ଆରଡ଼ି, ୧୯।୭ (ଡି.ଏନ.ଏ.) ଶ୍ରାବଣ ମାସର ପ୍ରଥମ ସୋମବାର ଭଦ୍ରକ ଜିଲା ଆରଡ଼ି ଆଖଣ୍ଡଳମଣି ପୀଠରେ କାଉଡ଼ିଆମାନେ ଜଳଲାଗି କରିଛନ୍ତି। ରବିବାର ଅପରାହ୍ନଠାରୁ ଏଠାରେ ସେମାନଙ୍କର ଭିଡ଼ ହୋଇଥିଲା। ବୋଲ୍ବମ୍ ଧ୍ୱନିରେ ପ୍ରକମ୍ପିତ ହୋଇଥିଲା ଆରଡ଼ି ସମେତ ଏହା ଆଖପାଖ ଅଞ୍ଚଳ। ଚଳିତବର୍ଷ ମନ୍ଦିର ବେଢ଼ା ମଧ୍ୟରେ ନୂତନ ଶ୍ରାବଣୀ ମଣ୍ଡପ ସହ ଶ୍ରାବଣୀ ମହାଦେବଙ୍କ ବିଗ୍ରହ ପ୍ରତିଷ୍ଠା ହୋଇଛି। କାଉଡ଼ିଆମାନେ ପ୍ରଥମଥର ଶ୍ରାବଣୀ ମହାଦେବଙ୍କୁ ଜଳଲାଗି କରିଛନ୍ତି। ପୂର୍ବରୁ ଶ୍ରାବଣୀ ମହାଦେବ ଏକ ସଂକୀର୍ଣ୍ଣ ସ୍ଥାନରେ ଥିବାରୁ ଜଳଲାଗି କରିବାରେ ସମସ୍ୟା ସୃଷ୍ଟି ହେଉଥିଲା। ଏଥର ସୁବିଧାରେ ଜଳଲାଗି କରିଥିବାରୁ କାଉଡ଼ିଆମାନେ ଖୁସିବ୍ୟକ୍ତ କରିଥିଲେ। ତେବେ ଚଳିତବର୍ଷ ପ୍ରାୟ ୨୦ ହଜାର ଭକ୍ତ ଜଳଲାଗି କରିଛନ୍ତି।
କାଉଡ଼ିଆ ଭକ୍ତଙ୍କ ସୁବିଧା ଲାଗି ଜିଲା ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲେ ବି ବିଜୁଳି ବିଭ୍ରାଟ ଦେଖାଯାଇଥିଲା। ଆଲୋକୀକରଣ ବ୍ୟବସ୍ଥାରେ ମଧ୍ୟ ତ୍ରୁଟି ପରିଲକ୍ଷିତ ହୋଇଥିଲା। ପୀଠରେ ଥିବା ହାଇମାଷ୍ଟ ଲାଇଟ ନ ଜଳିବା, ଆରଡ଼ି ପୋଲିସ ଫାଣ୍ଡିଠାରୁ ଡାକ୍ତରଖାନା ଯାଏ ପୀଠ ଅନ୍ଧକାର ରହିବା, କାଉଡ଼ିଆଙ୍କ ଲାଗି ଅସ୍ଥାୟୀ ବିଶ୍ରାମାଗାର ପ୍ରତିଷ୍ଠା ନ ହେବା ନେଇ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିଛନ୍ତି। ପୀଠରେ ପୋଲିସ ବ୍ୟବସ୍ଥାକୁ କଡ଼ାକଡ଼ି କରାଯାଇଥିଲା। ଅତିରିକ୍ତ ଏସ୍ପିଙ୍କ ସହ ୨ଜଣ ଡିଏସ୍ପି, ଧାମନଗର ଏସ୍ଡିପିଓ ବିଜୟ ମହାପାତ୍ର, ଧୂଷୁରୀ ଥାନାଧିକାରିଣୀ ସୁକାନ୍ତି କେରେଇ, ଆରଡ଼ି ଫାଣ୍ଡି ଅଧିକାରୀ ସୁରେନ୍ଦ୍ର କୁମାର ମଲ୍ଲ ପୀଠରେ ଉପସ୍ଥିତ ରହି ସ୍ଥିତି ଉପରେ ନଜର ରଖିଥିଲେ। ଶାନ୍ତିଶୃଙ୍ଖଳା ରକ୍ଷା ପାଇଁ ୧୯ ସେକ୍ସନ ପୋଲିସ ଫୋର୍ସ ମୁତୟନ କରାଯାଇଥିଲା। ଦୁଇବର୍ଷ ପରେ କାଉଡ଼ିଆମାନେ ଶାନ୍ତିଶୃଙ୍ଖଳାର ସହ ଜଳଲାଗି କରିଥିବାରୁ ଭଦ୍ରକ ଉପଜିଲାପାଳ ତଥା ମନ୍ଦିର ମ୍ୟାନେଜିଂ ଟ୍ରଷ୍ଟି ମନୋଜ କୁମାର ପାତ୍ର ଓ ପରିଚାଳକ ବିଦ୍ୟାଧର ପଲାଇ ସମସ୍ତଙ୍କୁ ଧନ୍ୟବାଦ ଜଣାଇଥିଲେ।