ବମ୍ବେ: ଦୀର୍ଘ ତିନି ବର୍ଷର ବ୍ୟବଧାନ ପରେ ଟେଲି ପରଦାକୁ ଫେରୁଛନ୍ତି ଅଭିନେତା ଶୋଏବ ଇବ୍ରାହିମ୍। ନୂଆ ଶୋ’ ସହ ନୂଆ ଭୂମିକାରେ ତାଙ୍କୁ ଦର୍ଶକେ ଦେଖିବାକୁ ପାଇବେ। ଏହାକୁ ନେଇ ସେ ବେଶ୍ ଏକ୍ସସାଇଟେଡ୍ ରହିଥିବା ବେଳେ ନିଜ ଉପରେ କାମ କରୁଛନ୍ତି।
ଶୋଏବ ଅଭିନୟ କରିବାକୁ ଯାଉଥିବା ନୂଆ ଶୋ’ର ନାମ ‘ଅଜୁନି’। ଏଥିରେ ତାଙ୍କ ଚରିତ୍ରର ନା ରହିଛି ‘ରାଜବୀର’। ସେ ପଞ୍ଜାବୀ ପରିବାରର ସ୍ମାର୍ଟ ଏବଂ ଜିଦ୍ଦି ପୁଅ ସାଜିବେ। ସେହିଭଳି ଅଜୁନି ମଧ୍ୟବିତ୍ତ ପରିବାରର ଝିଅ। ଉଭୟ ପରସ୍ପର ଜୀବନରେ ଆସିବା ପରେ କ’ଣ ସବୁ ଘଟୁଛି ତାହା ଧାରାବାହିକ ଆସିବା ପରେ ଜଣାପଡ଼ିବ।
ତେବେ ନିଜ ଚରିତ୍ର ନେଇ ଶୋଏବ କହିଛନ୍ତି, ଏହି ଶୋ’ର ଅଫର ମିଳିବା ପରେ ନିଜକୁ ପ୍ରସ୍ତୁତ କରିବାକୁ ହେବ ବୋଲି ଜାଣିଥିଲି। ପୂର୍ବରୁ ଏଭଳି ଭୂମିକା କେବେ ତୁଲାଇନାହିଁ। ମୋର ଭାଷା, ଆର୍ଟିଚ୍ୟୁଡ୍ ଆଦି ଭିନ୍ନ ରହିବ। ଏଣୁ ଦର୍ଶକେ ତାହାକୁ କିଭଳି ଭାବେ ଗ୍ରହଣ କରୁଛନ୍ତି ତାହା ଦେଖିବାକୁ ଅପେକ୍ଷା କରିଥିବା ସେ କହିଛନ୍ତି।
