ଛତ୍ରପୁର,୧୯।୫(ଡି.ଏନ.ଏ.)-ସ୍କୁଲରେ ଅନୁପସ୍ଥିତ ରହିବା ନେଇ ଗଞ୍ଜାମ ଜିଲାର ୨ ଜଣ ସହକାରୀ ଶିକ୍ଷକଙ୍କୁ ମହଙ୍ଗା ପଡିଛି । ଉକ୍ତ ୨ ଶିକ୍ଷକଙ୍କୁ ଭଞ୍ଜନଗର ବ୍ଲକ ଶିକ୍ଷା ଅଧିକାରୀଙ୍କ ପକ୍ଷରୁ କାରଣ ଦର୍ଶାଅ ନୋଟିସ ଜାରି ହୋଇଛି। ସେମାନେ ହେଲେ ଭଞ୍ଜନଗର ବ୍ଳକ ବଜ୍ରକୋଟ ପ୍ରକଳ୍ପ ଉଚ୍ଚପ୍ରାଥମିକ ସ୍କୁଲର ସହକାରୀ ଶିକ୍ଷକ ଦେବରାଜ ବେହେରା ଓ ବାଇବାଲି ଉନ୍ନିତ ହାଇସ୍କୁଲର ସହକାରୀ ଶିକ୍ଷକ ପୂର୍ଣ୍ଣ ଚନ୍ଦ୍ର ବେହେରା । କାରଣ ଦର୍ଶାଅ ନୋଟିସ ସହ ସ୍କୁଲରେ ଅନୁପସ୍ଥିତ ଥିବା ସେମାନଙ୍କର ଦିନକର ଦରମାକୁ ବନ୍ଦ କରାଯାଇଛି । ଉକ୍ତ ନୋଟିସର ଜବାବ ୭ ଦିନ ମଧ୍ୟରେ ନଦେଲେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବ୍ଲକ ଶିକ୍ଷା ଅଧିକାରୀ ସତର୍କ କରାଇଦେଇଛନ୍ତି। ଏସବୁ କାର୍ଯ୍ୟରେ ଅବହେଳା ଓ ଅନିୟମିତତା ଦର୍ଶାଉଥିବା ଉକ୍ତ ନୋଟିସରେ ବ୍ଲକ ଶିକ୍ଷା ଅଧିକାରୀ ଉଲ୍ଲେଖ କରିଛନ୍ତି ।