ସମ୍ବଲପୁର,୩୦ା୧୨(ବ୍ୟୁରୋ): ସମ୍ବଲପୁର ଜିଲାର ସଦର, କୁଚିଣ୍ଡା ଓ ରେଢ଼ାଖୋଲ ଉପଖଣ୍ଡରେ ଧାନ ସଂଗ୍ରହ ଜାରି ରହିଛି। ମଣ୍ଡି ଖୋଲା ରହିଥିବାବେଳେ ଚାଷୀଙ୍କ ପାଖରେ ଅମଳ ଧାନ ମହଜୁଦ ରହିଛି। ହେଲେ ଧାନ ବିକ୍ରି ପାଇଁ ଟୋକନ ଆସି ନ ଥିବାରୁ ଅବିକ୍ରି ହୋଇ ଅମଳ ଧାନ ଖଳାରେ ପଡିରହିଛି। ଟୋକନ ଆସିବା ପରେ ସହାୟକ ମୂଲ୍ୟରେ ଧାନ ବିକ୍ରି କରିବେ ବୋଲି ଚାଷୀମାନେ ଆଶା ବାନ୍ଧି ବସିଛନ୍ତି। କେତେଜଣ ଚାଷୀ ଅନ୍ୟ ଉପାୟ ନ ପାଇ କମ୍ ଦରରେ ଧାନ ବିକ୍ରି କରିବାକୁ ବାଧ୍ୟ ହେଉଛନ୍ତି। ଟୋକନ ପାଇଁ ଚାଷୀମାନେ ସମବାୟ ସମିତି କାର୍ଯ୍ୟାଳୟକୁ ଯାଉଥିଲେ ମଧ୍ୟ ନିରାଶ ହୋଇ ଫେରୁଛନ୍ତି। ଏଭଳି ପରିସ୍ଥିତିରେ ବକେୟା ଧାନ କିଭଳି ବିକ୍ରି ହେବ ସେ ନେଇ ଚାଷୀମାନେ ଚିନ୍ତାରେ ଅଛନ୍ତି।
ପୂର୍ବରୁ ଜିଲାସ୍ତରୀୟ ଧାନ ସଂଗ୍ରହ ବୈଠକରେ ଚାଷୀମାନେ ଟୋକନ ସମସ୍ୟାକୁ ନେଇ ଅଭିଯୋଗ କରିଥିଲେ। ସେ ସମୟରେ ଟୋକନ ସମସ୍ୟା ହେବ ନାହିଁ ବୋଲି ପ୍ରଶାସନ ପ୍ରତିଶ୍ରୁତି ଦେଇଥିଲା। ହେଲେ ବର୍ତ୍ତମାନର ସମସ୍ୟା ଚାଷୀଙ୍କ ମୁଣ୍ଡବ୍ୟଥାର କାରଣ ପାଲଟିଛି। ଉଭୟ ଜଳସେଚିତ ଓ ଅଣଜଳସେଚିତ ଅଞ୍ଚଳର ଚାଷୀମାନଙ୍କ ଏହି ସମସ୍ୟା ରହିଛି। ଚଳତିବର୍ଷ ଭଲ ଧାନ ଅମଳ ହୋଇଥିଲା। ସରକାର ଜଳସେଚିତ ଅଞ୍ଚଳ ପାଇଁ ଏକର ପିଛା ୧୯ ଓ ଅଣଜଳସେଚିତ ଅଞ୍ଚଳ ଲାଗି ୧୩ କୁଇଣ୍ଟାଲ ଧାନ ସଂଗ୍ରହ କରୁଛନ୍ତି। ହେଲେ ଏକର ପିଛା ପ୍ରାୟ ୬ରୁ ୧୦ କୁଇଣ୍ଟାଲ ଧାନ ଚାଷୀ ପାଖରେ ବଳକା ରହୁଛି। ଏହାକୁ ଚାଷୀ କମ୍ ଦରରେ ବିକ୍ରି କରୁଛି। ଏବେ ପଞ୍ଜୀକୃତ ଜମି ଉପରେ ଟୋକନ ଆସି ନାହିଁ। ଜମିର ପରିମାଣ ଅନୁସାରେ ଟୋକନ ନ ଆସିବା ଆଉ ଏକ ସମସ୍ୟା ଛିଡା କରିଛି। ଅନ୍ୟପକ୍ଷେ ଏବେ ରବି ଧାନ ଅମଳ ସମୟ ଆସି ଯାଇଛି। ଚାଷୀମାନେ ରବି ଫସଲ ପାଇଁ ତଳିପକା ଓ ଜୋତ କାମ ଆରମ୍ଭ କରିଦେଇଛନ୍ତି। ଧାନ ବିକ୍ରି କରି ନ ଥିବାରୁ ଚାଷୀ ପାଖରେ ଚାଷ କରିବା ପାଇଁ ଟଙ୍କା ନାହିଁ। ବ୍ୟାଙ୍କ ଓ ମହାଜନଙ୍କ ପାଖରୁ ଆଣିଥିବା ଋଣ ମଧ୍ୟ ପରିଶୋଧ କରି ପାରୁନାହିଁ। ତେଣୁ ଅଯଥାରେ ଋଣ ଉପରେ ସୁଧ ଦେବାକୁ ପଡିବ ବୋଲି ଚାଷୀମାନେ ଅଭିଯୋଗ କରିଛନ୍ତି। ଅନ୍ୟପଟେ ଧାନ ମଣ୍ଡି ଖୋଲିବାର ଏକମାସରୁ ଊର୍ଦ୍ଧ୍ୱ ସମୟ ବିତିଲାଣି। ହେଲେ ଜିଲାରେ ଏବେ ମଧ୍ୟ ୪୫ ପ୍ରତିଶତ ଧାନ ଅବିକ୍ରି ହୋଇ ପଡିରହିଛି। ଶୀଘ୍ର ଟୋକନ ଦେଇ ଧାନ କିଣାଯାଉ ବୋଲି ଚାଷୀମାନେ ଦାବି କରିଛନ୍ତି। ଜିଲାରେ ଟୋକନ ନ ଆସିବାରୁ ଅଭାବୀ ବିକ୍ରିକୁ ସରକାର ଏକପ୍ରକାର ପ୍ରୋତ୍ସାହନ ଦେଉଛନ୍ତି ବୋଲି ଚାଷୀମାନେ ଅଭିଯୋଗ କରିଛନ୍ତି। ଏ ସମ୍ପର୍କରେ ଜିଲା ମୁଖ୍ୟ ଯୋଗାଣ ଅଧିକାରୀ ରାମଚନ୍ଦ୍ର ଟୁଡୁ କହିଛନ୍ତି, ଧାନ କିଣା ଚାଲିଛି। ଚାଷୀଙ୍କ ସ୍ଲାବ୍ ଅନୁସାରେ ଟୋକନ ଆସୁଛି। ଆଗକୁ ଟୋକନ ଆସିବା ସମ୍ଭାବନା ରହିଛି। ଏପର୍ଯ୍ୟନ୍ତ ୧୯ ଲକ୍ଷ ୭୧ ହଜାର କୁଇଣ୍ଟାଲ ଧାନ ସଂଗ୍ରହ ହୋଇସାରିଛି। ବକେୟା ଧାନ ମଧ୍ୟ କିଣାଯିବ ବୋଲି ସେ କହିଥିଲେ।