ମୁମ୍ବାଇ, ୪ା୭: ରାଜନୀତିର ପୁରୁଖା ଖେଳାଳି ତଥା ଏନ୍ସିପି ସଭାପତି ଶରଦ ପାଓ୍ବାର ମହାରାଷ୍ଟ୍ରର ନବଗଠିତ ଏକନାଥ ଶିନ୍ଧେ ସରକାରଙ୍କ ସ୍ଥାୟୀତ୍ୱକୁ ନେଇ ଭବିଷ୍ୟବାଣୀ କରିଛନ୍ତି। ଆସନ୍ତା ୬ ମାସରେ ଶିନ୍ଧେ ସରକାର ଭାଙ୍ଗିଯିବ ବୋଲି ପାଓ୍ବାର କହିଛନ୍ତି। ୨୦୧୯ରେ ମହାରାଷ୍ଟ୍ର ନିର୍ବାଚନରେ ଭାଜପା ସବୁଠାରୁ ବଡ଼ ଦଳ ହୋଇ ଉଭା ହୋଇଥିଲା। ହେଲେ ୧୪୫ ମ୍ୟାଜିକ୍ ନମ୍ବର ଅଭାବରୁ ସରକାର ଗଢ଼ିପାରି ନ ଥିଲା। ବିପରୀତ ବିଚାରଧାରାର କଂଗ୍ରେସ ଏବଂ ଏନ୍ସିପି ସହ ଶିବସେନା ମହା ବିକାଶ ଅଘାଡି(ଏମ୍ଭିଏ) ମେଣ୍ଟ କରି ଉଦ୍ଧବ ଠାକ୍ରେ ମୁଖ୍ୟମନ୍ତ୍ରୀ ହୋଇଥିଲେ। ତେବେ ବରିଷ୍ଠ ନେତା ପାଓ୍ବାରଙ୍କ ମତରେ ଶିନ୍ଧେଙ୍କ ସରକାର ୬ ମାସ ତିଷ୍ଠି ପାରିବ ନାହିଁ। ତେଣୁ ଖୁବଶୀଘ୍ର ମହାରାଷ୍ଟ୍ରରେ ଅନ୍ତରୀଣ ନିର୍ବାଚନ ହେବାକୁ ଯାଉଛି। ଥରେ ମନ୍ତ୍ରିମଣ୍ଡଳ ଦାୟିତ୍ୱ ଭାଗବଣ୍ଟା ହେବା ପରେ ଶିନ୍ଧେଙ୍କ ମେଣ୍ଟରେ ବିଶୃଙ୍ଖଳା ସୃଷ୍ଟି ହେବ। ଏହା ହିଁ ସରକାର ଭାଙ୍ଗିବାର ପ୍ରମୁଖ କାରଣ ହେବ ବୋଲି ପାଓ୍ବାର କହିଛନ୍ତି।
