ମୁମ୍ବାଇ, ୨୦।୯ : କେନ୍ଦ୍ର ମନ୍ତ୍ରୀ ନାରାୟଣ ରାଣେଙ୍କୁ ବମ୍ବେ ହାଇକୋର୍ଟରୁ ଏକ ବଡ଼ ଝଟକା ଲାଗିଛି। ଦୁଇ ସପ୍ତାହ ମଧ୍ୟରେ ମୁମ୍ବାଇର ଜୁହୁ ଅଞ୍ଚଳରେ ନାରାୟଣ ରାଣେଙ୍କ ବଙ୍ଗଳା ଭାଙ୍ଗିବାକୁ ବମ୍ବେ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ମଙ୍ଗଳବାର ଏହି ବେଆଇନ ନିର୍ମାଣକୁ ଭାଙ୍ଗିବା ପାଇଁ ବ୍ରିହାନମ୍ବାଇ ମ୍ୟୁନିସିପାଲ କର୍ପୋରେଶନ (ବିଏମସି) କୁ ନିର୍ଦ୍ଦେଶ ଦିଆଯାଇଛି। କୋର୍ଟ ମଧ୍ୟ ରାଣେଙ୍କୁ ୧୦ଲକ୍ଷ ଟଙ୍କା ଜରିମାନା କରିଛନ୍ତି। ନିର୍ମାଣରେ ଫ୍ଲୋର ସ୍ପେସ ଇଣ୍ଡେକ୍ସ (ଏସଏସଆଇ) ଏବଂ କୋଷ୍ଟାଲ ରେଗୁଲେଶନ ଜୋନ (ସିଆରଜେଡ) ନିୟମ ଉଲ୍ଲଂଘନ କରାଯାଇଛି ବୋଲି କୋର୍ଟ କହିଛନ୍ତି। ଫ୍ଲୋର୍ ସ୍ପେସ ଇଣ୍ଡେକ୍ସ ହେଉଛି ଅନୁମତିପ୍ରାପ୍ତ ସୀମା ଯେଉଁଥିରେ ଏକ ନିର୍ଦ୍ଦିଷ୍ଟ ପ୍ଲଟ କିମ୍ବା ଜମିରେ ନିର୍ମାଣ କାର୍ଯ୍ୟ କରାଯାଇପାରିବ ।
ଆଇନ ଉଲ୍ଲଂଘନ କରି ବେଆଇନ ନିର୍ମାଣ ହୋଇଥିବା କୋର୍ଟ ସ୍ବୀକାର କରିଛନ୍ତି। ଜଷ୍ଟିସ ଆର. ଡି. ଧନୁକା ଏବଂ ଜଷ୍ଟିସ କମଲ ଖତାଙ୍କ ନେତୃତ୍ୱରେ ଗଠିତ ଏକ ଡିଭିଜନ ବେଞ୍ଚ କହିଛନ୍ତି ଯେ ଅନୁମୋଦିତ ଯୋଜନା ତଥା ଆଇନର ନିୟମକୁ ଉଲ୍ଲଂଘନ କରି ବହୁ ପରିମାଣରେ ଅନଧିକୃତ ନିର୍ମାଣ କରାଯାଇଛି। ବେଞ୍ଚ କହିଛନ୍ତି ଯେ ଅନଧିକୃତ ନିର୍ମାଣକୁ ରଖିବା ଦ୍ୱାରା ମୁମ୍ବାଇ ସହରରେ ଆଇନଗତ ବ୍ୟବସ୍ଥାର ବ୍ୟାପକ ଉଲ୍ଲଂଘନ ହେବ ଏବଂ ଅନଧିକୃତ ନିର୍ମାଣକୁ ଉତ୍ସାହିତ କରିବ।
ରାଣେଙ୍କ ଉପରେ ଲାଗୁ ହୋଇଥିବା ଜରିମାନା ଦୁଇ ସପ୍ତାହ ମଧ୍ୟରେ ମହାରାଷ୍ଟ୍ର ରାଜ୍ୟ ଆଇନ ସେବା ପ୍ରାଧିକରଣରେ ଜମା କରିବାକୁ ନିର୍ଦ୍ଦେଶ ଦିଆଯାଇଛି। ରାଣେଙ୍କ ଓକିଲ ଶାର୍ଦ୍ଦୁଳ ସିଂ କୋର୍ଟଙ୍କୁ ଆଦେଶ ଉପରେ ୬ ସପ୍ତାହ ରୋକ ଲଗାଇବାକୁ ଅନୁରୋଧ କରିଛନ୍ତି ଯାହା ଦ୍ୱାରା ସେ ସୁପ୍ରିମକୋର୍ଟରେ ଏକ ଆବେଦନ କରିପାରିବେ। ତେବେ କୋର୍ଟ ତାଙ୍କ ଅନୁରୋଧକୁ ପ୍ରତ୍ୟାଖ୍ୟାନ କରିଛନ୍ତି।
ରାଣେଙ୍କ ପରିବାର ମାଲିକାନାରେ ଥିବା କାଲ୍କା ରିଅଲ ଏଷ୍ଟେଟ୍ସ ଦ୍ୱାରା ଦାଖଲ ହୋଇଥିବା ଏକ ଆବେଦନକୁ କୋର୍ଟ ଖାରଜ କରି କହିଛନ୍ତି।