ପାଟଣା,୨୮ା୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ୍ କଣ୍ଟିଆପଡ଼ାର ରଞ୍ଜନ ବେହେରା ଅନଲାଇନ୍ ଠକେଇର ଶିକାର ହୋଇଛନ୍ତି। ମୋବାଇଲ ଲଟେରି ଉଠିଥିବା କହି ଦୁର୍ବୃତ୍ତ ତାଙ୍କଠାରୁ ୪ ହଜାରରୁ ଊର୍ଦ୍ଧ୍ୱ ଟଙ୍କା ଠକି ନେଇଛନ୍ତି। ମୋବାଇଲ ବଦଳରେ ଜୋତା, ବେଲ୍ଟ ଓ ପର୍ସ ଆସିଥିବା ରଞ୍ଜନ କହିଛନ୍ତି। ରଞ୍ଜନ ପେସାରେ ଜଣେ ଡ୍ରାଇଭର ହୋଇଥିବା ବେଳେ କିଛିଦିନ ପୂର୍ବରୁ ତାଙ୍କ ମୋବାଇଲକୁ ଜଣେ ଯୁବତୀ ୯୮୯୧୯୪୦୭୩୭ ନମ୍ବରରୁ ଫୋନ୍ କରିଥିଲେ। ତାଙ୍କ ମୋବାଇଲ ନମ୍ବର ୬୩୭୦୦୭୬୭୩୯ରେ ଜିଓର ଅଫର ଅଛି। ଏଥିସହ ଲଟେରୀରେ ଏକ ରେଡ୍ମି ନୋଟ-୧୦ ପ୍ରୋ ବାଜିଛି ବୋଲି କହିଥିଲେ। ଏଥିପାଇଁ ରଞ୍ଜନଙ୍କୁ ୪ ହଜାର ୬ ଶହ ଦେବାକୁ ପଡ଼ିବ। ସୋମବାର ପୋଷ୍ଟ ଅଫିସରୁ କ୍ୟାସ ଅନ ଡେଲିଭରି ପାର୍ଶଲ ଆସିବା ପରେ କଣ୍ଟିଆପଡ଼ା ଡାକଘରକୁ ଯାଇ ରଞ୍ଜନ ୪ ହଜାର ୬୦୦ ଟଙ୍କା ଦେଇ ପାର୍ଶଲ ଖୋଲିଥିଲେ। ମାତ୍ର ପାର୍ଶଲରୁ ଜୋତା, ବେଲ୍ଟ ଓ ଏକ ପର୍ସ ମିଳିଥିଲା। ତାହା ସମୁଦାୟ ୧ ହଜାର ମଧ୍ୟ ହେବନାହିଁ। ଏହା ଦେଖିବା ପରେ ରଞ୍ଜନ ଆଶ୍ଚର୍ଯ୍ୟ ହେବା ସହ ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ। ଏ ନେଇ ସେ ତୁରୁମୁଙ୍ଗା ଥାନାରେ ମଙ୍ଗଳବାର ଅଭିଯୋଗ କରିବେ ବୋଲି କହିଛନ୍ତି।