାଙ୍କ ସମର୍ଥକ ବିଧାୟକମାନେ ସ୍ବେଚ୍ଛାକୃତ ଭାବେ ଶିବସେନା ଛାଡ଼ିଥିବାରୁ ସେମାନେ ଦଳୀୟ ଚିହ୍ନ ଧନୁତୀର ପାଇଁ ଦାବି କରିପାରିବେ ନାହିଁ ବୋଲି ଠାକ୍ରେ ନିର୍ବାଚନ କମିଶନଙ୍କୁ ଶୁକ୍ରବାର ଜଣାଇଛନ୍ତି। ଅନ୍ଧେରୀ ଇଷ୍ଟ ଆସନରେ ନଭେମ୍ବର ୩ରେ ହେବାକୁ ଯାଉଥିବା ବିଧାନସଭା ଉପନିର୍ବାଚନ ଲାଗି ଶିନ୍ଦେ ଗୋଷ୍ଠୀ ଧନୁତୀର ଚିହ୍ନ ଦାବି କରିଥିଲେ। ଠାକ୍ରେ ଗୋଷ୍ଠୀ ଉକ୍ତ ଆସନ ଲାଗି ଦିବଂଗତ ବିଧାୟକ ରମେଶ ଲାଟ୍କେଙ୍କ ସ୍ତ୍ରୀ ଋତୁଜାଙ୍କୁ ପ୍ରାର୍ଥୀ କରିଥିବାବେଳେ ଶିନ୍ଦେ ଗୋଷ୍ଠୀ ଭାଜପା ପ୍ରାର୍ଥୀ ମୁରଜୀ ପଟେଲଙ୍କକୁ ସମର୍ଥନ ଜଣାଇଛି। ଶିନ୍ଦେ ଗୋଷ୍ଠୀଙ୍କ ଦାବି ଉପରେ ନିର୍ବାଚନ କମିଶନ ଠାକ୍ରେଙ୍କ ଗୋଷ୍ଠୀକୁ ଜବାବ ମାଗିଥିଲେ।
ଗତ ଜୁନ୍ରେ ଠାକ୍ରେ ସରକାର କ୍ଷମତାରୁ ଯିବା ପରେ ପ୍ରଥମ ଥର ନିର୍ବାଚନ ଅନଷ୍ଠିତ ହେବାକୁ ଯାଉଛି। ଶିବସେନାରେ ବିଭାଜନ ପରେ ଭାଜପା ସମର୍ଥନରେ ଏକନାଥ ଶିନ୍ଦେ ସରକାର ଗଢ଼ିଥିବାବେଳେ ତାଙ୍କ ପଛରେ ସଂଖ୍ୟାଧିକ ଦଳୀୟ ବିଧାୟକ ଓ ଏମ୍ପିଙ୍କ ସମର୍ଥନ ରହିଛି। ତେଣୁ ତାଙ୍କ ଗୋଷ୍ଠୀକୁ ପ୍ରକୃତ ଶିବସେନା ଭାବେ ସ୍ବୀକୃତି ଦେବା ସହ ଧନୁତୀର ଚିହ୍ନ ପ୍ରଦାନ ଲାଗି ଶିନ୍ଦେ ଦାବି କରୁଛନ୍ତି। ଅନ୍ୟପକ୍ଷରେ ବ୍ୟବସ୍ଥା ଅନୁଯାୟୀ ଦଳର ଅଧ୍ୟକ୍ଷ ରହିଥିବା ଠାକ୍ରେ କହିଛନ୍ତି, ଶିନ୍ଦେ ଗୋଷ୍ଠୀ ବିଧାୟକମାନଙ୍କ ବିରୋଧରେ ଅଯୋଗ୍ୟ ଘୋଷଣା ଆବେଦନ ସୁପ୍ରିମକୋର୍ଟଙ୍କ ବିଚାରାଧୀନ ରହିଥିବାରୁ ସେମାନଙ୍କୁ ଦଳର ସଦସ୍ୟ ଭାବେ ଗଣାଯିବା ଉଚିତ ନୁହେଁ। ଦଳୀୟ ସଦସ୍ୟଙ୍କଠାରୁ ୫ ଲକ୍ଷରୁ ଊର୍ଦ୍ଧ୍ୱ ସତ୍ୟପାଠ ସଂଗ୍ରହ ଲକ୍ଷ୍ୟ ରଖିଥିବା ଠାକ୍ରେ କହିଛନ୍ତି, ତାଙ୍କ ବାପା ବାଲ୍ ଠାକ୍ରେ ୫୦ ବର୍ଷ ପୂର୍ବେ ଦଳ ପ୍ରତିଷ୍ଠା କରିଥିଲେ। ଅନ୍ୟପକ୍ଷରେ ଶିନ୍ଦେ ନିଜକୁ ବାଲ୍ ଠାକ୍ରେଙ୍କ ହିନ୍ଦୁତ୍ୱର ପ୍ରକୃତ ଲିଗାସୀ ବୋଲି ଦାବି କରିଆସୁଛନ୍ତି।