କେନ୍ଦୁଝର,୧୪।୬(ନରେଶ ଚନ୍ଦ୍ର ପଟ୍ଟନାୟକ)
କେନ୍ଦୁଝର ଜିଲା ହରିଚନ୍ଦନପୁର ଥାନା ଅଧୀନ ସିଙ୍ଗିବିଲା ଗ୍ରାମରେ ସୋମବାର ରାତିରେ ପ୍ରେମ ବ୍ୟାପାରକୁ ନେଇ ଗୁଳିକାଣ୍ଡ ଘଟିଛି। ସାଙ୍ଗଙ୍କ ଗୁଳିରେ ଅନ୍ୟ ଜଣେ ଗୁରୁତର ହୋଇଛନ୍ତି। ଚିକିତ୍ସା ପାଇଁ ତାଙ୍କୁ କଟକ ବଡ଼ ଡାକ୍ତରଖାନା ପଠାଯାଇଛି। ଆହତ ଯୁବକ ଜଣକ ହେଲେ ପୂର୍ଣ୍ଣଚନ୍ଦ୍ର ଦାସ। ତାଙ୍କ ମୁଣ୍ଡରେ ଗୁଳି ବାଜିଛି। ଅଭିଯୁକ୍ତ ବିନୋଦ ପାତ୍ରଙ୍କୁ ପୋଲିସ ଗିରଫ କରିବା ସହ ତଦନ୍ତ ଜାରି ରଖିଛି।
ପୋଲିସ ସୂଚନା ଅନୁଯାୟୀ, ପୂର୍ଣ୍ଣଚନ୍ଦ୍ର ଓ ବିନୋଦ ଦୁଇ ସାଙ୍ଗ। ସେମାନେ ବେଙ୍ଗାଲୁରୁରେ କାମ କରୁଥିବା ବେଳେ ରଜ ଛୁଟିରେ ଘରକୁ ବୁଲିବାକୁ ଆସିଥିଲେ। ସୋମବାର ସାରେ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ବିନୋଦ ଉତ୍କ୍ଷିପ୍ତ ହୋଇ ପୂର୍ଣ୍ଣଚନ୍ଦ୍ରଙ୍କ ଉପରକୁ ଗୁଳି ଚଳାଇଥିଲେ। ତେବେ ଏହି ବନ୍ଧୁକ କାହାର ଓ କେଉଁଠୁ ଆସିଲା ପୋଲିସ ତାହାର ତଦନ୍ତ କରୁଛି।
କେନ୍ଦୁଝର ଏସ୍ପି ନୀତୀନ କୁଶଲକର ତାଗଡୁ କହିଛନ୍ତି ଯେ, ପ୍ରେମ ବ୍ୟାପାରକୁ ନେଇ ଗୁଳିକାଣ୍ଡ ଘଟିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ବିନୋଦ କିଛି ଦିନ ତଳେ ଜଣେ ଯୁବତୀଙ୍କୁ ଭଲପାଇ ବେଙ୍ଗାଲୁରୁ ନେଇ ଯାଇଥିଲେ। ସେଠାରେ କିଛି ଦିନ ରହିବା ପରେ କୌଣସି କାରଣରୁ ଯୁବତୀ ଜଣକ କୌଶଳକ୍ରମେ ଟ୍ରେନରେ ପଳାଇ ଆସିଥିଲେ। ତେବେ ଉକ୍ତ ଯୁବତୀଙ୍କୁ ପୂର୍ଣ୍ଣଚନ୍ଦ୍ର ଶିଖାଇ ସେଠାରୁ ଘରକୁ ପଠାଇ ଦେଇଥିଲେ ବୋଲି ବିନୋଦ ସନ୍ଦେହ କରୁଥିଲେ। ସୋମବାର ରାତିରେ ବିନୋଦ ମଦ ପିଇବାକୁ କହି ପୂର୍ଣ୍ଣଚନ୍ଦ୍ରଙ୍କୁ ଡାକିଥିଲେ। ପୂର୍ଣ୍ଣଚନ୍ଦ୍ର ଆସିବା ପରେ ବିନୋଦ ତାଙ୍କ ଉପରକୁ ଗୁଳି ଚଳାଇଥିଲେ। ଗୁଳି ଶବ୍ଦ ଶୁଣି ସ୍ଥାନୀୟ ଲୋକେ ପହଞ୍ଚତ୍ ପୂର୍ଣ୍ଣଚନ୍ଦ୍ରଙ୍କୁ ଉଦ୍ଧାର କରି ଡାକ୍ତରଖାନା ପଠାଇଥିଲେ।