ଭୁବନେଶ୍ୱର, ୧୮।୩(ବ୍ୟୁରୋ): ବରିଷ୍ଠ ଆଇଏଫ୍ଏସ୍ ଅଫିସର ଶିଶିର କୁମାର ରଥଙ୍କୁ ରାଜ୍ୟ ସରକାର ପ୍ରଧାନ ମୁଖ୍ୟ ବନ ସଂରକ୍ଷକ (ପିସିସିଏଫ୍) ଭାବେ ନିଯୁକ୍ତି ଦେଇଛନ୍ତି। ଏନେଇ ବୁଧବାର ସାଧାରଣ ପ୍ରଶାସନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଏଥିସହିତ ସେ ରାଜ୍ୟର ଫରେଷ୍ଟ ଫୋର୍ସର ମୁଖ୍ୟ ଦାୟିତ୍ୱ ଭାର ମଧ୍ୟ ସମ୍ଭାଳିବେ। ୧୯୮୭ ବ୍ୟାଚ୍ର ଆଇଏଫ୍ଏସ୍ ଅଫିସର ରଥ ବର୍ତ୍ତମାନ କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟରେ ଅତିରିକ୍ତ ମହାନିର୍ଦ୍ଦେଶକ (ଜଙ୍ଗଲ ସଂରକ୍ଷଣ) ଭାବେ କାର୍ଯ୍ୟ କରୁଛନ୍ତି। ଗତ ୯ ତାରିଖରେ ତାଙ୍କୁ ନିଜ ଗୃହ (ଓଡ଼ିଶା) କ୍ୟାଡରକୁ ଫେରିବାକୁ କେନ୍ଦ୍ର ସରକାର ଅନୁମତି ଦେଇଥିଲେ। ସୂଚନାଯୋଗ୍ୟ, ଗତ ଜାନୁୟାରୀ ୩୧ରେ ପିସିସିଏଫ୍ ପଦବୀ ଖାଲି ପଡ଼ିଥିଲା। ପିସିସିଏଫ୍ ସନ୍ଦୀପ ତ୍ରିପାଠୀ ଅବସର ନେବା ପରେ ଜିତେନ୍ଦ୍ର କୁମାରଙ୍କୁ ଇନ୍ଚାର୍ଜ ଭାବେ ଦାୟିତ୍ୱ ଦିଆଯାଇଥିଲା। ବର୍ତ୍ତମାନ ରାଜ୍ୟରେ ଜଙ୍ଗଲ ନିଆଁ ବ୍ୟାପୁଥିବାରୁ ବନ ବିଭାଗ ସମାଲୋଚିତ ହେଉଛି। ତେଣୁ ନୂଆ ପିସିସିଏଫ୍ ନିଯୁକ୍ତି ବେଶ୍ ଗୁରୁତ୍ୱ ବହନ କରିବ ବୋଲି ଆଶା କରାଯାଉଛି। ତେବେ ରାଜ୍ୟରେ ଏବେ ବି ପିସିସିଏଫ୍(ବନ୍ୟପ୍ରାଣୀ) ପଦବୀ ଖାଲି ପଡ଼ିଛି। ପିସିସିଏଫ୍ (ବନ୍ୟପ୍ରାଣୀ) ହରିଶଙ୍କର ଉପାଧ୍ୟାୟ ଜାନୁୟାରୀ ୩୧ରେ ଅବସର ନେଇଥିଲେ। ଆଡିଶନାଲ ପିସିସିଏଫ୍ ବନ୍ୟପ୍ରାଣୀ ଥିବା ଶଶୀ ପଲ ଉକ୍ତ ଦାୟିତ୍ୱ ତୁଲାଉଛନ୍ତି।
