ହରିଦ୍ୱାର,୨୧।୫: ହରିଦ୍ବାରଠାରେ ସତ୍ସଙ୍ଗର ପୂର୍ବତନ ଆଚାର୍ଯ୍ୟଦେବ ଶ୍ରୀଶ୍ରୀ ଦାଦା (ଶ୍ରୀଶ୍ରୀ ଅଶୋକ ଚକ୍ରବର୍ତ୍ତୀ)ଙ୍କ ପବିତ୍ର ଅସ୍ଥି ଓ ଚିତାଭସ୍ମ ବିସର୍ଜନ କରାଯାଇଛି। ତାଙ୍କର କନିଷ୍ଠାତ୍ମଜ ପୂଜନୀୟ ଅନିନ୍ଦ୍ୟଦ୍ୟୁତି ଚକ୍ରବର୍ତ୍ତୀ (ପୂଜନୀୟ ବିଙ୍କିଦା)ଙ୍କ ଦ୍ବାରା ହଜାର ହଜାର ସତ୍ସଙ୍ଗୀଙ୍କ ଉପସ୍ଥିତିରେ ଏହି କାର୍ଯ୍ୟକ୍ରମ କରାଯାଇଛି। ଶୁକ୍ରବାର ସକାଳେ ଶ୍ରୀଶ୍ରୀଦାଦାଙ୍କ ଅସ୍ଥି ଓ ଚିତାଭସ୍ମ ଧରି ପୂଜନୀୟ ବିଙ୍କିଦା’ ହରିଦ୍ବାରରେ ପହଞ୍ଚିଥିଲେ। ଏହାପରେ ବୈଦିକ କର୍ମକାଣ୍ଡ ଅନୁସାରେ ଗଙ୍ଗା ନଦୀକୂଳରେ ଶ୍ରାଦ୍ଧକର୍ମାଦି ସମାପନ ହୋଇଥିଲା। ପରେ ଶ୍ରୀଶ୍ରୀଦାଦାଙ୍କ ଚିତାଭସ୍ମ ଗଙ୍ଗାନଦୀର ବ୍ରହ୍ମକୁଣ୍ଡରେ ବିସର୍ଜନ କରାଯାଇଥିଲା। ଭାରତ ସେବାଶ୍ରମ ସଂଘର ସ୍ବୀକୃତିପ୍ରାପ୍ତ ପୁରୋହିତ ଅଭିନବ ଶାସ୍ତ୍ରୀ ଓ ଅଭିନବ ସିଦ୍ଧାର୍ଥ ଶାସ୍ତ୍ରୀ ବିସର୍ଜନ ପୂଜାବିଧି ସମାପ୍ତ କରିଥିଲେ।
ଏହାପରେ ବ୍ୟାସଗାଦି, ପ୍ରୟାଗରାଜ, ବାରାଣସୀ, କାବେରୀ, ସାଗରସଙ୍ଗମ, କନ୍ୟାକୁମାରୀ, ନର୍ମଦା, ଗୋଦାବରୀ, ଦ୍ବାରିକା, ପୁରୀ ମହୋଦଧି, ସିନ୍ଧୁନଦୀ, ବ୍ରହ୍ମପୁତ୍ର, ବାଂଲାଦେଶର ପାବନାସ୍ଥିତ ପଦ୍ମାନଦୀରେ ମଧ୍ୟ ଚିତାଭସ୍ମ ବିସର୍ଜନ ହେବାର କାର୍ଯ୍ୟକ୍ରମ ରହିଛି।
