ଚମ୍ପୁଆ, ୬।୩(ଡି.ଏନ୍.ଏ.): ୟୁକ୍ରେନ ଓ ଋଷ ମଧ୍ୟରେ ଲାଗି ରହିଥିବା ଯୁଦ୍ଧ ପରିସ୍ଥିତିରେ ଫଶି ରହିଥିବା ଶିବମ ସାହୁ ଶନିବାର ନିଜ ଜନ୍ମମାଟି ଚମ୍ପୁଆରେ ପହଞ୍ଚିଛନ୍ତି। ଶିବମ ଚମ୍ପୁଆରେ ପହଞ୍ଚିବା ପରେ ସ୍ଥାନୀୟ ବୁଦ୍ଧିଜୀବୀ ଗିରିଜା ଶଙ୍କର ସାହୁ, ସନ୍ତୋଷ କୁମାର ସାହୁ ଓ ସତ୍ୟବ୍ରତ ବେହେରା ସମେତ ବହୁ ମାନ୍ୟଗଣ୍ୟ ବ୍ୟକ୍ତି ପୁଷ୍ପଗୁଚ୍ଛ ଓ ପୁଷ୍ପମାଲ୍ୟ ଦେଇ ସ୍ବାଗତ କରିଥିଲେ। ସୂଚନା ଅନୁସାରେ ୟୁକ୍ରେନରେ ଡାକ୍ତରୀ ପାଠ ପଢୁଥିବା ଚତୁର୍ଥ ବର୍ଷର ଛାତ୍ର ଶିବମ ସାହୁ ଆକ୍ରମଣ ପରିସ୍ଥିତି ମଧ୍ୟରେ ଭିନିତ୍ସିଆରେ ରହିଥିଲେ। ଦିନକୁ ଦିନ ଯୁଦ୍ଧ ପରିସ୍ଥିତି ଭୟାନକ ହେବାରୁ ପିତା ଦିଲ୍ଲୀପ କୁମାର ସାହୁ ଶିବମକୁ ଭାରତ ଫେରାଇ ଆଣିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ଅନୁରୋଧ କରିଥିଲେ। ଯୁଦ୍ଧ ପରିସ୍ଥିତି ଜଟିଳ ହେବାରୁ ଶିବମ ୟୁକ୍ରେନରୁ ରୋମାନିଆରେ ଆସି ଆଶ୍ରୟ ନେଇଥିଲେ। ସେଠାରେ ଇଣ୍ଡିଆନ୍ ଆମ୍ବାସୀ ଓ ସ୍ଥାନୀୟ ସରକାରଙ୍କ ପକ୍ଷରୁ ସମସ୍ତ ସହାୟତା ପ୍ରଦାନ କରାଯାଇଥିଲା। ପରେ କେନ୍ଦ୍ର ସରକାରଙ୍କ ସହାୟତାରେ ଫ୍ଲାଇଟ୍ ଯୋଗେ ଦିଲ୍ଲୀ ପହଞ୍ଚିଥିଲେ। ସେଠାରୁ ସେ ଓଡିଶା ଅଭିମୁଖେ ଯାତ୍ରା ଆରମ୍ଭ କରିଥିଲେ। ଓଡିଶା ସରକାରଙ୍କ ପକ୍ଷରୁ ମଧ୍ୟ ତାଙ୍କୁ ସହଯୋଗ କରାଯାଇଥିଲା। ଶିବମ ସେଠାକାର ଭୟଙ୍କର ଅନୁଭୂତି ସମ୍ବନ୍ଧରେ ସୂଚନା ଦେବା ସହିତ ଭାରତୀୟମାନଙ୍କୁ ଉଦ୍ଧାର କ୍ଷେତ୍ରରେ କେନ୍ଦ୍ର ଓ ରାଜ୍ୟର ଭୂମିକାକୁ ପ୍ରଶଂସା କରିଛନ୍ତି।
