ମୁମ୍ବାଇ,୫ା୧୨: ଦିଲ୍ଲୀରେ ଶ୍ରଦ୍ଧା ଓ୍ବାକରଙ୍କୁ ତାଙ୍କ ପ୍ରେମିକ ୩୫ ଖଣ୍ଡ କରି କାଟି ଫିଙ୍ଗିଦେବା ଘଟଣା ଲୋକଙ୍କ ମନରୁ ଲିଭି ନ ଥିବା ବେଳେ ମହାରାଷ୍ଟରେ ଆଉ ଜଣେ ଲିଭ୍ ଇନ୍ରେ ରହୁଥିବା ପ୍ରେମିକ ତାଙ୍କ ପ୍ରେମିକାଙ୍କୁ ଧମକ ଦେଇଛନ୍ତି। ସେ କହିଛନ୍ତି, ଶ୍ରଦ୍ଧାଙ୍କୁ ତାଙ୍କ ପ୍ରେମିକ ୩୫ ଖଣ୍ଡ କରିଥିଲା, ମୁଁ ତୁମକୁ ୭୦ ଖଣ୍ଡ କରିଦେବି।
ମହାରାଷ୍ଟ୍ର ଧୁଲେରେ ଏମିତି ଏକ ଧମକପୂର୍ଣ୍ଣ ଘଟଣା ସାମ୍ନାକୁ ଆସିଛି। ପୀଡ଼ିତା ମହିଳା ପୋଲିସରେ କରିଥିବା ଅଭିଯୋଗରେ ଦର୍ଶାଇଛନ୍ତି ଯେ, ତାଙ୍କ ଲିଭ୍-ଇନ୍ ପାର୍ଟନର ଅର୍ଶଦ ସଲିମଙ୍କ ତାଙ୍କୁ ନିର୍ଯାତନା ଦେଉଛନ୍ତି। ଅର୍ଶଦ ତାଙ୍କୁ କହିଛନ୍ତି, ଯଦି ମୋ’ ଇଚ୍ଛାରେ କାମ ନ କରିବ ତେବେ ଶ୍ରଦ୍ଧାଙ୍କୁ ତାଙ୍କ ପ୍ରେମିକ ୩୫ ଖଣ୍ଡ କରିଥିଲେ, ମୁଁ ତୁମକୁ ୭୦ ଖଣ୍ଡ କରିଦେବି।
ନଭେମ୍ବର ୨୯ରେ ପୋଲିସକୁ ଦେଇଥିବା ଅଭିଯୋଗରେ ଏହା କୁହାଯାଇଛି। ଜୁଲାଇ ୨୦୨୧ରୁ ଦୁହେଁ ଏକାଠି ରହିଆସୁଛନ୍ତି। ମହିଳାଙ୍କ କହିବାନୁସାରେ, ସେ ପୂର୍ବରୁ ଅନ୍ୟ ଜଣେ ବ୍ୟକ୍ତିଙ୍କୁ ବିବାହ କରିଥିଲେ, କିନ୍ତୁ ୨୦୧୯ରେ ଏକ ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଥିଲା। ୨୦୧୭ରେ ତାଙ୍କର ପୂର୍ବ ସ୍ବାମୀଙ୍କଠାରୁ ଏକ ସନ୍ତାନ ମଧ୍ୟ ହୋଇଥିଲା।
ପ୍ରଥମ ସ୍ବାମୀଙ୍କ ମୃତ୍ୟୁ ପରେ ସେ ହର୍ଷଲ ମାଲି ନାମକ ଜଣେ ବ୍ୟକ୍ତିଙ୍କ ସମ୍ପର୍କରେ ଆସିଥିଲେ। ବାସ୍ତବରେ ସେ ହର୍ଷଲ ନ ଥିଲେ ସେ ଥିଲେ ଅର୍ଶଦ ସଲିମ। ସେ ତାଙ୍କୁ ଧୁଲେର ଲାଲିଙ୍ଗ ଗାଁର ଜଙ୍ଗଲକୁ ନେଇ ସେଠାରେ ବଳାତ୍କାର କରିଥିଲେ। ସେ ଏହାର ଏକ ଭିଡିଓ ମଧ୍ୟ କରିଥିଲେ ଏବଂ ପରେ ସେ ଭିଡିଓ ନାମରେ ଧମକ ଦେବା ଆରମ୍ଭ କରିଥିଲେ। ଏହା ପରେ ଦୁହେଁ ଏକାଠି ରହିବାକୁ ସ୍ଥିର କଲେ। ଜୁଲାଇ ୨୦୨୧ରେ ଉଭୟ ଅମାଲନର୍ ଯାଇ ସେଠାରେ ଲିଭ୍ ଇନ୍ରେ ରହୁଥିଲେ। ଏହି ସମୟରେ ଏକ ଆଫିଡେଭିଟ୍ ପ୍ରସ୍ତୁତ କରିଥିଲେ। ତା’ପରେ ସେ ଜାଣିବାକୁ ପାଇଲେ ଯେ, ଏହି ବ୍ୟକ୍ତିଙ୍କ ନାମ ହର୍ଷଲ ମାଲି ନୁହେଁ, ଅର୍ଶଦ ସଲିମ।
ମହିଳା ଜଣକ ପୋଲିସକୁ କହିଛନ୍ତି, ଅଭିଯୁକ୍ତ ଅର୍ଶଦ ତାଙ୍କୁ ଜବରଦସ୍ତ ଧର୍ମାନ୍ତରୀକରଣ କରାଇଥିଲେ। ସେ ତାଙ୍କ ପୁଅକୁ ମଧ୍ୟ ଧର୍ମ ପରିବର୍ତ୍ତନ କରିବାକୁ ଚେଷ୍ଟା କରିଥିଲେ। ଏହି ସମୟରେ ଅର୍ଶଦଙ୍କ ପିତା ମଧ୍ୟ ତାଙ୍କୁ ଧମକ ଦେଇଥିଲେ। ୪ ମାସ ପରେ ଅଭିଯୁକ୍ତ ତାଙ୍କୁ ଭିଟାଭଟ୍ଟି ଅଞ୍ଚଳର ଏକ ଘରକୁ ନେଇ ଯାଇଥିଲେ। ଏଠାରେ ସେ ଚଳିତ ବର୍ଷ ଅଗଷ୍ଟରେ ଏକ ସନ୍ତାନ ଜନ୍ମ ଦେଇଥିଲେ। କୌଣସି କାରଣରୁ ଅର୍ଶଦ ମଧ୍ୟ ସାଇଲେନ୍ସର ସହିତ ତାଙ୍କୁ ଚେଙ୍କ ଦେଇଥିଲେ। ପୋଲିସ ଅର୍ଶଦ ସଲିମଙ୍କ ବିରୋଧରେ ମାମଲା ରୁଜୁ କରି ଘଟଣାର ଅଧିକ ତଦନ୍ତ କରୁଛି।