ନୂଆଦିଲ୍ଲୀ,୭।୧୨ : ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ) ବୁଧବାରୀ ଏହାର ମୁଦ୍ରା ନୀତି ଘୋଷଣା କରିଛନ୍ତି। ଆରବିଆଇ ଗଭର୍ନର ଶକ୍ତିକାନ୍ତ ଦାସ କହିଛନ୍ତି ଯେ,ରେପୋ ରେଟ ୦.୩୫ ପ୍ରତିଶତ ବୃଦ୍ଧି କରାଯାଇଛି। ଫଳରେ ରେପୋ ରେଟ ଏବେ ୬.୨୫ ପ୍ରତିଶତକୁ ବୃଦ୍ଧି ପାଇଛି।
ଶକ୍ତିକାନ୍ତ ଦାସ କହିଛନ୍ତି ଯେ ଏମପିସି ର ୬ ଜଣ ସଦସ୍ୟଙ୍କ ମଧ୍ୟରୁ ୫ଜଣ ରେପୋ ରେଟକୁ ବୃଦ୍ଧି କରିବାକୁ ପସନ୍ଦ କରିଛନ୍ତି ଏବଂ ଏହା ପରେ ଆରବିଆଇ ରେପୋ ରେଟ ବୃଦ୍ଧି କରିବାକୁ ନିଷ୍ପତ୍ତି ନେଇଛି। ଏହାକୁ ମିଶାଇ ଆରବିଆଇ କ୍ରମାଗତ ପଞ୍ଚମ ଥର ପାଇଁ ସୁଧ ହାର ବୃଦ୍ଧି କରିଛି।
ଏହାଦ୍ୱାରା ସାଧାରଣ ଲୋକଙ୍କ ଉପରେ ଋଣ ବୋଝ ବୃଦ୍ଧି ପାଇବ। ଋଣର ଇଏମ୍ଆଇ ବୃଦ୍ଧି ହେବ। ଫଳରେ ଋଣ ନେବା ମହଙ୍ଗା ହେବ। ରେପୋ ରେଟରେ ବୃଦ୍ଧି ଯୋଗୁ ବ୍ୟାଙ୍କଗୁଡିକର ଋଣ ହାର ବୃଦ୍ଧି ପାଇବା ଦ୍ୱାରା ଗ୍ରାହକମାନେ ପ୍ରଭାବିତ ହେବେ। ଆରବିଆଇ ଗଭର୍ନର ଶକ୍ତିକାନ୍ତ ଦାସ କହିଛନ୍ତି ଯେ ଆମେ ଆଉ ଏକ ଆହ୍ବାନପୂର୍ଣ୍ଣ ବର୍ଷର ଶେଷରେ ପହଞ୍ଚିଛୁ। କେବଳ ଦେଶରେ ନୁହେଁ ବିଶ୍ୱର ଅନେକ ଦେଶରେ ମୁଦ୍ରାସ୍ଫୀତି ହାର ବୃଦ୍ଧି ପାଇବାରେ ଲାଗିଛି। ବିଶ୍ୱର ସଙ୍କଟ ଜନକ ପରିସ୍ଥିତି ଯୋଗୁଁ ଦେଶରେ ଯୋଗାଣ ଶୃଙ୍ଖଳା ପରିସ୍ଥିତି ଚ୍ୟାଲେଞ୍ଜର ସମ୍ମୁଖୀନ ହୋଇଛି। କ୍ରମାଗତ ଆଠ ମାସ ଧରି ବ୍ୟାଙ୍କ ଋଣ ଅଭିବୃଦ୍ଧି ଦୁଇ ଅଙ୍କରୁ ଅଧିକ ଥିବାବେଳେ ଦରଦାମ ବୃଦ୍ଧି ଉପର ସ୍ତରରେ ରହିଛି।
ଶକ୍ତିକାନ୍ତ ଦାସ କହିଛନ୍ତି ଯେ ଭାରତର ଅର୍ଥନୀତି ତଥାପି ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ହୋଇ ରହିବ ଏବଂ ଭାରତର ମାକ୍ରୋ ଅର୍ଥନୈତିକ ମୌଳିକତା ସୁଦୃଢ଼ ରହିଛି। ସରକାରଙ୍କ କ୍ୟାପେକ୍ସରୁ ଅର୍ଥନୀତି ଉପକୃତ ହୋଇଛି। ଚଳିତ ବର୍ଷ ମହଙ୍ଗା ବୃଦ୍ଧିର ସ୍ଥିର ଲକ୍ଷ୍ୟ ବହୁ ଦୂରରେ ଅଛି।
ଯଦିଓ ଅକ୍ଟୋବରରେ ଖୁଚୁରା ମୁଦ୍ରାସ୍ଫୀତି ହାରରେ ହ୍ରାସ ଘଟିଛି। ୨୦୨୩ ଆର୍ଥିକ ବର୍ଷ ପାଇଁ ମୁଦ୍ରାସ୍ଫୀତି ହାର ୬.୭ ପ୍ରତିଶତ ହେବ ବୋଲି ଆକଳନ କରାଯାଇଛି। ଦେଶର ଅର୍ଥନୈତିକ ଅଭିବୃଦ୍ଧି ହାର (ଜିଡିପି) ର ଆକଳନ ୭ ପ୍ରତିଶତରୁ ୬.୮ ପ୍ରତିଶତକୁ ହ୍ରାସ କରାଯାଇଛି। ବର୍ତ୍ତମାନ ବିଶ୍ୱ ଅର୍ଥନୀତିରେ ଅନେକ ଅନିଶ୍ଚିତତା ରହିଛି ଏବଂ ଭାରତୀୟ ଅର୍ଥନୀତି ଉପରେ ଏହାର ପ୍ରଭାବ ପଡିବା ସ୍ବାଭାବିକ। ତଥାପି ଭାରତୀୟ ଅର୍ଥନୀତି ଦ୍ରୁତ ଗତିରେ ବୃଦ୍ଧି ପାଇବାର ଆଶା ରହିଛି।
ଗତ ତିନୋଟି ଏମପିସି ବୈଠକରେ ଆରବିଆଇ ରେପୋ ରେଟକୁ ୧.୯୦ ପ୍ରତିଶତ ବୃଦ୍ଧି କରିଛି। ସେଥିମଧ୍ୟରୁ ମେ ମାସରେ ୪୦ ଆଧାର ପଏଣ୍ଟ ଏବଂ ଜୁନ ଏବଂ ଅଗଷ୍ଟରେ ୫୦-୫୦ ଆଧାର ପଏଣ୍ଟ ବୃଦ୍ଧି କରାଯାଇଥିଲା।