ଭୋପାଳ, ୫।୭: ମଧ୍ୟପ୍ରଦେଶ ରାଜନୀତିରେ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ବାନ ଏବଂ ଜ୍ୟୋତିରାଦିତ୍ୟ ସିନ୍ଧିଆଙ୍କ ମଧ୍ୟରେ ଟଣାଓଟରା ଜାରି ରହିଛି। ଇତିମଧ୍ୟରେ ମନ୍ତ୍ରୀମଣ୍ଡଳ ସମ୍ପ୍ରସାରଣ କରିବାକୁ ୩ ଦିନ ବିତିଲାଣି। ତେବେ କାହାକୁ କେଉଁ ବିଭାଗ ମିଳିବ ସେନେଇ ଭାଗବଣ୍ଟା ଛିଣ୍ଡୁନି। ସିନ୍ଧିଆ ବଡ଼ ବିଭାଗ ଆଶାରେ ଅପେକ୍ଷା କରିଛନ୍ତି। ସିନ୍ଧିଆ ନଗର ଉନ୍ନୟନ, ପିଡବ୍ଲ୍ୟୁଡି, ରାଜସ୍ବ, ବାଣିଜ୍ୟକର, ଅବକାରି, ପିଏଚ୍ଇ, ପରିବହନ, ମହିଳା ଓ ଶିଶୁ କଲ୍ୟାଣ ଏବଂ ଖଣିଜ ବିଭାଗ ଉପରେ ଆଖି ରଖିଛନ୍ତି। ଶିବରାଜ ରବିବାର ଦିଲ୍ଲୀ ଯାଇ ସିନ୍ଧିଆଙ୍କ ସମେତ ଭାଜପା ହାଇ କମାଣ୍ଡଙ୍କ ସହିତ ମଧ୍ୟ ସାକ୍ଷାତ୍ କରିବେ ବୋଲି କୁହାଯାଉଛି। ଏହାପରେ ନୂଆ ମନ୍ତ୍ରୀଙ୍କ ମଧ୍ୟରେ ବିଭାଗ ବଣ୍ଟା କାମ ହେବାର ଆଶା ରହିଛି।