ନୂଆଦିଲ୍ଲୀ,୨ା୩: ଦେଶର ସମସ୍ତ ଏମ୍ପି ଏବଂ ବିଧାୟକମାନଙ୍କ ଉପରେ ଡିଜିଟାଲି ନଜର ରଖିବା ପାଇଁ ସୁପ୍ରିମକୋର୍ଟରେ ଦାଏର ଏକ ଜନସ୍ବାର୍ଥ ମାମଲାକୁ ସିଜେଆଇ ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଖଣ୍ଡପୀଠ ଶୁକ୍ରବାର ଖାରଜ କରିଦେଇଛନ୍ତି। ପ୍ରତିନିଧିମାନେ ନିର୍ବାଚିତ ହେବା ପରେ ଲୋକଙ୍କ ସେବକ ଭାବେ ନୁହେଁ, ବରଂ ଶାସକଙ୍କ ଭଳି ବ୍ୟବହାର ଦେଖାଉଥିବାରୁ ଆବେଦନକାରୀ ଡ. ସୁରିନ୍ଦରନାଥ କୁନ୍ଦ୍ରା ଏଥିରେ ଅସନ୍ତୋଷ ବ୍ୟକ୍ତ କରିଥିଲେ। ଏମ୍ପି, ବିଧାୟକମାନଙ୍କୁ ଲଗାତର ସର୍ଭିଲାନ୍ସରେ ରଖାଗଲେ ବଡିକ୍ୟାମ୍ ଫୁଟେଜ୍ରେ ସେମାନଙ୍କ ଗତିବିଧିକୁ ଯେକୌଣସି ନାଗରିକ ଦେଖିପାରିବେ। ସେହିପରି ନୀତି ସମ୍ପର୍କିତ ସବୁ ସଂସ୍କାରମୂଳକ କାର୍ଯ୍ୟର ନିଷ୍ପତ୍ତି ମତଦାନ ଜରିଆରେ କରାଯାଉ ବୋଲି କୁନ୍ଦ୍ରା ଅଦାଲତଙ୍କୁ ନିବେଦନ କରିଥିଲେ। ସିଜେଆଇ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ତଥା ଜଷ୍ଟିସ୍ ଜେ.ପି. ପରଦିଓ୍ବାଲା ଏବଂ ମନୋଜ ମିଶ୍ରାଙ୍କୁ ନେଇ ଗଠିତ ଖଣ୍ଡପୀଠ ଏହାର ଶୁଣାଣି ବେଳେ ଆବେଦନକାରୀଙ୍କୁ କହିଥିଲେ, ଆଇନପ୍ରଣେତାମାନଙ୍କ ଗତିବିଧି ଉପରେ ୨୪ ଘଣ୍ଟିଆ ନଜର ରଖିବା ପାଇଁ ଅଦାଲତ କ’ଣ ସେମାନଙ୍କ ଶରୀରରେ ଚିପ୍ ଲଗାଇପାରିବେ। କେବଳ ଦୋଷୀ ସାବ୍ୟସ୍ତ ହୋଇଥିବା ଜଣେ ବ୍ୟକ୍ତିଙ୍କୁ ଟ୍ରାକ୍ କରିବା ପାଇଁ ଏହି ପନ୍ଥା ଆପଣାଯାଇପାରେ। ଏମ୍ପି, ବିଧାୟକମାନଙ୍କ ଗୋପନୀୟତା ଅଧିକାର ଅଛି। ସମସ୍ତ ସାଂସଦଙ୍କୁ ଡିଜିଟାଲି ମନିଟର କରିବା ସମ୍ଭବ ନୁହେଁ। ଏଭଳି ଏକ ପ୍ରସଙ୍ଗରେ ନ୍ୟାୟିକ ସମୟର ଦୁରୁପଯୋଗ ଦିଲ୍ଲୀ ବାସିନ୍ଦା ସୁରିନ୍ଦରନାଥଙ୍କୁ ସିଜେଆଇ ଭର୍ତ୍ସନା କରିଛନ୍ତି। ଏଥିସହ ଭବିଷ୍ୟତରେ ଏପରି ଯୁକ୍ତି ବାଢ଼ି ପିଟିଶନ ଦାଖଲ କଲେ ୫ ଲକ୍ଷ ଟଙ୍କା ଜରିମାନା ଦେବାକୁ ପଡ଼ିବ ବୋଲି ସିଜେଆଇ ଚେତାବନୀ ଦେଇଛନ୍ତି।