କେନ୍ଦୁଝର,୧୨ା୧୧(ସ୍ବ.ପ୍ର.): କେନ୍ଦୁଝର ଜିଲା ତେଲକୋଇ ରେଞ୍ଜ ଅନ୍ତର୍ଗତ ତାଳପଦା ସେକ୍ସନ ଅଧିନସ୍ଥ ଏସ୍ଏନ୍ପୁରଗୋଡ଼ା ବିଟ୍ ଅନ୍ତର୍ଗତ କଳାପାଟ ସଂରକ୍ଷିତ ଜଙ୍ଗଲରେ ଏକ ଗର୍ଭିଣୀ ହାତୀକୁ ତୀର ବିନ୍ଧି ମାରିଦେବା ଘଟଣାରେ କେନ୍ଦୁଝର ଡିଏଫ୍ଓ ଏଚ୍.ଡି.ଧନରାଜ ଉକ୍ତ ସେକ୍ସନର ଫରେଷ୍ଟର ପୂର୍ଣ୍ଣଚନ୍ଦ୍ର ମହାନ୍ତଙ୍କୁ ନିଲମ୍ବନ କରିଛନ୍ତି। ସେହିପରି ରେଞ୍ଜ ଅଧିକାରୀ ଶିବାଜୀ ମୋହନ ରାଓ ଓ ଫରେଷ୍ଟ ଗାର୍ଡ ଝରଣା ସାହୁଙ୍କୁ ନୋଟିସ କରାଯାଇଛି। ୩ ଦିନ ମଧ୍ୟରେ ଉତ୍ତର ଦେବାକୁ ରେଞ୍ଜ ଅଧିକାରୀ ଶିବାଜୀ ରାଓଙ୍କୁ ନୋଟିସ କରିଛନ୍ତି। ବିଳମ୍ବରେ ହାତୀ ମୃତ୍ୟୁ ସୂଚନା ପାଇବା ନେଇ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ତେବେ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ୫ଦିନ ଲାଗିଗଲା ା
ପ୍ରକାଶ ଯେ, ଗତ ୭ ତାରିଖରେ ଉକ୍ତ ସ୍ଥାନରେ ଏକ ମାଈହାତୀ ଓ ଛୁଆ ମରିପଡ଼ିଥିବାରୁ ଗନ୍ଧ ବାରି ଗ୍ରାମବାସୀ ତାଳପଦା ସେକ୍ସନର ଫରେଷ୍ଟରଙ୍କୁ ସୂଚନା ଦେଇଥିଲେ। ପରେ ଉକ୍ତ ସ୍ଥାନରେ ତୀର ବିଦ୍ଧ ହାତୀ ଓ ନବଜାତ ହାତୀ ଶାବକର ମୃତଦେହ ଉଦ୍ଧାର କରିଥିଲେ। ଏହି ଘଟଣାକୁ ନେଇ ଜଙ୍ଗଲରେ ମୃତଦେହ ପଚି ଗନ୍ଧ ହେବାରୁ ଗ୍ରାମବାସୀ ଫରେଷ୍ଟରଙ୍କୁ ସୂଚନା ଦେଇଥିଲେ। ଘଟଣା ଦିନ କେନ୍ଦୁଝର ଡିଏଫ୍ଓ ଓ ପର ଦିନ ପିସିସିଏଫ୍, ବନ୍ୟପ୍ରାଣୀ ପହଞ୍ଚିି ସବିଶେଷ ଅନଧ୍ୟାନ କରିଥିଲେ। ତେବେ ନିୟମିତ ହାତୀମାନଙ୍କ ଟ୍ରାକିଂ କରାଯାଇ ସେମାନଙ୍କ ସ୍ଥିତା ଅବସ୍ଥାକୁ ତଳସ୍ତରରେ କାମ କରୁଥିବା କର୍ମଚାରୀମାନେ ଉଚ୍ଚ ଅଧିକାରୀଙ୍କୁ ରିପୋର୍ଟ କରିଥାନ୍ତ। ତେବେ ଏହି ହାତୀଟି ଦୀର୍ଘଦିନ ହେଲା ସେଠାରେ ମରି ପଡ଼ିରହିଥିଲେ ହେଁ କିଭଳି ଟ୍ରାକିଂ ରିପୋର୍ଟରୁ ଜଣାପଡ଼ିଲା ନାହିଁ ଏବଂ ଗଳିତ ମୃତଦେହ ଉଦ୍ଧାର ହେଲା ସେଥିରୁ ଚାଲିଥିବା ଟ୍ରାକିଂ ବ୍ୟବସ୍ଥାର ସ୍ବଚ୍ଛତାକୁ ନେଇ ପ୍ରଶ୍ନ ଉଠିଥିଲା। ତେବେ ଏହି ହାତୀ ଦେହରେ ତୀର ଦୀର୍ଘ ମାସ ପୂର୍ବରୁ ବାଜିଥିବା ଆଶଙ୍କା କରାଯାଉଛି। ହାତୀମାନେ ଚଳପ୍ରଚଳ କରୁଥିବା ଏବଂ ଗୋଟିଏ ରେଞ୍ଜରୁ ଅନ୍ୟ ରେଞ୍ଜ ତଥା ଅନ୍ୟ ଡିଭିଜନକୁ ଚଳାଚଳ କରୁଥିବାରୁ କେଉଁଠି ତୀରବିଦ୍ଧ ହୋଇଛି ଜାଣିବା ସୁବିଧା ନୁହେଁ। ଏଣୁ ଏହି ଘଟଣାରେ ହାତୀକୁ ତୀର ମାରିଥିବା ଅଭିଯୁକ୍ତଙ୍କୁ ଗିରଫ କରିବା ବିଭାଗ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି। ଏପରି ନ ହେଉ କି ଦୋଷୀ ଖସିଯାଉ ଏବଂ କାର୍ଯ୍ୟାନୁଷ୍ଠାନ ଆଳରେ ନିରୀହ ଓ ନିର୍ଦ୍ଦୋଷ ଲୋକଙ୍କୁ ଗିରଫ କରି କେସ୍କୁ ବନ୍ଦ କରି ଦିଆଯାଉ ବୋଲି ଆଲୋଚନା ହେଉଛି।