ସମ୍ବଲପୁର,୨୯ା୨(ପ୍ରମୋଦ ବହିଦାର): ସମ୍ବଲପୁର ସହରର ଏକ ଜୁଏଲେରି ଦୋକାନ ମାଲିକଙ୍କୁ ଗୁଳିକରି ଲୁଟ୍ ଉଦ୍ୟମ ଘଟଣାରେ ପୋଲିସ ଗୁରୁବାର ୨ ଅଭିଯୁକ୍ତଙ୍କୁ ଗିରଫ କରିଛି।
ଜିଲା ପୋଲିସ ମୁଖ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ମୁକେଶ ଭାମୁ ସୂଚନା ଦେଇ କହିଛନ୍ତି, ଗତ ୧୬ ତାରିଖରେ ସହରର ପାୟଲ ଜୁଏଲେରି ଦୋକାନରେ ଘଟିଥିବା ଗୁଳିକାଣ୍ଡ ଘଟଣାକୁ ନେଇ ଧନୁପାଲି ଥାନାରେ ଏକ ମାମଲା (ନଂ.୭୫/୨୪) ରୁଜୁ କରି ପୋଲିସ ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ଘଟଣାରେ ୮ଜଣ ସମ୍ପୃକ୍ତ ଥିବା ଜଣାପଡିଥିଲା। ସେମାନଙ୍କ ମଧ୍ୟରୁ ୨ଜଣଙ୍କୁ ଗିରଫ କରାଯାଇଛି।
ସେମାନେ ହେଲେ ମାଷ୍ଟରମାଇଣ୍ଡ ବିହାର ସମସ୍ତିପୁର ଜିଲା ଦଲସିଂସରାଇ ଥାନା ମଇପୁର ଗ୍ରାମର ମୂଳବାସିନ୍ଦା ତଥା ବର୍ତ୍ତମାନ ଧନୁପାଲି ଥାନା ଟାଙ୍ଗରପାଲିରେ ରହୁଥିବା ସଞ୍ଜୟ ସାହା ଓରଫ ସାହୁ(୪୫) ଓ ଅଇଁଠାପାଲି ଥାନା ଅନୁଗୁଳିଆ ପଡ଼ାରେ ରହୁଥିବା ବଲାଙ୍ଗୀର ଜିଲା ସଇଁତଲା ଥାନା ଗୁମସର ଗ୍ରାମର ମୂଳବାସିନ୍ଦା ଟିକେଶ୍ୱର ସାହୁ(୫୧)। ସେମାନଙ୍କ ନିକଟରୁ ୨ ବାଇକ୍, ୩ ବନ୍ଧୁକ, ୭ ଜୀବନ୍ତ ଗୁଳି, ୨ମୋବାଇଲ ଫୋନ, ସୁନା ଅଳଙ୍କାର, ୯ ହଜାର ଟଙ୍କା ଜବତ କରାଯାଇଛି। ଏମାନେ ସମ୍ବଲପୁର ଓ ବରଗଡ଼ ଜିଲାର ୭ଟି ସୁନା ଦୋକାନ ଲୁଟ୍ ଘଟଣାରେ ସମ୍ପୃକ୍ତି ନେଇ ବିଭିନ୍ନ ଥାନାରେ ମାମଲା ରୁଜୁ ହୋଇଛି। ଏଥିରେ ଆଉ କେଉଁମାନଙ୍କର ସମ୍ପୃକ୍ତି ରହିଛି ସେ ନେଇ ଅଧିକ ତଦନ୍ତ ପାଇଁ ଗିରଫଦ୍ୱୟଙ୍କୁ ରିମାଣ୍ଡରେ ନିଆଯିବ ବୋଲି ସେ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଉକ୍ତଦିନ ସ୍ପଷ୍ଟ ଦିବାଲୋକରେ ଅଭିଯୁକ୍ତମାନେ ଗୋବିନ୍ଦତୋଲାସ୍ଥିତ ନ୍ୟୁପାୟଲ ଜୁଏଲେରିରେ ଡକାୟତି ଉଦ୍ୟମ କରିଥିଲେ। ମାତ୍ର ଦୋକାନ ମାଲିକ ସୁଜିତ ସ୍ବର୍ଣ୍ଣକାର ବାଧାଦେବାରୁ ସେମାନେ ଲୁଟ୍ କରିବାରେ ବିଫଳ ହୋଇ ତାଙ୍କ ଉପରକୁ ଗୁଳି ଚାଳନାକରି ଫେରାର ହୋଇଯାଇଥିଲେ। ଗୁଳିମାଡ଼ରେ ଆହତ ସୁଜିତଙ୍କୁ ଜିଲା ମୁଖ୍ୟ ଚିକିତ୍ସାଳୟ ଓ ପରେ ଭୁବନେଶ୍ୱରର ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ସେଠାରେ ସେ ଚିକିତ୍ସାଧୀନ ଥିବା ଏସ୍ପି ଭାମୁ ସୂଚନା ଦେଇଛନ୍ତି।