ନୟାଗଡ଼,୧୫।୬(ଲୋକନାଥ ମିଶ୍ର): ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟର ସର୍ଜରୀ ୱାର୍ଡ, ସେଫ୍ଟିକ ୱାର୍ଡ, ମେଡିସିନ ୱାର୍ଡ, ଶିଶୁ ୱାର୍ଡ, ପୁରୁଣା ଆଉଟଡୋରରୁ ୬୦ରୁ ଊର୍ଦ୍ଧ୍ୱ ଏସି ଗାଏବ, ଖତ ଖାଉଛି ୧୫୦ରୁ ଊର୍ଦ୍ଧ୍ୱ ନୂଆ ଓ ପୁରୁଣା ବେଡ, ୨ ହସ୍ପିଟାଲ ମ୍ୟାନେଜରଙ୍କୁ ନିଲମ୍ବନ ଦାବି ସମ୍ପର୍କିତ ଖବର ଧରିତ୍ରୀ ଶିରୋନାମାରେ ଶୁକ୍ରବାର ପ୍ରକାଶ ପାଇଥିଲା। ଏହା ପରେ ପ୍ରଶାସନିକ ସ୍ତରରେ ଆଲୋଡନ ସୃଷ୍ଟି ହୋଇଛି। ଅନ୍ୟପକ୍ଷେ ଏହି ଖବର ଲୋକଲୋଚନକୁ ଆସିବା ପରେ ସାଧାରଣରେ ଉଦ୍ବେଗ ଓ ଅସନ୍ତୋଷ ପ୍ରକାଶ ପ୍ରକାଶ ପାଇଛି। ଦୁଇ ହସ୍ପିଟାଲ ମ୍ୟାନେଜରଙ୍କୁ କାରଣ ଦର୍ଶାଅ ନୋଟିସ୍ ଜାରି ହୋଇଛି। ସେହିପରି ଏସି ଗାଏବ ଘଟଣାର ତଦନ୍ତ କରାଇ କାର୍ଯ୍ୟାନୁଷ୍ଠାନ ନେବାକୁ ମୁଖ୍ୟମନ୍ତ୍ରୀ, ଦୁଇ ଉପମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବଙ୍କୁ ଟୁଇଟ କରାଯାଇଛି। ଏସି ଗାଏବ ଘଟଣା ଚର୍ଚ୍ଚାକୁ ଆସିବା ପରେ ଏହାକୁ ରଫାଦଫା କରିବାକୁ ଦୁଇ ମ୍ୟାନେଜର ଲାଗି ପଡିଥିବା ଅଭିଯୋଗ ଉଠିଲାଣି। ଏସିଗୁଡିକ କିଏ ନେଲା, କାହିଁକି ନେଲା, ପରିମିଶନ ନ ଥାଇ କିପରି ଏସି ନିଆଗଲା ସେନେଇ କେହି ମୁହଁ ଖୋଲୁନାହାନ୍ତି। ଜିଲା ମୁଖ୍ୟ ଚିକିତ୍ସାଳୟର ସୁପରିଣ୍ଟେଣ୍ଡେଣ୍ଟ ଓ ଦୁଇ ହସ୍ପିଟାଲ ମ୍ୟାନେଜର ଏସି ଗାଏବ ଘଟଣାରେ ସମ୍ପୃକ୍ତି ଥିବା ଅଭିଯୋଗ ଥିବାବେଳେ ୩ ଅଧିକାରୀଙ୍କ ନୀରବତା ଅନେକ ପ୍ରଶ୍ନ ଉଠାଉଛି। ଅପରପକ୍ଷେ ଏସି ଗାଏବ ଘଟଣାର ତଦନ୍ତ କରାଯାଉଥିବା ସମ୍ପର୍କରେ ଜିଲା ମୁଖ୍ୟ ଚିକିତ୍ସାଧିକାରୀ(ସିଡିଏମ୍ଓ) ରମାକାନ୍ତ ପଣ୍ଡା କହିଛନ୍ତି।
