ନୂଆଦିଲ୍ଲୀ,୨୨।୧୧: ବହୁଚର୍ଚ୍ଚିତ ଶ୍ରଦ୍ଧା ହତ୍ୟା ମାମଲାରେ ଅଭିଯୁକ୍ତ ଅଫତାବ୍ଙ୍କୁ ମଙ୍ଗଳବାର ଭିଡିଓ କନଫରେନ୍ସିଂ ମାଧ୍ୟମରେ ସାକେତ କୋର୍ଟରେ ହାଜର କରାଯାଇଥିଲା। ଅଫତାବ୍ କୋର୍ଟ ସମ୍ମୁଖରେ ନିଜର ଅପରାଧ ସ୍ବୀକାର କରିବା ସହ କହିଥିଲେ, ଯାହା କରିଛି ତାହା ଭୁଲ। ରାଗରେ ଶ୍ରଦ୍ଧାଙ୍କୁ ହତ୍ୟା କରିଥିଲି। ବର୍ତ୍ତମାନ ପୋଲିସକୁ ତଦନ୍ତରେ ସମ୍ପୂର୍ଣ୍ଣ ସାହାଯ୍ୟ କରୁଛି। ଶ୍ରଦ୍ଧାଙ୍କ ଶରୀରର ଖଣ୍ଡଗୁଡିକ ଫିଙ୍ଗିଥିବା ସ୍ଥାନ ସବୁ ପୋଲିସକୁ କହିଛି। ଆଉ କିଛି ସ୍ଥାନ ମୁଁ ଭୁଲି ଯାଇଛି। କୋର୍ଟରେ ସମସ୍ତ ପ୍ରଶ୍ନ ଉତ୍ତର ସେ କେବଳ ଇଂରାଜୀରେ ଦେଇଥିଲେ।
ଦିଲ୍ଲୀ ପୋଲିସର ଦାବିରେ ସାକେତ କୋର୍ଟ ଅଫତାବ୍ଙ୍କ ରିମାଣ୍ଡକୁ ଚାରି ଦିନ ବୃଦ୍ଧି କରିଛନ୍ତି। ଅଫତାବ ଶ୍ରଦ୍ଧାଙ୍କ ମୃତ ଶରୀରର ଖଣ୍ଡଗୁଡ଼ିକୁ ଫୋପାଡି ଦେଇଥିବା ଜଙ୍ଗଲରେ ପୋଲିସ ପୁଣି ଥରେ ସର୍ଚ୍ଚ ଅପରେଶନ କରିବ ବୋଲି ଜଣାପଡିଛି।
ସୂଚନାଯୋଗ୍ୟ, ଗତ ମେ ମାସରେ ଅଫତାବ୍ ଏହି ହତ୍ୟାକାଣ୍ଡ କରିଥିଲେ। ହତ୍ୟା ପରେ ସେ ନିର୍ଦ୍ଦୟ ଭାବରେ ମୃତ ଶରୀରକୁ ୩୫ ଖଣ୍ଡରେ କାଟି ପ୍ରତିଦିନ ଗୋଟିଏ ପରେ ଗୋଟିଏ ଫୋପାଡି ଦେଉଥିଲେ। ଶ୍ରଦ୍ଧାଙ୍କ ବନ୍ଧୁଙ୍କ ଜରିଆରେ ଏହି ଘଟଣା ସାମ୍ନାକୁ ଆସିଥିଲା। ଏହା ପରେ ଦିଲ୍ଲୀ ପୋଲିସ ଏହି ମାମଲାରେ ଏକ ରଜୁ କରି ହତ୍ୟାକାଣ୍ଡର ଅନୁସନ୍ଧାନ କରିଥିଲା।