ବାଲେଶ୍ୱର ଅଫିସ,୨୮ା୧୨: ବାଲେଶ୍ବର ଜାତୀୟ ରାଜପଥ ବଣପାରିଆ ଷ୍ଟେଟ୍ ବ୍ୟାଙ୍କ ନିକଟରେ ସୋମବାର ଗୁଳିମାଡ଼ ହୋଇଛି। ଏଥିରେ ଜେସିବି କମ୍ପାନୀର ଆକାଉଣ୍ଟାଣ୍ଟ ଗୁରୁତର ହୋଇ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି। ତେବେ ଏଥିରୁ ଅଳ୍ପକେ ବର୍ତ୍ତିଯାଇଛନ୍ତି ତାଙ୍କ ସିକ୍ୟୁରିଟି ଗାର୍ଡ। ଆଜି ପୂର୍ବାହ୍ନରେ ନିକଟସ୍ଥ ଏକ ଜେସିବି କମ୍ପାନୀର ଆକାଉଣ୍ଟାଣ୍ଟ ଅଶୋକ କୁମାର ଜେନା ଏବଂ ସିକ୍ୟୁରିଟିଗାର୍ଡ ମନୋଜ ଗାଆଣ ଅଫିସରୁ ୬ ଲକ୍ଷ ୨୦ ହଜାର ଟଙ୍କା ବ୍ୟାଗ୍ରେ ଧରି ଅଳ୍ପ ଦୂରରେ ଥିବା ଷ୍ଟେଟ୍ବ୍ୟାଙ୍କକୁ ଯାଉଥିବା ବେଳେ ଏକ କଳା ରଙ୍ଗର ବାଇକ୍ରେ ଆସିି ଦୁଇ ଯୁବକ ତାଙ୍କୁ ଅଟକାଇ ଟଙ୍କା ବ୍ୟାଗ୍ ମାଗିଥିଲେ। ଅଶୋକ ନ ଦେବାରୁ ବନ୍ଧୁକ ଖୋଲି ପ୍ରଥମ ଏକ ରାଉଣ୍ଡ ତାଙ୍କ ଗୁଳି ଉପରକୁ ମାରିଥିଲେ। ପରେ ଦୁର୍ବୃତ୍ତ ଜଣକ ଅଶୋକଙ୍କ ଡାହାଣ ଗୋଡ଼କୁ ଆଉ ଏକ ରାଉଣ୍ଡ ମାରି ଟଙ୍କା ବ୍ୟାଗ ଛଡ଼ାଇ ନେଇ ପଳାଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ଦୁଇଟି ଗୁଳିର ଖୋକାକୁ ଜବତ କରିଛି। ଘଟଣାସ୍ଥଳରେ ବାଲେଶ୍ୱର ସଦର ଏସ୍ଡିପିଓଙ୍କ ସମେତ ଖନ୍ତାପଡ଼ା ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛି।
