ସିକାଗୋ, ୧୧।୧(ଆଇଏଏନ୍ଏସ୍): ଆମେରିକାର ଇଲିନୋଇସ୍ ରାଜ୍ୟରେ ଗୁଳିକାଣ୍ଡ ଘଟି ୪ ଜଣଙ୍କ ମୃତ୍ୟୁ ହେବା ସହ ଅନ୍ୟ ୨ ଜଣ ଗୁରୁତର ଆହତ ହୋଇଛନ୍ତି। ପୋଲିସ ଗୁଳିରେ ସନ୍ଦିଗ୍ଧ ଆକ୍ରମଣକାରୀ ନିହତ ହୋଇଛନ୍ତି। ଶନିବାର ଅପରାହ୍ନରେ ସିକାଗୋର ଏକ ଔଷଧ କମ୍ପାନୀ ନିକଟରେ ପ୍ରଥମ ଗୁଳିକାଣ୍ଡ ଘଟି ଜଣେ ଯୁବକ ପ୍ରାଣ ହରାଇଥିଲେ। ଖସିଯିବାକୁ ଉଦ୍ୟମ କରି ଆକ୍ରମଣକାରୀ ଅନ୍ୟ ୩ ଜଣଙ୍କୁ ଗୁଳିକରି ହତ୍ୟା କରିଥିଲେ। ସେ ଜଣେ ମହିଳାଙ୍କୁ ପଣବନ୍ଦୀ କରିବା ପରେ ତାଙ୍କୁ ଗୁଳି କରିଥିଲେ। ଗୁରୁତର ଅବସ୍ଥାରେ ମହିଳା ଜଣକ ହସ୍ପିଟାଲରେ ଭର୍ତ୍ତି ହୋଇଛନ୍ତି। ସେହିପରି ମୁଣ୍ଡରେ ଗୁଳିଚୋଟ ଲାଗିଥିବା ଜଣେ ନାବାଳିକାଙ୍କୁ ଗୁରୁତର ଅବସ୍ଥାରେ ହସ୍ପିଟାଲ ନିଆଯାଇଛି। ସନ୍ଦିଗ୍ଧ ଜାସୋନ ନାଇଟେଞ୍ଜଲ୍ (୩୨) କ’ଣ ପାଇଁ ଗୁଳି ଚଳାଇଲେ ତାହା ଜଣାପଡ଼ିନାହିଁ।
