ଭୁବନେଶ୍ୱର/ଝାରୁସୁଗୁଡ଼ା, ୭ା୪ : ଓଡ଼ିଶାରେ ଦେଖାଦେଲାଣି ଟିକାର ଅଭାବ। ବୁଧବାର ସୁଦ୍ଧା ରାଜ୍ୟରେ ଗଚ୍ଛିତ ଅଛି ୫.୩୪ ଲକ୍ଷ ଟିକା। ପ୍ରତି ଦିନ ୨.୫ ଲକ୍ଷ ଲୋକଙ୍କୁ ଟିକା ଦିଆଯାଉଛି। ଫଳରେ ଆସନ୍ତା ଦୁଇ ଦିନ ପରେ ଗଚ୍ଛିତ ଟିକା ପ୍ରାୟ ଶେଷ ହୋଇଯିବ। ଏଥି ଯୋଗୁ ବାଧା ପ୍ରାପ୍ତ ହେବ ଟିକାକରଣ ପ୍ରକ୍ରିୟା। ଏହା ସହ ଦ୍ୱିତୀୟ ଡୋଜ ନେବାକୁ ଥିବା ବ୍ୟକ୍ତିଙ୍କୁ ଅପେକ୍ଷା କରିବାକୁ ପଡ଼ିବ ବୋଲି ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ କୁହାଯାଇଛି।
କୋଭିଡ୍ ଟିକାକରଣ ପାଇଁ ରାଜ୍ୟରେ ମୋଟ ଉପରେ ୧୪୦୦ କେନ୍ଦ୍ର ଖୋଲା ଯାଇଥିଲା। କିନ୍ତୁ ବର୍ତ୍ତମାନ ଟିକା ଅଭାବରୁ ୬୪୫ଟି ଟିକାଦାନ କେନ୍ଦ୍ର ବନ୍ଦ ହୋଇଗଲାଣି। ଏଣୁ ରାଜ୍ୟକୁ ତୁରନ୍ତ ଟିକା ଯୋଗାଇବା ଲାଗି ରାଜ୍ୟର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନବ କିଶୋର ଦାସ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ଡ. ହର୍ଷ ବର୍ଦ୍ଧନଙ୍କୁ ଚିଠି ଲେଖି ଜଣାଇ ଦେଇଛନ୍ତି।
