ମୁମ୍ବାଇ,୨୧।୧ : ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏନସିପି ମୁଖ୍ୟ ଶରଦ ପାଓ୍ବାରଙ୍କୁ ପ୍ରଶଂସା କରିଛନ୍ତି। ଶନିବାର ପୁଣେର ବସନ୍ତ ଦାଦା ସୁଗାର ଇନଷ୍ଟିଚ୍ୟୁଟର ୪୬ ତମ ବାର୍ଷିକ ଉତ୍ସବରେ ଯୋଗଦେଇ ସେ କହିଛନ୍ତି, ସହକାରୀ କ୍ଷେତ୍ରରେ ପାଓ୍ବାରଙ୍କ ଯୋଗଦାନ ବେଶ୍ ଗୁରୁତ୍ୱପୂର୍ଣ୍ଣ। ବସନ୍ତ ଦାଦା ସୁଗାର ଇନଷ୍ଟିଚ୍ୟୁଟର ଅଧ୍ୟକ୍ଷ ପାଓ୍ବାର ମଧ୍ୟ ଏହି ଅବସରରେ ଉପସ୍ଥିତ ଥିଲେ।
ମୁଖ୍ୟମନ୍ତ୍ରୀ କହିଛନ୍ତି ଯେ ପାୱାର ରାଜ୍ୟ ତଥା ଜାତୀୟ ସ୍ତରରେ ଜଣେ ଅଭିଜ୍ଞ ନେତା। ସମବାୟ କ୍ଷେତ୍ରରେ ତାଙ୍କର ଅବଦାନ ଅତୁଳନୀୟ ଏବଂ ଏହାକୁ ଅଣଦେଖା କରାଯାଇପାରିବ ନାହିଁ । ରାଜ୍ୟରେ କ୍ଷମତାରେ ଯିଏ ଥାଆନ୍ତୁ ମଧ୍ୟ ପାୱାର ସର୍ବଦା ଲୋକଙ୍କ ସ୍ବାର୍ଥ ତଥା ରାଜ୍ୟର କଲ୍ୟାଣ ପାଇଁ ମାର୍ଗଦର୍ଶନ ଏବଂ ପରାମର୍ଶ ପାଇଁ ଉପଲବ୍ଧ ବୋଲି ସେ କହିଛନ୍ତି। ଶିନ୍ଦେ କହିଛନ୍ତି ଯେ ପରାମର୍ଶ ଏବଂ ମତାମତ ଦେବା ପାଇଁ ସେ ମୋତେ ବାରମ୍ବାର ଟେଲିଫୋନ କରିଥାନ୍ତି।
ଦେଶର ବିକାଶରେ ସମବାୟ କ୍ଷେତ୍ର ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ଏହାର ଗୁରୁତ୍ୱକୁ ହୃଦୟଙ୍ଗମ କରି କେନ୍ଦ୍ର ଏହି କ୍ଷେତ୍ର ପାଇଁ ଏକ ପୃଥକ ମନ୍ତ୍ରଣାଳୟ ଗଠନ କରିଛି। ସେ କହିଛନ୍ତି ଯେ ମହାରାଷ୍ଟ୍ରର ସମବାୟ କ୍ଷେତ୍ରକୁ କେନ୍ଦ୍ର ସରକାର ସମ୍ପୂର୍ଣ୍ଣ ସମର୍ଥନ ଯୋଗାଇ ଦେଇଛନ୍ତି।
ଯେତେବେଳେ ଏନସିପି ମୁଖ୍ୟ କୃଷି ମନ୍ତ୍ରୀ ଥିଲେ ସେତେବେଳେ ସେ ଏହି କ୍ଷେତ୍ରରେ ଅନେକ ସଂସ୍କାର କରିଥିଲେ ଏବଂ ସମବାୟ କ୍ଷେତ୍ରରେ ତାଙ୍କର ବହୁ ଅବଦାନ ରହିଥିଲା। ଯାହା ସତ ତାହା ମୁଁ କହୁଛି ବୋଲି ଶିନ୍ଦେ କହିଛନ୍ତି।