ଇନ୍ଦୋର,୧୯ ।୧୦: ମଧ୍ୟପ୍ରଦେଶ ଉପନିର୍ବାଚନ ପୂର୍ବରୁ ରାଜ୍ୟରେ ପୂର୍ବତନ ମୁଖ୍ୟମନ୍ତ୍ରୀ କମଲନାଥଙ୍କ ବୟାନକୁ ନେଇ ବିବାଦ ମୁଣ୍ଡ ଟେକିଛି । ଏହାକୁ ନେଇ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ସୋମବାର ୨ ଘଣ୍ଟା ପାଇଁ ସାଙ୍କେତିକ ମୌନ ବ୍ରତ ରଖିଛନ୍ତି । ଏହାପରେ ସେ କମଲନାଥଙ୍କ ଉପରେ ଖୁବ୍ ବର୍ଷିଛନ୍ତି । ସେ କହିଛନ୍ତି ଏହାକୁ ନେଇ ସେ କଂଗ୍ରେସର ଅସ୍ଥାୟୀ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ନିକଟକୁ ପତ୍ର ଲେଖିବେ ଓ ସେ ଏହା ଉପରେ କି ପଦକ୍ଷେପ ନେଇଛନ୍ତି ତାହା ପଚାରିବେ । ଶିବରାଜ କହିଛନ୍ତି କଂଗ୍ରେସ ସବୁ ସୀମା ଅତିକ୍ରମ କରି ସାରିଲାଣି । ମଧ୍ୟପ୍ରଦେଶର ଜନତା ସରଳ ସତ ହେଲେ କମଲନାଥ ଯେଉଁ ଶବ୍ଦ ପୟୋଗ କରୁଛନ୍ତି ତାକୁ ସେମାନେ ଠିକ୍ ବୁଝିଛନ୍ତି । କମଲନାଥ କ୍ଷମା ମାଗି ନ ଥିବା ବେଳେ କଂଗ୍ରେସ ତାଙ୍କୁ ବଞ୍ଚାଇବା କାମରେ ଲାଗି ପଡିଛି । ସେ କହିଛନ୍ତି ମୋତେ ଯେକୌଣସି ଶବ୍ଦରେ ଗାଳି ଦିଅନ୍ତୁ ହେଲେ ରାଜ୍ୟର କୌଣସି ଭଉଣୀଙ୍କ ଅପମାନକୁ ସହ୍ୟ କରାଯିବ ନାହିଁ । ସେ ସୋନିଆଙ୍କ ଉଦ୍ଦେଶ୍ୟରେ କହିଛନ୍ତି ଆପଣ ମଧ୍ୟ ଜଣେ ନାରୀ, କମଲନାଥ ଜଣେ ନାରୀଙ୍କ ଉଦ୍ଦେଶ୍ୟରେ ଯେଉଁଭଳି ବ୍ୟବହାର କରିଛନ୍ତି ତାଙ୍କ ବିରୋଧରେ ଆପଣ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ । ସୂଚନାଯୋଗ୍ୟ, କମଲନାଥ ଏକ ରାଲିରେ ଭାଜପା ନେତ୍ରୀ ଇମରତି ଦେବୀଙ୍କୁ ଆଇଟମ ବୋଲି କହିଥିଲେ । ଆଉ ଏହାପରେ ବିବାଦ ମୁଣ୍ଡ ଟେକିଛି ।
