ଭୁବନେଶ୍ୱର,୨୮।୫(ବ୍ୟୁରୋ): କେ-ପପ୍ ବା କୋରିଆନ ପପ୍ ସଙ୍ଗୀତକୁ ନେଇ ବିଶ୍ୱ ଯୁବପିଢିଙ୍କ ମଧ୍ୟରେ ଭିନ୍ନ କ୍ରେଜ୍ ରହିଛି। ସାରା ବିଶ୍ୱରେ ପପ୍ ସଙ୍ଗୀତପ୍ରେମୀଙ୍କ ସଂଖ୍ୟା ବଢ଼ି ଚାଲିଥିବାବେଳେ ଏଥିସହ ଯୋଡି ହୋଇଯାଇଛି ଓଡ଼ିଶା। କାରଣ ଓଡ଼ିଶାର ଝିଅ ଶ୍ରେୟା ଲେଙ୍କା ଏବେ କେ-ପପ୍ର ନୂଆ ଗ୍ରୁପ୍ ବ୍ଲାକ୍ ସ୍ବାନ୍ରେ ସାମିଲ ହେବାକୁ ଯାଉଛନ୍ତି। ବିଶ୍ୱ ସ୍ତରୀୟ ଅଡିଶନରେ ସେ ମନୋନୀତ ହୋଇଛନ୍ତି। ଏହି ଗ୍ରୁପ୍ରେ ସାମିଲ ହେବାରେ ଶ୍ରେୟା ହେଉଛନ୍ତି ପ୍ରଥମ ଭାରତୀୟ। ତାଙ୍କ ସହ ବ୍ରାଜିଲର ଝିଅ ଗାବ୍ରିଏଲା ଡାଲ୍ସିନ୍ ରହିଛନ୍ତି।
ବ୍ଲ୍ାକ୍ ସ୍ବାନ୍ର ସବୁଠୁ ପୁରୁଣା ସଦସ୍ୟ ହେମେ କୌଣସି କାରଣରୁ ଗତ ୨୦୨୦ ନଭେମ୍ବରରେ ଗ୍ରୁପ୍ ଛାଡିଥିଲେ। ଏହାପରେ ଗ୍ରୁପ୍ ପ୍ରମୋଟର ଡିଆର୍ ମ୍ୟୁଜିକ୍ ଗତବର୍ଷ ମେ’ରେ ଉକ୍ତ ପଦ ପାଇଁ ବିଶ୍ୱସ୍ତରୀୟ ଅଡିଶନ୍ ଘୋଷଣା କରିଥିଲା। ଏଥିରେ ୯୦୦୦ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଶେଷ ୧୯ ଜଣଙ୍କ ମଧ୍ୟରୁ ଶ୍ରେୟା ଓ ଗାବ୍ରିଏଲାଙ୍କୁ ଚୟନ କରାଯାଇଛି। ୟୁଟ୍ୟୁବ୍ ମାଧ୍ୟମରେ ଏହି ଅଡିଶନ ହୋଇଥିଲା। ତେବେ ଉକ୍ତ ମ୍ୟୁଜିକ୍ ଗ୍ରୁପ୍ ଏହି ୨ଜଣଙ୍କ ନାମକୁ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ଘୋଷଣା କରିଛି। ୧୮ ବର୍ଷୀୟା ଓଡ଼ିଆ ଝିଅ ଶ୍ରେୟା ଓ ୧୯ ବର୍ଷୀୟା ବ୍ରାଜିଲ ଝିଅ ଗାବ୍ରିଏଲା ବର୍ତ୍ତମାନ ସିଓଲିରେ କିଛିମାସ ଅଭ୍ୟାସ କରିବେ। ସେମାନଙ୍କୁ ଭୋକାଲ୍, ରାପ୍, ନୃତ୍ୟ, ଭାଷା ଏବଂ ମ୍ୟୁଜିକାଲ ଇନ୍ଷ୍ଟ୍ରୁମେଣ୍ଟ ଆଦି ଶିକ୍ଷା ଦିଆଯାଉଛି।
ଶ୍ରେୟା ପିଲାଦିନରୁ କଳା, ଯୋଗ ପ୍ରତି ଉତ୍ସାହ ରଖିଥିଲେ। ସେ ପ୍ରଥମେ ଓଡ଼ିଶୀରୁ ନୃତ୍ୟ ଶିକ୍ଷା ଆରମ୍ଭ କରିଥିଲେ। ଆର୍ଥିକ ସମସ୍ୟା ଯୋଗୁ ତାଙ୍କୁ ନୃତ୍ୟ ଶିକ୍ଷା ଛାଡ଼ିବାକୁ ପଡ଼ିଥିଲା। ତେବେ ୫ବର୍ଷ ପୂର୍ବେ ଏକ ଲୋକପ୍ରିୟ ଡ୍ୟାନ୍ସ ରିଆଲିଟି ଶୋ’ ବିଗି ୱଗି ହିପ୍ ହପ୍ ୨୦୦୯ର ବିଜେତା ମଦନ ମୋହନ ପୁର୍ତ୍ତିଙ୍କ ନିର୍ଦ୍ଦେଶନାରେ ନୃତ୍ୟ ତାଲିମ ପାଇଁ ନାମ ଲେଖାଇଥିଲେ। ଶ୍ରେୟାଙ୍କ ଆର୍ଥିକ ଅବସ୍ଥା ଜାଣିବା ପରେ ପୂର୍ତ୍ତି ତାଙ୍କୁ ମାଗଣା ନୃତ୍ୟ ଶିକ୍ଷା ଦେଇଥିଲେ।