ଢେଙ୍କାନାଳ ଅଫିସ,୧୪।୧୦: ଢେଙ୍କାନାଳ ସହରାଞ୍ଚଳସ୍ଥିତ ରଥଗଡ଼ା ଭାରତୀୟ ଜୀବନ ବୀମା ନିଗମ (ଏଲ୍ଆଇସି) କାର୍ଯ୍ୟାଳୟରେ ଗୁରୁବାର ଏକ ଅଭାବନୀୟ ଘଟଣା ଘଟିଛି। ଏଲ୍ଆଇସି କାର୍ଯ୍ୟାଳୟରୁ ଆକ୍ସିସ ବ୍ୟାଙ୍କକୁ ଟଙ୍କା ଯାଉଥିଲା। ଏଥିପାଇଁ ସିଏମ୍ଏସ୍ ଭ୍ୟାନର କର୍ମଚାରୀମାନେ କାର୍ଯ୍ୟାଳୟରେ ଟଙ୍କା ଗଣୁଥିଲେ। ଏହି ସମୟରେ ସାଥିରେ ଆସିଥିବା ସିଏମ୍ଏସ୍ ଭ୍ୟାନ ଗନ୍ମ୍ୟାନ କୁମୁଦ କୁମାର ସାହୁ(୫୪)ଙ୍କ ସର୍ଭିସ ବନ୍ଧୁକରୁ ଅଜାଣତରେ ଗୋଟେ ରାଉଣ୍ଡ ଗୁଳି ଫୁଟିଯିବାରୁ କାର୍ଯ୍ୟାଳୟରେ ଭୟର ବାତାବରଣ ଖେଳିଯାଇଛି। ଗୁଳିଟି ଛାତର ସିଲିଂରେ ବାଜି କଣା ହୋଇଯାଇଛି। ଏଥିରେ କେହି ମୃତାହତ ହୋଇନାହାନ୍ତି। ଏଲ୍ଆଇସି ଅଫିସରେ ସିଏମ୍ଏସ୍ର କର୍ମଚାରୀମାନେ ଟଙ୍କା ଗଣୁଥିବା ସମୟରେ ଗନ୍ମ୍ୟାନ ସେଠାରେ ଉପସ୍ଥିତ ଥିଲେ। ହଠାତ୍ ବନ୍ଧୁକର ଟ୍ରିଗରରେ ଗୋଡ଼ ବାଜିଯିବାରୁ ଗୁଳି ଫୁଟିଥିଲା ବୋଲି କାର୍ଯ୍ୟାଳୟର କର୍ମଚାରୀମାନେ କହିଛନ୍ତି। ଖବର ପାଇ ଢେଙ୍କାନାଳ ଟାଉନଥାନା ପୁଲିସ କାର୍ଯ୍ୟାଳୟରେ ପହଞ୍ଚତ୍ ଘଟଣାର ତଦନ୍ତ କରିଛି। କୁମୁଦ ଏହା ପୂର୍ବରୁ ଢେଙ୍କାନାଳର ବିଭିନ୍ନ ବ୍ୟାଙ୍କରେ ସୁରକ୍ଷାକର୍ମୀ ଭାବେ କାର୍ଯ୍ୟ କରୁଥିଲେ। ହେଲେ ଜଣେ ଅଭିଜ୍ଞ ଗନ୍ମ୍ୟାନଙ୍କ ବନ୍ଧୁକରୁ କିଭଳି ଗୁଳି ଫୁଟିଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।