ପରଜଙ୍ଗ, ୭ା୭(ଡି.ଏନ୍.ଏ.): ଏକ ହତ୍ୟା ଅଭିଯୋଗରେ ୧୦ବର୍ଷ ଜେଲ୍ରେ ସଜାକାଟି ପାରୋଲରେ ଆସିଥିବା ଜଣେ କଏଦୀଙ୍କୁ ହତ୍ୟା ଉଦ୍ୟମ କରାଯାଇଛି। ୪ଜଣ ବ୍ୟକ୍ତି ତାଙ୍କୁ ଘେରିଯାଇ ଆଖିବୁଜା ଗୁଳିଚାଳନା କରିଛନ୍ତି। କଏଦୀଙ୍କ ଶରୀରରେ ୩ଟି ଗୁଳି ବାଜିଛି। ଢେଙ୍କାନାଳ ଜିଲା ପରଜଙ୍ଗ ଥାନା ବାମ୍ ପଞ୍ଚାୟତ ଅନ୍ତର୍ଗତ ଚାଉଳିଆଝରଣ ଗ୍ରାମରେ ବୁଧବାର ଏଭଳି ଲୋମଟାଙ୍କୁରା ଘଟଣା ଘଟିଥିବାବେଳେ ଗୁରୁତର କଏଦୀ ତଥା ବାଉଁଶମୁଣ୍ଡା ଗ୍ରାମର ଅର୍ଜୁନ ସୋରେନ୍ଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ପୋଲିସ ସୂଚନା ଅନୁଯାୟୀ, ପରକୀୟା ପ୍ରୀତିକୁ ନେଇ ୨୦୧୧ ଅଗଷ୍ଟ ୧୫ରେ ଚାଉଳିଆଝରଣ ଗ୍ରାମରେ ଜଣେ ବ୍ୟକ୍ତିଙ୍କୁ ହତ୍ୟା କରାଯାଇଥିଲା। ଏହି ମାମଲାରେ ଅର୍ଜୁନଙ୍କୁ ଜେଲଦଣ୍ଡ ହୋଇଥିଲା। ସେ ଦୀର୍ଘ ୧୦ବର୍ଷ ହେଲା ଜିଲା କାରାଗାରରେ ସଜା କାଟୁଥିଲେ। ତେବେ କରୋନା ସଂକ୍ରମଣ ବଢ଼ିବାପରେ ଗତବର୍ଷ ଜୁନ୍ ୫ରେ ତାଙ୍କୁ ପାରୋଲରେ ଛଡ଼ାଯାଇଥିଲା। ସେବେଠାରୁ ସେ ଘରେ ଥିଲେ। ବୁଧବାର ଅର୍ଜୁନ କଙ୍କଡ଼ାହାଡ଼ ବ୍ଲକର ଝିଲ୍ଲି ଗ୍ରାମ ସାପ୍ତାହିକ ହାଟରୁ ସଉଦା ନେଇ ଘରକୁ ଫେରୁଥିବାବେଳେ ଚାଉଳିଆଝରଣ ଗ୍ରାମ ନିକଟରେ ୪ଜଣ ବ୍ୟକ୍ତି ତାଙ୍କୁ ଘେରିଯାଇ ଗୁଳିମାଡ଼ କରିଥିଲେ। ଅର୍ଜୁନଙ୍କ ପିଠି, ଅଣ୍ଟା ଏବଂ ହାତରେ ଗୁଳି ବାଜିଛି। ଘଟଣାସ୍ଥଳରେ ଛଟପଟ ହେଉଥିବାବେଳେ ଅଭିଯୁକ୍ତମାନେ ଫେରାର ହୋଇଯାଇଥିଲେ। ସେଠାକାର କେତେଜଣ ଲୋକଙ୍କ ସହାୟତାରେ ତାଙ୍କୁ ୧୦୮ ଆମ୍ବୁଲାନ୍ସରେ ପ୍ରଥମେ କାମାକ୍ଷାନଗର ଏବଂ ଅବସ୍ଥା ସଙ୍କଟାପନ୍ନ ଥିବାରୁ ପରେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ପୂର୍ବଶତ୍ରୁତାକୁ କେନ୍ଦ୍ର କରି ଅର୍ଜୁନଙ୍କୁ ହତ୍ୟା ଉଦ୍ୟମ କରାଯାଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଏ ସଂକ୍ରାନ୍ତରେ ଥାନାରେ ଏକ ମାମଲା ରୁଜୁ ହୋଇଛି। ଅଭିଯୁକ୍ତଙ୍କୁ ଧରିବାକୁ ପୋଲିସ ପକ୍ଷରୁ ଚଢ଼ାଉ ଜାରି ରହିଥିବା ଏସ୍ଡିପିଓ ରଞ୍ଜନ କୁମାର ଦେଓ ସୂଚନା ଦେଇଛନ୍ତି।