ସାରସକଣା,୧୫।୧(ଡି.ଏନ୍.ଏ.): ମୟୂରଭଞ୍ଜ ଜିଲା ଝାରପୋଖରିଆ ଥାନା ଅଧିନସ୍ଥ ଜାମଶୋଳା ନିକଟ ଏକ ଢାବାରେ ଶନିବାର ବିଳମ୍ବିତ ରାତି ପ୍ରାୟ ୧ଟା ସମୟରେ ଗୁଳିକାଣ୍ଡ ଘଟିଛି। ଏଥିରେ ଜଣେ ଗୁରୁତର ହୋଇଥିବା ଜଣାପଡ଼ିଛି।
ମିଳିଥିବା ସୂଚନା ମୁତାବକ, ଝାରଖଣ୍ଡ ଅଞ୍ଚଳର ୪ରୁ ୫ଜଣ ଯୁବକ ଏକ ଚାରିଚକିଆ ଗାଡିରେ ଆସି ଉକ୍ତ ଢାବାରେ ଖାଇବା ପାଇଁ ଅଟକିଥିଲେ। ଖାଇସାରିବା ପରେ ଟଙ୍କା ଦେବା ବଦଳରେ ଟେବୁଲ ଉପରେ ବନ୍ଧୁକ ରଖିଥିଲେ । ଏହାଦେଖି ହୋଟେଲର ସୁଜନ ନାମକ ଯୁବକ ବନ୍ଧୁକଟି ଅସଲି କିମ୍ବା ନକଲି ବୋଲି ପ୍ରଶ୍ନ କରିଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ଫଳରେ ଉକ୍ତ ଯୁବକଙ୍କ ମଧ୍ୟରୁ ଜଣେ ଯୁବକ ସୁଜନଙ୍କ ଛାତିକୁ ଗୋଟିଏ ଗୁଳି ଚଳାଇଥିଲେ। ସଙ୍ଗେସଙ୍ଗେ ଉକ୍ତ ସ୍ଥାନରେ ସୁଜନ ପଡିଯାଇଥିଲେ। ଗୁରୁତର ଅବସ୍ଥାରେ ତାଙ୍କୁ ବାରିପଦା ପିଆର୍ଏମ୍ ଓ ପରେ କଟକ ଏସ୍ସିବି ମେଡିକାଲକୁ ନିଆଯାଇଛି। ଅପରପକ୍ଷେ ହୋଟେଲ ମ୍ୟାନେଜର ରାକେଶ ସାହୁଙ୍କୁ ଅଟକ ରଖାଯାଇ ଅଧିକ ତଦନ୍ତ ଜାରି ରହିଥିବାର ଥାନାଧିକାରୀ ଫନୀନ୍ଦ୍ର ଭୂଷଣ ନାଏକ ପ୍ରକାଶ କରିଛନ୍ତି । ସାଇଣ୍ଟିଫିକ ଟିମ୍ ସହିତ ପୋଲିସ ପହଞ୍ଚି ତଦନ୍ତ ଜାରି ରଖିଛି।
