ପୁରୀ ଅଫିସ, ୯ା୧୨:ପବିତ୍ର ମାର୍ଗଶିର ମାସ ଶେଷ ଗୁରୁବାର ପୁରୀରେ ଶ୍ରୀଉତ୍ସବ ପାଳିତ ହୋଇଛି। ଲକ୍ଷ୍ମୀପୁରାଣର ବିଶ୍ୱବ୍ୟାପୀ ପ୍ରଚାର ଓ ପ୍ରସାର କରିବା ଉଦ୍ଦେଶ୍ୟରେ ଶ୍ରୀମନ୍ଦିର ପଶ୍ଚିମଦ୍ୱାରସ୍ଥିତ ଶ୍ରୀଗୌରଗୋପାଳ ଆଶ୍ରମଠାରେ ଏହି ଉତ୍ସବ ପାଳନ କରାଯାଇଛି। ମହିଳାମାନେ ଶ୍ରୀମନ୍ଦିରରେ ମହାଲକ୍ଷ୍ମୀଙ୍କୁ ପୂଜାର୍ଚ୍ଚନା ସାରି ଏକାଠି ଲକ୍ଷ୍ମୀପୁରାଣ ପାଠ କରିଥିଲେ। ସମାଜସେବୀ ଚିଦାତ୍ମିକା ଖଟୁଆ ପ୍ରଦୀପ ପ୍ରଜ୍ଜଳନ କରି ଉତ୍ସବକୁ ଶୁଭାରମ୍ଭ କରିଥିଲେ। ପୁରୀର ବୋହୂମାନେ ମହାଲକ୍ଷ୍ମୀଙ୍କ ପୂଜା, ଆରତି ଓ ବନ୍ଦାପନା କରିବା ପରେ ଲକ୍ଷ୍ମୀ ପୁରାଣ ପାଠ କରିଥିଲେ। ଏହି ଉତ୍ସବ ଗତ ପାଞ୍ଚବର୍ଷ ଧରି ରାଜ୍ୟର ବିଭିନ୍ନ ଜିଲାରେ ପାଳିତ ହୋଇଆସୁଛି। ନୃତ୍ୟଶିଳ୍ପୀ ରୋଜାଲିନ୍ ପଣ୍ଡା, ବର୍ଷାରାଣୀ, ଉଷାରାଣୀ, ସୁକାନ୍ତି ବେହେରା, ସୋନାଲି, ବେବିନା, ଶୁଭଲକ୍ଷ୍ମୀ ଦାସ, ପୁଷ୍ପାଞ୍ଜଳି ଦାସ, ରଶ୍ମିତା ଗୁରୁ, ମୋନାଲିସା ଶ୍ରୀଚନ୍ଦନ ପ୍ରମୁଖ ଏହି ଉତ୍ସବରେ ଅଂଶଗ୍ରହଣ କରିଥିଲେ। ଶ୍ରୀଜଗନ୍ନାଥ ଐତିହ୍ୟ ଓ ସାଂସ୍କୃତିକ ପରିଷଦର ନିର୍ଦ୍ଦେଶକ ଗୁରୁ କୁମାର ଭୀମସେନ୍, ଶ୍ରୀଉତ୍ସବ କମିଟି ଉପଦେଷ୍ଟା ପିନାକୀ ମହାନ୍ତି, ଅରବିନ୍ଦ ଅଗ୍ରୱାଲ, ବିଶ୍ୱଶାନ୍ତି ତ୍ରିପାଠୀ ଏବଂ ରାଜକିଶୋର ଦାସ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ ।