ନୂଆଦିଲ୍ଲୀ,୪।୧୧: ଶିବସେନା ନେତା ସୁଧୀର ସୁରୀଙ୍କୁ ଗୁଳିକରି ହତ୍ୟା କରାଯିବା ଘଟଣାରେ ତଦନ୍ତ କରୁଥିବା ପୋଲିସକୁ ଅଭିଯୁକ୍ତ ସନ୍ଦିପ ସିଂଙ୍କ ଗାଡ଼ିରୁ ମିଳିଛି ଏକ ଫାଇଲ୍। ଉକ୍ତ ଫାଇଲ୍ରୁ କମେଡିଆନ୍ ଭାରତୀ ସିଂ ଏବଂ ଆତଙ୍କବାଦୀ ବିରୋଧୀ ସାମ୍ମୁଖ୍ୟର ଅଧ୍ୟକ୍ଷ ମନିନ୍ଦର ଜିତ ସିଂ ବିଟାଙ୍କ ଫଟୋ ମିଳିଛି। ଏହାକୁ ନେଇ ପୋଲିସ ତଦନ୍ତ ଜୋରଦାର କରିଛି।
ପ୍ରକାଶ ଯେ, ଅମୃତସରର ଗୋପାଳ ମନ୍ଦିରରେ ମୂର୍ତ୍ତି ଭଙ୍ଗାରୁଜାକୁ ନେଇ ଶିବସେନା ନେତାମାନେ ବିକ୍ଷୋଭ ପ୍ରଦର୍ଶନ କରୁଥିବାବେଳେ ଭିଡ଼ ଭିତରୁ କେହି ଜଣେ ସୁରୀଙ୍କୁ ଗୁଳି କରିଥିଲେ। ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲ ନିଆଯାଇଥିଲେ ହେଁ ଡାକ୍ତର ମୃତ ଘୋଷଣା କରିଥିଲେ। ଆକ୍ରମଣକାରୀଙ୍କୁ ଗିରଫ କରାଯିବା ସହ ତାଙ୍କଠାରୁ ବନ୍ଧୁକ ଜବତ ହୋଇଛି। ଆକ୍ରମଣକାରୀ ଅନ୍ୟ ୩ ଜଣଙ୍କ ସହ ଏକ ଏସ୍ୟୁଭିରେ ଆସିଥିଲେ। ଆକ୍ରମଣ ପଛର କାରଣ ସମ୍ପର୍କରେ ତଦନ୍ତ ଜାରି ରହିଥିବା ପୋଲିସ କମିଶନର କହିଛନ୍ତି।
