ମୁମ୍ବାଇ,୩୦।୧୧: ମହାରାଷ୍ଟ୍ରର କାର୍ଯ୍ୟକାରୀ ମୁଖ୍ୟମନ୍ତ୍ରୀ ତଥା ଶିବସେନା ମୁଖ୍ୟ ଏକନାଥ ଶିନ୍ଦେଙ୍କ ସ୍ବାସ୍ଥ୍ୟ ତାଙ୍କ ଗ୍ରାମରେ ହଠାତ୍ ଖରାପ ହୋଇଯାଇତ୍ୱା ସୂଚନା ମିଳିଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ମୁମ୍ବାଇର ଡାକ୍ତରଙ୍କ ଏକ ଟିମ ତାଙ୍କ ଗୃହ ଜିଲା ସତ୍ତାର ଗାଁରେ ପହଞ୍ଚିଛନ୍ତି। କୁହାଯାଉଛି ଯେ ସେ ଥକ୍କା କାରଣରୁ ଜ୍ୱରରେ ପୀଡିତ ଅଛନ୍ତି। ଡାକ୍ତର ତାଙ୍କର ପରୀକ୍ଷା କରୁଛନ୍ତି।
ମହାରାଷ୍ଟ୍ରରେ ବିଧାନସଭା ନିର୍ବାଚନର ଫଳାଫଳ ଆସିବାର ଏକ ସପ୍ତାହ ବିତିଗଲାଣି, କିନ୍ତୁ ମୁଖ୍ୟମନ୍ତ୍ରୀ କିଏ ହେବେ ତାହା ଏବେ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏ ନେଇ ନିକଟରେ ଏକନାଥ ଶିନ୍ଦେ ଦିଲ୍ଲୀରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ଭେଟିଥିଲେ। ଏହା ପରେ ଅମିତ ଶାହା ମଧ୍ୟ ମହାୟୁତୀ ନେତାଙ୍କ ସହ ଏକ ବୈଠକ କରିଥିଲେ। ଦିଲ୍ଲୀ ପରେ ମହାରାଷ୍ଟ୍ରରେ ମହାୟୁତୀ ନେତାଙ୍କ ଏକ ବୈଠକ ଅନୁଷ୍ଠିତ ହେବାକୁ ଥିଲା କିନ୍ତୁ ଦିଲ୍ଲୀରୁ ଫେରିବା ପରେ କାର୍ଯ୍ୟକାରୀ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ହଠାତ୍ ତାଙ୍କ ଗାଁ ଗସ୍ତରେ ଯାଇଥିଲେ। ଶନିବାର ମହାରାଷ୍ଟ୍ରର ମୁଖ୍ୟମନ୍ତ୍ରୀ ପଦ ପାଇଁ ନାମ ଘୋଷଣା ହେବାର ସମ୍ଭାବନା ଥିଲା। ଏହି ସମୟରେ ଗାଁରେ ଏକନାଥ ଶିନ୍ଦେଙ୍କ ସ୍ବାସ୍ଥ୍ୟ ଅବସ୍ଥା ବିଗିଡି ଯାଇଥିବାର ଖବର ଆସିଥିଲା। ମୁମ୍ବାଇରୁ ଗାଁରେ ପହଞ୍ଚିଥିବା ଡାକ୍ତରୀ ଟିମ ତାଙ୍କୁ ପରୀକ୍ଷା କରି ବିଶ୍ରାମ ନେବାକୁ ପରାମର୍ଶ ଦେଇଥିଲେ।