ଯୋଡ଼ା,୫ା୧୧(ଡି.ଏନ୍.ଏ): କେନ୍ଦୁଝର ଜିଲା ଯୋଡ଼ା ଖଣି ମଣ୍ଡଳ ଅନ୍ତର୍ଗତ ଓ ଏମ୍ଡିସି ଖଣିରୁ ଓଜନଠାରୁ ଅଧିକ ଲୁହାପଥର ପରିବହନ ହେଉଥିବା ୧୨ଟି ଟ୍ରକ୍ ଅଟକ ଘଟଣାରେ ତଦନ୍ତ ଆରମ୍ଭ ହୋଇଛି। ସମ୍ପୃକ୍ତ ଖଣିକୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ଏ ନେଇ ଯୋଡ଼ା ଖଣି ଉପ ନିର୍ଦ୍ଦେଶକ ଦିନେଶ ଅଗ୍ରୱାଲ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଓଏମ୍ଡିସି ଭଦ୍ରାସାହି ଖଣିରୁ ସମ୍ବଲପୁର ସ୍ଥିତ ଶ୍ୟାମ ମେଟାଲକୁ ଲୁହାପଥର ପରିବହନ ହେଉଥିଲା। ପ୍ରତି ଟ୍ରକ୍ରେ ପ୍ରାୟ ଦୁଇ ମେଟ୍ରିକ ଟନ୍ ଲୁହାପଥର ଓଜନଠାରୁ ଅଧିକ ପରିବହନ ହେଉଥିବା ଜଣାପଡ଼ିବା ଅଗ୍ରୱାଲ କହିଛନ୍ତି। ଖଣି ବନ୍ଦ ଥିଲେ ହେଁ, ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଉକ୍ତ ଖଣିରେ ଥିବା ପୁରୁଣା ଉତ୍ତୋଳିତ ଖଣିଜକୁ ପରିବହନ ପାଇଁ ଖଣି ବିଭାଗ ଅନୁମତି ଦେଇଛି। ଖଣି ବିଭାଗ, ଡେପୁଟି ଡାଇରେକ୍ଟର କେମିକାଲ ଅନାଲିସିସ ଓ ଆଇବିଏମ(ଇଣ୍ଡିଆନ ବୁରୋ ଅଫ ମାଇନ୍ସ)ଙ୍କ ମିଳିତ ଭେରି ଫିକେସନ ପରେ ପରିବହନ ଅନୁମୋଦନ ଦିଆଯାଇଛି। ଏହି ଅନିୟମିତତା ସମ୍ପର୍କରେ ନାମକୁ ଗୋପନରେ ରଖି ରୋଇଡ଼ା ଅଞ୍ଚଳର କିଛି ଯୁବକ କହିଛନ୍ତି ଯେ, ଅତୀତରେ ମଧ୍ୟ ଏହିପରି ଖଣିଜ ପରିବହନକୁ ନେଇ ପୋଲିସ ବିଭାଗ ପକ୍ଷରୁ ତଦନ୍ତ ହୋଇଥିଲା। ଘଟଣା ସମ୍ପର୍କରେ ଓଏମ୍ଡିସି ଖଣିର ଅଧିକାରୀ ସରୋଜ ଖଣ୍ଡୁଆଳ କହିଛନ୍ତି ଯେ, ଖଣିର ଓଜନ କଣ୍ଟା ଦେଇ ବିଭିନ୍ନ ସ୍ଥାନକୁ ଖଣିଜ ପରିବହନ ଟ୍ରକ ମାଧ୍ୟମରେ ହୋଇଥାଏ। କଣ୍ଟାରେ କିପରି ତ୍ରୁଟି ହେଲା ଏ ନେଇ କିଛି ଜଣାପଡ଼ିନାହିଁ। ଏ ନେଇ ପୋଲିସ ମଧ୍ୟ ଏହାର ତଥ୍ୟ ସଂଗ୍ରହ କରୁଥିବା ସୂତ୍ରରୁ ଜଣାପଡ଼ିଛି।
