ଇସଲାମାବାଦ,୧୬।୫: ପାକିସ୍ତାନ ଦଳରେ ଆନ୍ତଃ ରାଜନୀତି ଯୋଗୁ ପୂର୍ବତନ ଅଲରାଉଣ୍ଡର ଶାହିଦ ଆଫ୍ରିଦୀ ୨୦୦୯ରେ ଅନ୍ତର୍ଜାତୀୟ କ୍ରିକେଟରୁ ସମ୍ପୂର୍ଣ୍ଣ ସନ୍ନ୍ୟାସ ନେବାକୁ ଚିନ୍ତା କରିଥିଲେ। ପାକିସ୍ତାନର ଅନ୍ୟତମ ଲୋକପ୍ରିୟ ଖେଳାଳିଙ୍କ ଏଭଳି ମନ୍ତବ୍ୟ ଜାତୀୟ ଦଳ ଓ ପିସିବିରେ ଝଡ଼ ସୃଷ୍ଟି କରିବା ପାଇଁ ଯଥେଷ୍ଟ। ନିକଟରେ ସାମା ଟିଭିକୁ ଦେଇଥିବା ଏକ ସାକ୍ଷାତ୍କାରରେ ଆଫ୍ରିଦୀ କହିଥିଲେ, ୨୦୦୯ରେ ପାକିସ୍ତାନ ଟି୨୦ ବିଶ୍ୱକପ୍ ଜିତିଥିଲା। ଏହାପରେ ଜାତୀୟ ଦଳରେ ବହୁ ରାଜନୀତି ପରେ ଶୋଏବ ମଲିକଙ୍କୁ ଦିଆଯାଇଥିଲା ନେତୃତ୍ୱ ଦାୟିତ୍ୱ। ସେତେବେଳେ ମୁଁ କ୍ରିକେଟ କ୍ୟାରିୟର ଶେଷ କରିବାକୁ ଚିନ୍ତା କରୁଥିଲି।
ଜଣେ ବୃଦ୍ଧଙ୍କ ପରାମର୍ଶ ଯୋଗୁ ଖେଳ ଜାରି ରଖିବାକୁ ନିଷ୍ପତ୍ତି ନେଇଥିବା ସେ କହିଛନ୍ତି। ୨୦୧୦ରେ ଟେଷ୍ଟ କ୍ରିକେଟରୁ ସେ ଅବସର ଘୋଷଣା କରିଥିଲେ। ଏହାପରେ ୨୦୧୫ ବିଶ୍ୱକପ୍ରେ ଦିନିକିଆରୁ ଅବସର ନେବାର ଦୁଇ ବର୍ଷ ପର୍ଯ୍ୟନ୍ତ ଟି୨୦ରେ ଖେଳିବା ଜାରି ରଖିଥିଲେ। ୨୦୧୭ରେ ଅନ୍ତର୍ଜାତୀୟ କ୍ରିକେଟକୁ ଅଲ୍ବିଦା କରିଥିବା ଆଫ୍ରିଦୀ କ୍ୟାରିୟରରେ ୨୭ ଟେଷ୍ଟ, ୩୯୮ ଦିନିକିଆ ଓ ୯୯ ଟି୨୦ ମ୍ୟାଚ୍ ଖେଳିଥିଲେ। ଯଥାକ୍ରମେ ୧୭୧୬, ୮୦୬୪ ଓ ୧୪୧୬ ରନ୍ କରିବା ସହ ମୋଟ ୫୪୧ ଉଇକେଟ ହାତେଇଥିଲେ ପାକିସ୍ତାନର ଏହି ମହାନ ଅଲରାଉଣ୍ଡର।