ବେଙ୍ଗାଲୁରୁ, ୧୧।୪: କର୍ନାଟକ ବିଧାନସଭା ନିର୍ବାଚନ ଜିତିବା ପାଇଁ କଂଗ୍ରେସ ଜୋର୍ଦାର ଉଦ୍ୟମ ଚଳାଇଥିବାବେଳେ କିଏ ମୁଖ୍ୟମନ୍ତ୍ରୀ ପ୍ରାର୍ଥୀ ହେବେ ଏହାକୁ ନେଇ ଦ୍ୱନ୍ଦ୍ୱ ଲାଗି ରହିଛି। ରାଜ୍ୟର ସର୍ବୋଚ୍ଚ ପଦବୀ ଲାଗି ବରିଷ୍ଠ ନେତା ସିଦ୍ଦରମୈୟା ଏବଂ ପ୍ରଦେଶ କଂଗ୍ରେସ କମିଟି ସଭାପତି ଡି.କେ. ଶିବକୁମାରଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ଲାଗି ରହିଛି। ଏହି ଦୌଡ଼କୁ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କୁ ଆଣିବା ଲାଗି ଶିବକୁମାର ଉଦ୍ୟମ କରିଛନ୍ତି, ଯାହା ଦଳୀୟ ମହଲରେ ବିସ୍ମୟ ସୃଷ୍ଟି କରିଛି। ସିଦ୍ଧରମୈୟାଙ୍କୁ ଚେକ୍ ଦେବା ଲାଗି ଶିବକୁମାର ଖାର୍ଗେଙ୍କ ନାଁ ଉଠାଇ ଦଳ ଭିତରେ ଦଳିତ ମୁଖ୍ୟମନ୍ତ୍ରୀ ଏବଂ ସ୍ଥାନୀୟ ବନାମ ପ୍ରବାସୀକୁ ନେଇ ବିତର୍କ ବଢ଼ାଇବାକୁ ଉଦ୍ୟମ କରିଥିବା କୁହାଯାଉଛି। ଯଦି ଖାର୍ଗେ କର୍ନାଟକ ମୁଖ୍ୟମନ୍ତ୍ରୀ ହୁଅନ୍ତି, ତେବେ ତାଙ୍କ ଅଧୀନରେ କାର୍ଯ୍ୟ କରିବାକୁ ପସନ୍ଦ କରିବି ବୋଲି କେପିସିସି ସଭାପତି କହିଥିଲେ। ଅତୀତରେ ଏହି ବର୍ଷୀୟାନ ନେତାଙ୍କ ପ୍ରତି ଅନ୍ୟାୟ ହୋଇଥିବା ଦଳ ଭିତରେ ସ୍ବର ଉଠିଛି। ତେବେ ଦଳର ନିଷ୍ପତ୍ତି ଚୂଡ଼ାନ୍ତ ବୋଲି ଶିବକୁମାର କହିଛନ୍ତି।
