ନୂଆଦିଲ୍ଲୀ, ୧୮।୮: ତିନୋଟି ଲେଖାଏ ଟେଷ୍ଟ ଓ ଟି୨୦ ସିରିଜ ଖେଳିବା ଲାଗି ପାକିସ୍ତାନ କ୍ରିକେଟ୍ ଦଳ ବର୍ତ୍ତମାନ ଇଂଲଣ୍ଡ ଗସ୍ତରେ ରହିଛି। ଘରୋଇ ଇଂଲଣ୍ଡ ଓ ପାକିସ୍ତାନ ମଧ୍ୟରେ ଟେଷ୍ଟ ସିରିଜର ପ୍ରଥମ ୨ ମ୍ୟାଚ୍ ଶେଷ ହୋଇଯାଇଛି। ଏଥିରେ ପ୍ରଥମ ମ୍ୟାଚ୍କୁ ଇଂଲଣ୍ଡ ଜିତିଥିବାବେଳେ ୨ୟ ମ୍ୟାଚ୍ ବର୍ଷା ଯୋଗୁ ଡ୍ର’ରେ ସମାପ୍ତ ହୋଇଥିଲା। ସିରିଜର ଅନ୍ତିମ ତଥା ୩ୟ ଟେଷ୍ଟ ଶୁକ୍ରବାରଠାରୁ ସାଉଥାମ୍ପଟନରେ ଆରମ୍ଭ ହେବାକୁ ଯାଉଥିବାବେଳେ ଇଂଲଣ୍ଡ ୧-୦ରେ ଅଗ୍ରଣୀ ରହିଛି। ତେବେ ଟି୨୦ ସିରିଜ ପୂର୍ବରୁ ଦଳର ଅଭିଜ୍ଞ ଅଲ୍ରାଉଣ୍ଡର ସୋଏବ ମଲିକ ଦୁବାଇ ଦେଇ ଇଂଲଣ୍ଡରେ ପହଞ୍ଚି ସାରିଛନ୍ତି। ସୋଏବ କିନ୍ତୁ ଦଳରେ ଯୋଗଦେବା ପୂର୍ବରୁ ଦୁଇଥର କରୋନା ଟେଷ୍ଟ କରିବେ। ଯଦି ଉଭୟ ରିପୋର୍ଟ ନେଗେଟିଭ ଆସେ ତେବେ ଯାଇ ସେ ଦଳ ସହିତ ଯୋଗଦେବେ ବୋଲି ଜଣାପଡ଼ିଛି। ଇଂଲଣ୍ଡରେ ପହଞ୍ଚିବା ପୂର୍ବରୁ ସୋଏବ ନିଜର ଏକ ଫଟୋ ସୋସିଆଲ ମିଡିଆରେ ଶେୟାର କରିଛନ୍ତି। ଏଥିସହ ସେ କୁଆଡ଼େ ଯାଉଛନ୍ତି ବୋଲି ଅନୁମାନ କରିବାକୁ ପ୍ରଶଂସକଙ୍କୁ ଅନୁରୋଧ କରିଛନ୍ତି।
ଉଲ୍ଲେଖଯୋଗ୍ୟ, ଇଂଲଣ୍ଡ ବିପକ୍ଷ ସିରିଜ ଲାଗି ପାକିସ୍ତାନ ଜୁନ୍ ଶେଷ ସପ୍ତାହରେ ଗସ୍ତ କରିଥିଲା। ସେତେବେଳେ ସୋଏବ ଦଳ ସହିତ ଯାତ୍ରା କରି ନ ଥିଲେ। ଭାରତରେ ରହୁଥିବା ସ୍ତ୍ରୀ ତଥା ଟେନିସ ତାରକା ସାନିଆ ମିର୍ଜା ଓ ପୁଅକୁ ଭେଟିବା ପରେ ସେ ଜୁଲାଇ ୨୪ରେ ଦଳ ସହିତ ଯୋଗଦେବେ ବୋଲି ଜଣାପଡ଼ିଥିଲା। ପାକିସ୍ତାନ କ୍ରିକେଟ୍ ବୋର୍ଡ ମଧ୍ୟ ତାଙ୍କୁ ଏଥିଲାଗି ସ୍ବତନ୍ତ୍ର ଅନୁମତି ପ୍ରଦାନ କରିଥିଲା। କିନ୍ତୁ ଜୁଲାଇ ୩୧ ତାରିଖ ପର୍ଯ୍ୟନ୍ତ ଭାରତ ସରକାର ଅନ୍ତର୍ଜାତୀୟ ବିମାନ ଉଡ଼ାଣ ଉପରେ କଟକଣା କରିବାରୁ ପରିବାର ସହ ସାକ୍ଷଶତ୍ କରିବା ସମ୍ଭବପର ହୋଇପାରି ନ ଥିଲା। ତେଣୁ ଶେଷରେ ସେ ବାଧ୍ୟ ହୋଇ ଇଂଲଣ୍ଡ ଗସ୍ତ କରିଛନ୍ତି। ସାନିଆ ଓ ତାଙ୍କୁ ପୁଅ ଲକ୍ ଡାଉନ୍ ପୂର୍ବରୁ ହାଇଦ୍ରାବାଦରେ ରହିଯାଇଛନ୍ତି। ତେଣୁ ସୋଏବ ୬ ମାସରୁ ଊର୍ଦ୍ଧ୍ୱ ସମୟ ହେବ ତାଙ୍କ ପରିବାରକୁ ଭେଟିପାରି ନାହାନ୍ତି।
