ନ୍ୟୁୟର୍କ,୧୯।୧୨: ଟୁଇଟର୍ରେ ବାରମ୍ବାର ନୀତି ପରିବର୍ତ୍ତନ ହେତୁ କଡ଼ା ସମାଲୋଚନାର ଶିକାର ହେଉଛନ୍ତି ଟୁଇଟର୍ ମାଲିକ ଏଲନ ମସ୍କ। ଏବେ ସେ ଏହି ସୋସିଆଲ ମିଡିଆ ପ୍ଲାଟଫର୍ମରେ ଏକ ସର୍ଭେ ଆରମ୍ଭ କରିଛନ୍ତି। ଏଥିରେ ସେ ଏହି ମାଇକ୍ରୋ ବ୍ଲଗିଂ ସାଇଟର ଲକ୍ଷ ଲକ୍ଷ ୟୁଜର୍ସଙ୍କୁ ପଚାରିଛନ୍ତି, ମୁଁ ଟୁଇଟର୍ର ସିଇଓ ପଦରୁ ଇସ୍ତଫା ଦେବା ଉଚିତ କି?’ ମତଦାନର ନିଷ୍ପତ୍ତିକୁ ପାଳନ କରିବେ ବୋଲି ମସ୍କ ଟୁଇଟ୍ କରିଛନ୍ତି। ଏଲନ ମସ୍କ ପୂର୍ବରୁ ଅନେକ ଥର ଏପରି ସର୍ଭେ କରିଛନ୍ତି। ୟୁଜର୍ସମାନେ ଏହା ଉପରେ କ’ଣ ମତ ଦେବେ ଏବଂ ମସ୍କ ଏହାକୁ ଗ୍ରହଣ କରେ କି ନାହିଁ ତାହା ଦେଖିବାକୁ ପଡ଼ିବ।
ଅନ୍ୟ ଏକ ଟୁଇଟ୍ରେ ସେ କହିଛନ୍ତି ଯେ, ଟୁଇଟର ପ୍ରମୁଖ ନୀତି ପରିବର୍ତ୍ତନ ପୂର୍ବରୁ ମତଦାନ କରିବେ, ମୁଁ କ୍ଷମା ମାଗୁଛି, ଏହା ଆଉ ଘଟିବ ନାହିଁ।
ସୂଚନାଯୋଗ୍ୟ, ନିକଟରେ ଟୁଇଟର୍ ଘୋଷଣା କରିଥିଲା ଯେ, ଫେସବୁକ, ଇନଷ୍ଟାଗ୍ରାମ ସମେତ ନିର୍ଦ୍ଦିଷ୍ଟ ସୋସିଆଲ ମିଡିଆ ପ୍ଲାଟଫର୍ମକୁ ପ୍ରୋତ୍ସାହିତ କରୁଥିବା ଟୁଇଟର୍ ଆକାଉଣ୍ଟ ଉପରେ ରୋକ ଲଗାଯିବ। ମସ୍କ କହିଛନ୍ତି, ଆମର ଅନେକ ୟୁଜର୍ସ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମରେ ମଧ୍ୟ ସକ୍ରିୟ ଅଛନ୍ତି। କିନ୍ତୁ ବର୍ତ୍ତମାନ ଆମେ ଆଉ ଟୁଇଟର୍ରେ ଅନ୍ୟ ପ୍ଲାଟଫର୍ମର ମାଗଣା ପଦୋନ୍ନତି ପାଇଁ ଅନୁମତି ଦେବୁ ନାହିଁ।