ଓସିଜେକ୍ (କ୍ରୋଏସିଆ), ୨୭ା୬ (ପି.ଟି.)-ଚଳିତ ଆଇଏସ୍ଏସ୍ଏଫ୍ ଶୁଟିଂ ବିଶ୍ୱକପ୍ରେ ପ୍ରଭାବୀ ପ୍ରଦର୍ଶନ ଜାରି ରଖି ଭାରତୀୟ ଯୋଡ଼ି ସୌରଭ ଚୌଧାରୀ ଓ ମନୁ ଭାକର ୧୦ ମିଟର ଏୟାର ପିସ୍ତଲ ମିକ୍ସଡ ଟିମ୍ ଇଭେଣ୍ଟରେ ରୌପ୍ୟ ଜିତିଛନ୍ତି। ଶନିବାର ଅନୁଷ୍ଠିତ ଫାଇନାଲରେ ଭାରତୀୟ ଯୋଡ଼ି ରୁଷିଆର ଭିଟାଲିନା ବାତସାରାକ୍ସିନା ଓ ଆର୍ଟେମ ଚେର୍ଣ୍ଣୋସୋଭ୍ଙ୍କଠାରୁ ୧୨-୧୬ରେ ହାରିଯାଇଥିଲେ। ଏହି ଇଭେଣ୍ଟରେ ଭାଗନେଇଥିବା ଅନ୍ୟ ଭାରତୀୟ ଯୋଡ଼ି ଯଶସ୍ବିନୀ ସିଂ ଦେସଓ୍ବାଲ ଓ ଅଭିଷେକ ବର୍ମା ବ୍ରୋଞ୍ଜ ପଦକ ମୁକାବିଲାରେ ହାରିଯାଇଛନ୍ତି। ଇରାନର ଗୋଲ୍ନୋସ୍ ସେବ୍ଘାତୋଲାହି ଓ ଜାଭେଦ ଫୋରୋଘି ସେମାନଙ୍କୁ ୧୭-୭ରେ ହରାଇ ଦେଇଥିଲେ। ଶନିବାର ଭାରତୀୟ ରାଇଫଲ ଶୁଟରମାନଙ୍କ ପାଇଁ ଖରାପ ଦିନ ଥିଲା। ୧୦ମିଟର ଏୟାର ମିକ୍ସଡ ଇଭେଣ୍ଟରେ ଭାରତର ଦୁଇ ଦଳ ଫାଇନାଲ ପ୍ରବେଶରେ ବିଫଳ ହୋଇଥିଲେ। ଇଲାଭେନିଲ ଭାଲାରିଭାନ୍ ଓ ଦିବ୍ୟାଂଶ ସିଂ ପନଓ୍ବାର ଦ୍ୱିତୀୟ କ୍ୱାଲିଫିକେଶନ ରାଉଣ୍ଡରେ କେବଳ ପହଞ୍ଚତ୍ ପାରିଥିଲେ। ଉଭୟେ ମୋଟ ୪୧୬.୧ ପଏଣ୍ଟ ସ୍କୋର ସହ ୬ଷ୍ଠ ସ୍ଥାନରେ ରହିଥିଲେ। ଅଞ୍ଜୁମ ମୋଦଗିଲ୍ ଓ ଦୀପକ କୁମାର ପ୍ରଥମ କ୍ୱାଲିଫାଇଂ ରାଉଣ୍ଡ ଅତିକ୍ରମ କରିବାରେ ବିଫଳ ହୋଇଥିଲେ। ଚୌଧାରୀ ଓ ଭାକର ରୌପ୍ୟ ଜିତିବା ଦ୍ୱାରା ଭାରତର ପଦକ ସଂଖ୍ୟା ୩ରେ ପହଞ୍ଚତ୍ଛି। ଉଭୟ ଶୁଟର ଇତିମଧ୍ୟରେ ଗୋଟିଏ ଲେଖାଏ ବ୍ରୋଞ୍ଜ ଜିତିସାରିଥିଲେ। ଚୌଧାରୀ ପୁରୁଷ ୧୦ ମିଟର ଏୟାର ପିସ୍ତଲ ଇଭେଣ୍ଟରେ ଏକ ବ୍ରୋଞ୍ଜ ଜିତିଥିବା ବେଳେ ଦେସଓ୍ବାଲ ଓ ରାହି ସାର୍ନୋବତ୍ଙ୍କ ସହ ଭାକର ୧୦ ମିଟର ଏୟାର ପିସ୍ତଲ ମହିଳା ଟିମ୍ ଇଭେଣ୍ଟରେ ବ୍ରୋଞ୍ଜ ଜିତିଥିଲେ। ରୁଷିଆ ୩ ସ୍ବର୍ଣ୍ଣ, ସମାନ ସଂଖ୍ୟକ ରୌପ୍ୟ ଓ ଗୋଟିଏ ବ୍ରୋଞ୍ଜ ସହ ପଦକ ତାଲିକାର ଶୀର୍ଷରେ ରହିଛି। ଟୋକିଓ ଅଲିମ୍ପିକ୍ସ ପୂର୍ବରୁ ଭାରତୀୟ ଶୁଟିଂ ଟିମ୍ ପାଇଁ ଏହା ହେଉଛି ଶେଷ ଇଭେଣ୍ଟ।
