ନୂଆଦିଲ୍ଲୀ,୯।୭: ଭାରତ-ପାକିସ୍ତାନ କ୍ରିକେଟ ଟିମ୍ ମଧ୍ୟରେ ଯେତେବେଳେ ବି କୌଣସି ମୁକାବିଲା ହୋଇଥାଏ ତାହା ରୋମାଞ୍ଚକର ହୋଇଥାଏ। ଉଭୟ ଦେଶର ପ୍ରଶଂସକଙ୍କ ମଧ୍ୟରେ ଏକପ୍ରକାର ପ୍ରତିନ୍ଦ୍ୱନ୍ଦିତା ଦେଖିବାକୁ ମିଳିଥାଏ। ମଇଦାନରେ ଖେଳୁଥିବା ଖେଳାଳିଙ୍କ ଉପରେ ବି ଏହାର ପ୍ରଭାବ ପଡେ। ସେମାନଙ୍କ ମଧ୍ୟରେ କଥା କଟାକଟି ହୋଇଥାଏ। ବେଳେବେଳେ ଏହା ଏତେ ବଢ଼ିଯାଏ ଯେ ଚର୍ଚ୍ଚାର କାରଣ ପାଲଟେ। ଏଭଳି ଏକ ଘଟଣା ମହେନ୍ଦ୍ର ସିଂହ ଧୋନୀ ଏବଂ ଇରଫାନ ପଠାନ ବ୍ୟାଟିଂ କରିବା ସମୟରେ ହୋଇଥିଲା। ସେତେବେଳେ ପାକିସ୍ତାନର ବୋଲର ଥିବା ଶୋଏବ ଅଖତର ଭାରତୀୟ ବ୍ୟାଟ୍ସମ୍ୟାନଙ୍କୁ ଗୋଟିଏ ପରେ ଗୋଟିଏ ବାଉନ୍ସର ପକାଉଥିଲେ। ପଡ଼ିଆରେ ଥିବା ଧୋନୀ-ଇରଫାନଙ୍କ ଉପରେ ସ୍କୋର ବଢ଼ାଇବା ଏବଂ ଦଳକୁ ଜିତାଇବାର ଭାର ଥିଲା। ଅଖତର ଉଭୟଙ୍କ ଭାଗୀଦାରୀକୁ ଭାଙ୍ଗିବାକୁ ଚାହୁଁଥିଲେ। ଏହି ସମୟରେ ଉଭୟ ପଟରୁ ସ୍ଲେଜିଂ ଆରମ୍ଭ ହୋଇଥିଲା। ଧିରେ ଧିରେ ଏହା ଏତେ ବଢ଼ିଯାଇଥିଲା ଯେ ଅଖତର ପଡ଼ିଆରେ ଥାଇ ଇରଫାନଙ୍କୁ ଅପହରଣ କରିନେବାର ଧମକ ଦେଇଥିଲେ। ହେଲେ ଏହା ପରେ ଉଭୟ ବ୍ୟାଟ୍ସମ୍ୟାନ ଏଭଳି କିଛି କରିଥିଲେ ଯେ ଶୋଏବ ଚମକିଥିଲେ। କାରଣ ସେ ତାଙ୍କୁ ଉଇକେଟ ନେବାର ଗୋଟିଏ ସୁଯୋଗ ନ ଦେବା ସହ ମ୍ୟାଚ୍କୁ ଜିତାଇଥିଲେ।
ଇରଫାନ ଏକ ସାକ୍ଷାତକାରରେ ଘଟଣାକ୍ରମକୁ ମନେ ପକାଇ କହିଥିଲେ, ଆମେ ପାକିସ୍ତାନରେ ମ୍ୟାଚ୍ ଖେଳୁଥିଲୁ। ଆମର ୩୦୦ରେ ୫/୬ ଉଇକେଟ ଯାଇଥିଲା। ସଚିନଙ୍କୁ ବାଉନ୍ସର ପକାଇ ଆଉଟ୍ କରିଥିଲେ ଅଖତର। ପରେ ମୁଁ ଆସିଥିଲି। ପ୍ରଥମ ବଲ କାନ ପାଖ ଦେଇ ପଳାଇଥିଲା। ସେହିଭଳି ଦ୍ୱିତୀୟ-ତୃତୀୟ ବଲ୍ ଥିଲା। ଏଭଳି ସେ ପରବର୍ତ୍ତୀ ଥର ମଧ୍ୟ କରିଥିଲେ। ଶୋଏବଙ୍କୁ ସ୍ଲେଜିଂ କରିବାକୁ ଭଲ ଲାଗିଥାଏ। ମୋତେ ଚୁପ୍ ରହିବାକୁ ପସନ୍ଦ ନୁହେଁ। ଧୋନୀଙ୍କ ସହ ଉଇକେଟ ବିଷୟରେ କଥା ହୋଇଥିଲି। ପରେ ପଠାନ ଧୋନୀଙ୍କୁ ଅଖତରଙ୍କୁ ଚିଡ଼ାଇବାର ଏକ ଉପାୟ କହିଥିଲେ। ମୁଁ ତାଙ୍କୁ କିଛି କହିବି ତୁମେ ଖାଲି ହସିବ ବୋଲି କହିଥିଲେ। ଧୋନୀ ହଁ ଭରିଥିଲେ। କିଛି ସମୟ ଏପରି କରିବା ପରେ ଅଖତର ରାଗି ଯାଇଥିଲେ। ତାଙ୍କର ଗତି ପ୍ରଭାବିତ ହୋଇଥିଲା। ଫଳରେ ଆଗାମୀ ବଲ୍ରେ ଚୌକା ମାରିଥିଲେ ଇରଫାନ। ଏହା ପରେ ଅଖତର କ୍ରିକେଟରଙ୍କ ପାଖକୁ ଯାଇ ତୋତେ ମୁଁ ଅପହରଣ କରିନେବି ବୋଲି କହିଥିଲେ। ସେତେବେଳେ ଧୋନୀ ତାଙ୍କ ନିକଟକୁ ଚାଲି ଆସିଥିଲେ। ମୁଁ ଅଖତରଙ୍କୁ କହିଥିଲି ଦେଖ ଆଉଟ୍ ତ ତୁମେ କରିପାରିବ ନାହିଁ। ତୁମେ ମୋତେ ଅପହରଣ କଲେ ହିଁ ମୁଁ ଏଠାରୁ ଯିବି। ଏହା ଶୁଣି ଧୋନୀ ବଡ଼ ଜୋର୍ରେ ହସିଥିଲେ ବୋଲି ଇରଫାନ କହିଥିଲେ।
