ମୁମ୍ବାଇ, ୩।୮ : ଜୁନ ୩୦ ରେ ଏକନାଥ ଶିନ୍ଦେ ମୁଖ୍ୟମନ୍ତ୍ରୀ ହେବା ପରଠାରୁ ଗତ ଏକମାସ ମଧ୍ୟରେ ମହାରାଷ୍ଟ୍ର ସରକାର ୭୫୧ ଟି ସରକାରୀ ନିର୍ଦ୍ଦେଶ ଜାରି କରିଛନ୍ତି । ସେଥିମଧ୍ୟରୁ ୧୦୦ରୁ ଅଧିକ ନିର୍ଦ୍ଦେଶ କେବଳ ସ୍ବାସ୍ଥ୍ୟ ବିଭାଗକୁ ଦିଆଯାଇଛି। ଏହି ନିର୍ଦ୍ଦେଶଗୁଡିକ ସରକାରଙ୍କ ଅଫିସିଆଲ ୱେବସାଇଟରେ ଉପଲବ୍ଧ ହେଉଛି।
ଚଳିତ ବର୍ଷ ଜୁନ ମାସରେ, ଶିବସେନା ବିଦ୍ରୋହ ପରେ ଦଳ ମୁଖ୍ୟ ଉଦ୍ଧଭ ଠାକରେଙ୍କ ନେତୃତ୍ୱରେ ମହା ବିକାଶ ଆଘାଡ଼ି ସରକାର ଚାରି ଦିନ ମଧ୍ୟରେ ୧୮୨ ଟି ସରକାରୀ ନିର୍ଦ୍ଦେଶ ଜାରି କରିଥିଲେ। ଏହି ନିର୍ଦ୍ଦେଶଗୁଡ଼ିକ ମଧ୍ୟରୁ ଅଧିକାଂଶ ବିଭିନ୍ନ ବିକାଶ ସମ୍ବନ୍ଧୀୟ କାର୍ଯ୍ୟ ପାଇଁ ହଜାରେ କୋଟି ମୂଲ୍ୟର ପାଣ୍ଠି ଜାରି କରିବା ସହିତ ଜଡିତ ଥିଲା। ତେବେ ସେହି ସମୟରେ ବିପକ୍ଷରେଥିବା ଭାରତୀୟ ଜନତା ପାର୍ଟି ଏହାକୁ ବିରୋଧ କରିଥିଲା।
କିନ୍ତୁ ବର୍ତ୍ତମାନ ଶିନ୍ଦେଙ୍କ ନେତୃତ୍ୱାଧୀନ ସରକାର ଏକ ମାସ ମଧ୍ୟରେ ଏତେ ସଂଖ୍ୟକ ସରକାରୀ ନିର୍ଦ୍ଦେଶ ଜାରି କରିଛନ୍ତି। ଏହି ସରକାରରେ ଭାଜପାର ବରିଷ୍ଠ ନେତା ଦେବେନ୍ଦ୍ର ଫଡନାଭିସ ଉପମୁଖ୍ୟମନ୍ତ୍ରୀ ଅଛନ୍ତି। ବର୍ତ୍ତମାନ ମହାରାଷ୍ଟ୍ର କ୍ୟାବିନେଟରେ ଶିନ୍ଦେ ଏବଂ ଫଡନାଭିସ କେବଳ ଦୁଇଜଣ ସଦସ୍ୟ ରହିଛନ୍ତି।