ପାଟନା,୧୭ ।୧୧: ବିହାରରେ ନୀତୀଶ କୁମାରଙ୍କ ନେତୃତ୍ୱରେ ପୁଣିଥରେ ସରକାର ଗଠନ କରାଯାଇଛି । ହେଲେ ଏଥର ସରକାରରେ ସୁଶୀଲ କୁମାର ମୋଦିଙ୍କୁ ନିଆଯାଇ ନାହିଁ । ଏହାକୁ ନେଇ ରାଷ୍ଟ୍ରୀୟ ଜନତା ଦଳ(ଆର୍ଜେଡି) ନେତା ଶିବାନନ୍ଦ ତିୱାରି ତାଙ୍କର ପ୍ରତିକ୍ରିୟା ରଖିଛନ୍ତି । ଶିବାନନ୍ଦ କହିଛନ୍ତି ସୁଶୀଲଙ୍କ ସହଯୋଗୀ ଭୂମିକା ଭାରତୀୟ ଜନତା ପାର୍ଟି(ଭାଜପା) ପାଇଁ କମ୍ କିନ୍ତୁ ନୀତୀଶଙ୍କ ପାଇଁ ଅଧିକ ହୋଇଯାଇଥିଲା । ଯେଉଁଥିପାଇଁ ଭାଜପା ଆଜି ତାଙ୍କୁ ଆଡେଇ ଦେଇଛି । ଏହାସହ କୌଣସି ଭାଜପା ନେତାଙ୍କୁ ସେ ଆଗକୁ ବଢିବାକୁ ଦେଉ ନ ଥିଲେ ସବୁ ବିଷୟରେ ନିଜେ ଆଗଭର ହୋଇ କହୁଥିଲେ । ତେଣୁ ଏସବୁ କାରଣ ପାଇଁ ଆଜି ଭଜପା ସୁଶିଲଙ୍କୁ ଅଣଦେଖା କରିଛି ବୋଲି କହିଛନ୍ତି ଆର୍ଜେଡି ନେତା ଶିବାନନ୍ଦ । ସେ କହିଛନ୍ତି ସୁଶିଲଙ୍କ ସହ ତାଙ୍କର କୌଣସି ଶତ୍ରୁତା ନାହିଁ ସେ ମୋ ଛୋଟ ଭାଇ ଭଳି । ହେଲେ ତାଙ୍କ ବ୍ୟକ୍ତିତ୍ୱର ଗଭିରତା କମ୍ । ଯାହାପାଇଁ ଆଜି ଭାଜପା ତାଙ୍କ ନିକଟରୁ ମୁହଁ ଫେରାଇ ନେଇଛି । କାରଣ ସୁଶିଲ ଏମିତି ଜଣେ ନେତା ଯିଏ ଖବରକାଗଜ ଅବା ଟେଲିଭିଜନରେ ସବୁବେଳେ ଆସିବାକୁ ଅନେଇ ବସିଥାଆନ୍ତି । ସୂଚନାଯୋଗ୍ୟ, ସୁଶିଲଙ୍କୁ ଏଥର ନୀତୀଶଙ୍କ ସରକାରରେ ସ୍ଥାନ ଦିଆ ନ ଯିବାକୁ ନେଇ ଶିବାନନ୍ଦ ଏଭଳି କହିଛନ୍ତି ।