ନୂଆଦିଲ୍ଲୀ,୨୬।୧: ଜାନୁୟାରୀ ୨୬ରେ ଜନ୍ମ ନେବାକୁ ଭାରତୀୟମାନେ ସୌଭାଗ୍ୟ ବୋଲି ମନେ କରନ୍ତି। ଭାରତୀୟ କ୍ରିକେଟରେ ଏଭଳି ଅନେକ ଖେଳାଳି ଅଛନ୍ତି ଯେଉଁମାନେ ଏହି ସ୍ବତନ୍ତ୍ର ଦିନରେ ଜନ୍ମଗ୍ରହଣ କରିଛନ୍ତି। ସେମାନଙ୍କ ମଧ୍ୟରୁ ଶିବଲାଲ ଯାଦବ ଜଣେ। ସେ ଏଭଳି ଜଣେ ଅଫ୍ ସ୍ପିନର ଥିଲେ, ଯିଏ ନିଜର ବୋଲିଂର ଶୈଳୀକୁ ନେଇ ବିପକ୍ଷ ଟିମ୍କୁ ଚିନ୍ତାରେ ପକାଇ ଦେଉଥିଲେ।
୧୯୫୭ ଆଜିର ଦିନରେ ହାଇଦ୍ରାବାଦରେ ଜନ୍ମ ନେଇଥିଲେ ଶିବଲାଲ। ୧୯୭୯ରେ ଭାରତ ପାଇଁ ପ୍ରଥମ ଟେଷ୍ଟ ଖେଳିଥିଲେ। ଅଷ୍ଟ୍ରେଲିଆ ବିପକ୍ଷରେ ସେ ଡେବ୍ୟୁ କରିଥିଲେ। ଏହି ସିରିଜରେ ସେ ୫ ଟେଷ୍ଟ ମ୍ୟାଚ୍ ଖେଳି ୨୪ ଉଇକେଟ ନେଇଥିଲେ। ପାକିସ୍ତାନ ବିପକ୍ଷରେ ସେ ନିଜର ୧୦୦ତମ ଉଇକେଟ ରେକର୍ଡ ପୂରଣ କରିଥିଲେ। ତେବେ ସେ ରବି ଶାସ୍ତ୍ରୀ ଏବଂ ଦୋଶୀଙ୍କ ସହ ମିଶି ବିପକ୍ଷ ଟିମ୍କୁ ବହୁତ ଅସୁବିଧାରେ ପକାଉଥିଲେ।
କୁହାଯାଏ ଶିବଲାଲ ଏଭଳି ଜଣେ ସ୍ପିନର ଥିଲେ ଯାହାଙ୍କ ବଲ୍ ସେତେଟା ସ୍ପିନ୍ ହେଉ ନ ଥିଲା। ବେଳେବେଳେ ସେ ବୋଲିଂ କରିବା ସମୟରେ ସ୍ପିନ୍ କରୁଥିବା ବେଳେ ବେଳେବଳେ ବିଲ୍କୁଲ୍ ହେଉ ନ ଥିଲା। ଏଣୁ ବିପକ୍ଷ ଟିମ୍ର ଖେଳାଳି ତାଙ୍କ ବଲ୍କୁ ଖେଳି ନ ପାରି ଉଇକେଟ ହରାଉ ଥିଲେ।
୨୦୧୪ରେ ଆଇପିଏଲ୍ ଦୁର୍ନୀତି ନେଇ ତଦନ୍ତ ଚାଲୁଥିବା ବେଳେ କୋର୍ଟ ତତ୍କାଳୀନ ବିସିସିଆଇ ସଭାପତି ଏନ୍. ଶ୍ରୀନିବାସନ୍ଙ୍କ ସ୍ଥାନରେ ଶିବଲାଲଙ୍କୁ ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ଭାବେ ନିଯୁକ୍ତ କରିଥିଲେ।
