ଦୁବାଇ, ୨୦।୯: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଆରମ୍ଭ ହୋଇଯାଇଛି। ଉଦ୍ଘାଟନୀ ମୁକାବିଲାରେ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର୍ କିଙ୍ଗ୍ସ ୫ ଉଇକେଟ୍ରେ ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସକୁ ପରାସ୍ତ କରିଛି। ଲିଗ୍ର ୨ୟ ମ୍ୟାଚ୍ରେ ରବିବାର ଦିଲ୍ଲୀ କ୍ୟାପିଟାଲ୍ସ ଓ କିଙ୍ଗ୍ସ ଇଲେଭେନ ପଞ୍ଜାବ ମଧ୍ୟରେ ମ୍ୟାଚ୍ ଅନୁଷ୍ଠିତ ହେବ। ତେବେ ଏଥିପୂର୍ବରୁ ଦିଲ୍ଲୀ କ୍ୟାପିଟାଲ୍ସକୁ ଝଟ୍କା ଲାଗିଛି। ଦ୍ରୁତ ବୋଲର ଇଶାନ୍ତ ଶର୍ମା ଅଭ୍ୟାସ ସେସନ୍ ଅବସରରେ ଆଘାତ ପ୍ରାପ୍ତ ହୋଇଥିବା ଜଣାପଡ଼ିଛି। ରିପୋର୍ଟ ଅନୁସାରେ ଇଶାନ୍ତଙ୍କ ପିଠିରେ ଆଘାତ ଲାଗିଛି। ଏଥିପୂର୍ବରୁ ଇଶାନ୍ତ ଚଳିତ ବର୍ଷ ପ୍ରାରମ୍ଭରେ ମଧ୍ୟ ଆହତ ହୋଇଥିଲେ। ଏହାର ଏକ ମାସ ପରେ ସେ ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜରେ ପ୍ରତ୍ୟାବର୍ତ୍ତନ କରିଥିଲେ। କିନ୍ତୁ ସେହି ସିରିଜ ମଧ୍ୟରେ ଇଶାନ୍ତ ପୁଣିଥରେ ଆହତ ହୋଇଥିଲେ।
କ୍ୟାପିଟାଲ୍ସରେ ଇଶାନ୍ତଙ୍କ ସହ ଦ୍ରୁତ ବୋଲର ଭାବେ ହର୍ଷେଲ ପଟେଲ, ମୋହିତ୍ ଶର୍ମା, ଅଭେଷ ଖାନ୍ ରହିଛନ୍ତି। ଯଦି ଇଶାନ୍ତ ଆଜିର ମ୍ୟାଚ୍ ନ ଖେଳନ୍ତି ତେବେ ଏହି ୩ଜଣ ଦ୍ରୁତ ବୋଲିଂ ଭାର ସମ୍ଭାଳିବେ। ଏଠାରେ ଉଲ୍ଲେଖଯୋଗ୍ୟ, ଦିଲ୍ଲୀ ଓ ପଞ୍ଜାବ ଆଇପିଏଲ୍ରେ ପରସ୍ପର ୨୪ଥର ସାମ୍ନାସାମ୍ନି ହୋଇଛନ୍ତି। ଯେଉଁଥିରେ ପଞ୍ଜାବ ୧୪ଥର ଓ ଦିଲ୍ଳୀ ୧୦ଥର ବିଜୟୀ ହୋଇଛି।
