କିଙ୍ଗଷ୍ଟନ, ୨୨।୭(ପି.ଟି.)- ତାରକା ସ୍ପ୍ରିଣ୍ଟର ଓଡ଼ିଶାର ଶ୍ରାବଣୀ ନନ୍ଦ କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ ପରେ ପ୍ରଥମ ଭାରତୀୟ ଟ୍ରାକ୍ ଆଣ୍ଡ ଫିଲ୍ଡ ଆଥଲେଟଭାବେ କୌଣସି ଏକ ପ୍ରତିଯୋଗିତାରେ ଅଂଶଗ୍ରହଣ କରିଛନ୍ତି। ଜାମାଇକାରେ ସେ ବିଶ୍ୱର କେତେଜଣ ଶ୍ରେଷ୍ଠ ଆଥଲେଟ୍ଙ୍କ ସହ ଏକ ମିଟ୍ରେ ଭାଗ ନେଇଛନ୍ତି। ଜାମାଇକା କଲେଜର ଆଶେନହେମ୍ ଷ୍ଟାଡିୟମରେ ଅନୁଷ୍ଠିତ ଭେଲୋସିଟି ଫେଷ୍ଟରେ ୨୯ ବର୍ଷୀୟା ଶ୍ରାବଣୀ ୧୦୦ ମିଟରରେ ଏମଭିପି ଟ୍ରାକ୍ କ୍ଲବ ପକ୍ଷରୁ ପ୍ରତିନିଧିତ୍ୱ କରିଥିଲେ। ହିଟ୍ ନମ୍ବର-୨ରେ ସେ ୧୧.୭୮ ସେକେଣ୍ଡ ସମୟ ନେଇ ପ୍ରଥମ ହୋଇଥିଲେ। ଓଭରଅଲ୍ ସେ ତୃତୀୟ ସ୍ଥାନ ହାସଲ କରିଥିଲେ। ୧୦୦ ମିଟରରେ ଶ୍ରାବଣୀଙ୍କର ବ୍ୟକ୍ତିଗତ ଶ୍ରେଷ୍ଠ ଟାଇମିଂ ହେଉଛି ୧୧.୪୫ ସେକେଣ୍ଡ ଏବଂ ୨୦୦ ମିଟରରେ ୨୩.୦୭ ସେକେଣ୍ଡ। ୨୦୧୬ ରିଓ ଅଲିମ୍ପିକ୍ସରେ ସେ ଅଂଶଗ୍ରହଣ କରି ନିଜ ହିଟ୍ରେ ୬ଷ୍ଠ ସ୍ଥାନରେ ସନ୍ତୁଷ୍ଟ ରହିଥିଲେ। ୨୦୧୭ ଏସିଆନ ଆଥଲେଟିକ୍ ଚାମ୍ପିୟନଶିପ୍ର ୪x୧୦୦ ମିଟର ରିଲେ ରେସ୍ରେ ବ୍ରୋଞ୍ଜ ପଦକ ଜିତିଥିବା ଭାରତୀୟ ଦଳର ସେ ସଦସ୍ୟା ଥିଲେ। ୨୦୧୬ ସାଉଥ୍ ଏସିଆନ ଗେମ୍ସରେ ସେ ୨୦୦ ମିଟରରେ ସ୍ବର୍ଣ୍ଣ ଏବଂ ୧୦୦ ମିଟରରେ ରୌପ୍ୟ ପଦକ ପାଇଥିଲେ।
ଶ୍ରାବଣୀଙ୍କ ବ୍ୟତୀତ ଭେଲୋସିଟି ଫେଷ୍ଟରେ ଡବଲ ଅଲିମ୍ପିକ୍ ସ୍ପ୍ରିଣ୍ଟ ଚାମ୍ପିୟନ ଇଲାନେ ଥମ୍ପସନ ଓ ଶେଲି-ଆନ୍ ଫ୍ରାସର-ପ୍ରାଇସଙ୍କ ପରି ପ୍ରତିଯୋଗୀ ଭାଗ ନେଇଥିଲେ। ବର୍ତ୍ତମାନର ଅଲିମ୍ପିକ୍ ଚାମ୍ପିୟନ ଥମ୍ପସନ ମଧ୍ୟ ଏମ୍ଭିପି ଟ୍ରାକ୍ କ୍ଲବରୁ ପ୍ରତିନିଧିତ୍ୱ କରୁଥିଲେ। ସେ ୧୧.୧୯ ସେକେଣ୍ଡ ସମୟ ନେଇ ଓଭରଅଲ୍ ବିଜେତା ହୋଇଥିଲେ। ନାଇକ୍ ପକ୍ଷରୁ ପ୍ରତିନିଧିତ୍ୱ କରିଥିବା ଫ୍ରାସର-ପ୍ରାଇସ ମହିଳା ୨୦୦ ମିଟରରେ ୨୨.୭୪ ସେକେଣ୍ଡ ସମୟ ନେଇଥିଲେ। ପୂର୍ବତନ ୧୦୦ ମିଟର ବିଶ୍ୱଚାମ୍ପିୟନ ୟୋହାନ ବ୍ଲାକ୍ ପୁରୁଷ ୨୦୦ ମିଟର ରେସ୍ରେ ୨୨.୭୪ ସେକେଣ୍ଡ ସମୟ ନେଇ ପ୍ରଥମସ୍ଥାନ ଅଧିକାର କରିଥିଲେ। ଗତ ମାର୍ଚ୍ଚପରେ ଭେଲୋସିଟି ଫେଷ୍ଟ ଜାମାଇକାର ପ୍ରଥମ ଟ୍ରାକ୍ ଆଣ୍ଡ ଫିଲ୍ଡ ଇଭେଣ୍ଟ।
ଓ୍ବାଲର୍ଡ ଆଥଲେଟିକ୍ସ(ଆଇଏଏଏଫ) ଅଲିମ୍ପିକ୍ କ୍ୱାଲିଫିକେଶନ ଟୁର୍ନାମେଣ୍ଟକୁ ୨୦୨୦ ନଭେମ୍ବର ପର୍ଯ୍ୟନ୍ତ ସସପେଣ୍ଡ କରିଛି। ଆଥଲେଟିକ୍ ଫେଡେରେଶନ ଅଫ ଇଣ୍ଡିଆ(ଏଏଫଆଇ) ଇଣ୍ଡିଆନ ଗ୍ରାଁ ପ୍ରି ଓ ଫେଡେରେଶନ କପ୍କୁ ବାତିଲ କରିଛି। ଫଳରେ ଅଧିକାଂଶ ଭାରତୀୟ ଆଥଲେଟ୍ ଏବେ କେବଳ ଟ୍ରେନିଂ କରି ଭବିଷ୍ୟତ ପାଇଁ ପ୍ରସ୍ତୁତ ହେଉଛନ୍ତି।
