ଦିଗପହଣ୍ଡି/କୁକୁଡ଼ାଖଣ୍ଡ/କବିସୂର୍ଯ୍ୟନଗର,୧ା୨: ଗଞ୍ଜାମ ଜିଲାରେ ପୁଣି ୨ଟି ହତ୍ୟାକାଣ୍ଡ ଘଟିଛି। ଦିଗପହଣ୍ଡି ଥାନା ନୂଆ ଅନନ୍ତେଇ ଗ୍ରାମରେ ରବିବାର ରାତିରେ ବାକି ଟଙ୍କା ମାଗିବାରୁ ଜଣେ ପାନ ଦୋକାନୀଙ୍କୁ ପଥରରେ ଛେଚି ହତ୍ୟା କରାଯାଇଛି। ସେହିପରି କବିସୂର୍ଯ୍ୟନଗର ଥାନା ବାଉଁଶିଆ ଗ୍ରାମରେ ଜଣେ ମଦ ବ୍ୟବସାୟୀଙ୍କୁ ଖଣ୍ଡାରେ ଆକ୍ରମଣ କରାଯିବାରୁ ତାଙ୍କର ଜୀବନ ଯାଇଛି।
ସୂଚନା ଯୋଗ୍ୟ, ରବିବାର ରାତିରେ ଦୁଷ୍ମନ୍ତଙ୍କ ଦୋକାନକୁ ୨ଜଣ ଯୁବକ ଆସି ପାଣି ଓ ସିଗାରେଟ ମାଗିଥିଲେ। ଦୁଷ୍ମନ୍ତ ପଇସା ମାଗିବାରୁ ସେମାନେ ପରେ ଦେବେ ବୋଲି କହିଥିଲେ। ଏନେଇ ଯୁକ୍ତିତର୍କ ହୋଇଥିଲା। ପରେ ଦୁଷ୍ମନ୍ତ ଦୋକାନ ବନ୍ଦ କରି ଘରକୁ ଯାଇଥିଲେ। ହେଲେ ବାକି ମାଗିଥିବା ସମ୍ପୃକ୍ତ ୨ ଯୁବକଙ୍କ ସମେତ ୧୦ରୁ ଊଦ୍ଧର୍ବ ବ୍ୟକ୍ତି ବିଭିନ୍ନ ମାରଣାସ୍ତ୍ର ଧରି ଦୁଷ୍ମନ୍ତଙ୍କ ଘର ପାଖକୁ ଯାଇ ଗାଳିଗୁଲଜ କରିଥିଲେ। ପରିବାର ଲୋକେ ପ୍ରତିବାଦ କରିବାରୁ ସେମାନେ ଦୁଷ୍ମନ୍ତଙ୍କୁ ଘରୁ ଟାଣିନେଇ ଲୁହାଛଡ଼ ଓ ଖଣ୍ଡାରେ ଆକ୍ରମଣ କରିବା ସହ ପଥରରେ ଛେଚି ଦେଇଥିଲେ। ଦୁଷ୍ମନ୍ତଙ୍କ ଭାଇ ବିକ୍ରମ ଓ ମା’ ଛଡାଇବାକୁ ଆସିବାରୁ ତାଙ୍କୁ ମଧ୍ୟ ଆକ୍ରମଣ କରିଥିଲେ। ୨ ଭାଇଙ୍କୁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ମେଡିକାଲକୁ ନିଆଯାଇଥିଲା। ଚିକିତ୍ସାଧୀନ ଅବସ୍ଥାରେ ଦୁଷ୍ମନ୍ତଙ୍କ ମୃତ୍ୟୁ ଘଟିଛି। ଦିଗପହଣ୍ଡି ଥାନା ଅଧିକାରୀ ବସନ୍ତ କୁମାର ସେଠୀ, ଚିକିଟି ଏସ୍ଡିପିଓ ସୁରେନ୍ଦ୍ର ନାଥ ମୁର୍ମୁ ସଦଳବଳ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ଏ ନେଇ ନଂ. ୨୨/୨୧ରେ ୧୧ ଅଭିଯୁକ୍ତଙ୍କ ନାଁରେ ମାମଲା ରୁଜୁ ହୋଇଛି। ପୋଲିସ ୨ ଜଣଙ୍କୁ ଅଟକ ରଖି ପଚରାଉଚୁରା ଚଳାଇଛି।ଗାଁ ଠାକୁରାଣୀ ମନ୍ଦିର ଉନ୍ନୟନ କାମକୁ ନେଇ ଆକ୍ରମଣକାରୀ ଓ ଦୁଷ୍ମନ୍ତଙ୍କ ମଧ୍ୟରେ ପୂର୍ବରୁ ଶତ୍ରୁତା ରହିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ସେହିପରି ବାଉଁସିଆ ଗ୍ରାମରେ ମଦ ବ୍ୟବସାୟକୁ ନେଇ ସୁଶାନ୍ତ ବିଶ୍ୱାଳଙ୍କୁ ଖଣ୍ଡାରେ ଆକ୍ରମଣ କରାଯାଇଥିଲା। ତାଙ୍କୁ ପ୍ରଥମେ ପୋଲସରା ଡାକ୍ତରଖାନା ଓ ସେଠାରୁ ବ୍ରହ୍ମପୁର ବଡ଼ ମେଡିକାଲକୁ ପଠାଯାଇଥିଲା। ବିଳମ୍ବିତ ରାତିରେ ତାଙ୍କର ମୃତ୍ୟୁ ଘଟିଛି। ସୁଶାନ୍ତ ଓ ତାଙ୍କ ଶାଳକ (ମାମୁ ଶ୍ୱଶୁରଙ୍କ ପୁଅ) ମିଶି ବାଉଁସିଆ ଗାଁ ଆମ୍ବତୋଟାରେ ଚୋରାରେ ମଦ ବିକ୍ରି କରୁଥିଲେ। ୩ ଜଣ ଦୁର୍ବୃତ୍ତ ରବିବାର ରାତିରେ ମଦ ବିକ୍ରି ହେଉଥିବା କୁଡ଼ିଆ ନିକଟକୁ ଆସି ସୁଶାନ୍ତଙ୍କୁ ଡାକିଥିଲେ। ସୁଶାନ୍ତ ବାହାରକୁ ଆସିବାରୁ ସେମାନେ ଅତର୍କିତ ଭାବେ ଖଣ୍ଡାରେ ଆକ୍ରମଣ କରିଥିଲେ। ଶାଳକ ଏହା ଦେଖି ଦୌଡ଼ିଯାଇ ଘର ଲୋକଙ୍କୁ ଜଣାଇଥିଲେ। ପରିବାର ଲୋକେ ସୁଶାନ୍ତଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଡାକ୍ତରଖାନା ନେଇଥିଲେ ମଧ୍ୟ ତାଙ୍କର ମୃତ୍ୟୁ ଘଟିଛି। ଏ ନେଇ ସୁଶାନ୍ତଙ୍କ ବାପା ସୁରେନ୍ଦ୍ର ବିଶ୍ୱାଳଙ୍କ ଏତଲା ପ୍ରକାରେ କବିସୂର୍ଯ୍ୟନଗର ଥାନାରେ ନଂ.୨୮/୨୧ରେ ଏକ ହତ୍ୟା ମାମଲା ରୁଜୁ ହୋଇଛି।