ସୋନପୁର,୨୮।୯(ନି.ପ୍ର.): ସୁବର୍ଣ୍ଣପୁର ବନଖଣ୍ଡ ଉଲୁଣ୍ଡା ବନାଞ୍ଚଳ ଅନ୍ତର୍ଗତ ବାଘପାଲି ଜଙ୍ଗଲରେ ବାଘ ଶିକାର ଘଟଣାରେ ଉଲୁଣ୍ଡା ବନାଞ୍ଚଳ ଅଧିକାରୀ ଦିଲୀପ ପ୍ରଧାନଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ସୁବର୍ଣ୍ଣପୁରର ଭାରପ୍ରାପ୍ତ ବନଖଣ୍ଡ ଅଧିକାରୀ(ଡିଏଫଓ) ନୀତିଶ କୁମାର ଏହି ନୋଟିସ୍ ଜାରି କରିଛନ୍ତି। ଅନ୍ୟପକ୍ଷେ ବାଘ ଶିକାର ଘଟଣାରେ ଉଲୁଣ୍ଡା ସଦର ବନପାଳ ପ୍ରସନ୍ନ ନାୟକଙ୍କୁ ଡିଏଫଓ ନିଲମ୍ବନ କରିଛନ୍ତି। ପୂର୍ବରୁ କାର୍ଯ୍ୟରେ ଅବହେଳା ପାଇଁ ପିପଲକଟା ବିଟ୍ର ବନରକ୍ଷୀ ବଳରାମ ନାଏକଙ୍କୁ ନିଲମ୍ବନ କରାଯାଇଥିଲା। ଅନ୍ୟପକ୍ଷେ ବନ ବିଭାଗ ବାଘ ଶିକାର ଘଟଣାକୁ ଗୁରୁତର ସହ ନେଇଛି। ଏହି ଘଟଣାରେ ଅନ୍ୟତମ ଅଭିଯୁକ୍ତ କୋଟସମଲାଇ ଗ୍ରାମର ଧୁବଲେ ଦନାୟକ(୬୨)ଗିରଫ ହୋଇଛନ୍ତି। ଧୁବଲେଙ୍କ ଗିରଫ ପରେ ବାଘ ଶିକାର ଘଟଣାରେ ଅଭିଯୁକ୍ତଙ୍କ ସଂଖ୍ୟା ୭କୁ ବୃଦ୍ଧି ପାଇଛି।
ଚାନ୍ଦିଲି ସଂରକ୍ଷିତ ଜଙ୍ଗଲର ବାଘପାଲି ନିକଟରେ ଗତ ୧୩ ତାରିଖରେ କଲରାପତରିଆ ବାଘର ଗଳିତ ମୃତଦେହ ଉଦ୍ଧାର ହୋଇଥିଲା। ବାର୍ହା ଶିକାର ପାଇଁ ପ୍ରସ୍ତୁତ ବିଦ୍ୟୁତ୍ ଫାଶରେ ପଡି ପ୍ରାପ୍ତ ବୟସ୍କା ମାଈବାଘର ମୃତ୍ୟୁ ହୋଇଥିବା ଜଣାପଡିଥିଲା। ଶବ ଉଦ୍ଧାରର ୪ଦିନ ପୂର୍ବରୁ ବାଘର ପଞ୍ଝା, ନଖ ଓ ଦାନ୍ତକୁ ଦୁର୍ବୃତ୍ତମାନେ କାଟି ନେଇ ଯାଇଥିଲେ। ଅଭିଯୁକ୍ତଙ୍କ ନିକଟରୁ ୪ ପଞ୍ଝା, ୬ଟି ନଖ ଓ ଗୋଟିଏ ଦାନ୍ତ ଉଦ୍ଧାର ହୋଇଥିଲା। ତେବେ ବନବିଭାଗ ଏ ପର୍ଯ୍ୟନ୍ତ ବାଘର ଅନ୍ୟ ଦାନ୍ତ ଓ ୧୦ଟି ନଖ ଉଦ୍ଧାର କରିପାରିନି। ଗ୍ରାମାଞ୍ଚଳରେ ଛୋଟ ପିଲାଙ୍କୁ ବାଘ ନଖ ପିନ୍ଧାଇଲେ ଦେହ ଭଲ ରୁହେ ବୋଲି ବିଶ୍ୱାସ ରହିଛି। ତେଣୁ ବାଘ ମୃତ୍ୟୁ ପରେ ଅଭିଯୁକ୍ତମାନେ ବାଘର ୧୬ଟି ଯାକ ନଖକୁ କାଟି ନେଇଥିଲେ ବୋଲି ପ୍ରାରମ୍ଭିକ ତଦନ୍ତରୁ ଜଣାପଡିଛି। ବାଘ ଶିକାର ପରେ କାର୍ଯ୍ୟରେ ଅବହେଳା ପାଇଁ ଡିଏଫଓ ଉଲୁଣ୍ଡା ବନାଞ୍ଚଳ ଅଧିକାରୀ, ବନପାଳ ଓ ସ୍ଥାନୀୟ ବନରକ୍ଷୀଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଥିଲେ। କାର୍ଯ୍ୟାନୁଷ୍ଠାନ ସ୍ବରୂପ ପ୍ରଥମେ ବନରକ୍ଷୀ ଓ ପରେ ବନପାଳଙ୍କୁ ନିଲମ୍ବନ କରାଯାଇଛି। ଅନ୍ୟ ଅଭିଯୁକ୍ତଙ୍କୁ ଗିରଫ କରିବାରେ ବିଭାଗ ବିଫଳ ହେଲେ ବନାଞ୍ଚଳ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ ବୋଲି ଆଲୋଚନା ହେଉଛି।