ବିଶୋଇ, ୩।୧୦(ଡି.ଏନ.ଏ.): ଇଣ୍ଡିଆ ବୁକ ଅଫ୍ ରେକଡର୍ସ ପରେ ଇଣ୍ଟରନ୍ୟାଶନାଲ ବୁକ୍ ଅଫ ରେକଡ୍ସରେ ସ୍ଥାନ ପାଇ ଗୌରବ ଆଣିଛନ୍ତି ମୟୂରଭଞ୍ଜର କୁନି ଝିଅ ଶ୍ରେୟାଂସୀ ମହାନ୍ତ। ରରୁଆଁ ବ୍ଲକର ଘାଗରାବେଡା ପଞ୍ଚାୟତ ବାଟିସାହି ଗ୍ରାମର ଶ୍ରେୟାଂସୀଙ୍କୁ ମାତ୍ର ୩ବର୍ଷ। ଜାତୀୟ ଓ ପାରମ୍ପରିକ ପ୍ରତୀକ, ଆକୃତି, ମାନବର ବିଭିନ୍ନ ଅଙ୍ଗ, ବନ୍ୟଜନ୍ତୁ, ପକ୍ଷୀ, ବିଭିନ୍ନ ଦେଶର ଜାତୀୟ ପତାକା, ଗାଣିତିକ ପ୍ରତୀକ, ଉଦ୍ଭିଦର ବିଭିନ୍ନ ଅଂଶ ଅତିସହଜରେ ଚିହ୍ନଟ କରିବା ସହିତ ୧୨ଟି ମାସର ନାମ, ସପ୍ତାହର ୭ଦିନ, ସପ୍ତର୍ଷିମଣ୍ଡଳ, ଗ୍ରହ, ଫଳ, ପନିପରିବା, ଭାରତୀୟ ମୁଦ୍ରା ଆଦି ଅନର୍ଗଳ ଭାବରେ ଉଚ୍ଚାରଣ କରି ଇଣ୍ଟରନ୍ୟାଶନାଲ ବୁକ୍ ଅଫ ରେକଡ୍ସର୍ର୍ରେ ସ୍ଥାନ ପାଇଛନ୍ତି। ଇଣ୍ଟରନ୍ୟାଶନାଲ ବୁକ ଅଫ୍ ରେକଡ୍ସର୍ର୍ର ଏଡିଟୋରିଆଲ ବୋର୍ଡ ଦ୍ୱାରା ମନୋନୀତ ହୋଇ ଇଣ୍ଟରନ୍ୟାଶନାଲ ବୁକ ଅଫ୍ ରେକଡର୍ସ ‘ସୁପର ଟ୍ୟାଲେଣ୍ଟେଡ କିଡ୍- ୨୦୨୧ ୱାନ ଇନ ଏ ମିଲିୟନ’ ଶୀର୍ଷକରେ ଶ୍ରେୟାଂସୀଙ୍କ ନାମ ଘୋଷଣା କରାଯାଇଛି। ସୁବ୍ରତ ମହାନ୍ତ ଓ ତୃପ୍ତିଲତାଙ୍କ ଏକମାତ୍ର ଝିଅ ଶ୍ରେୟାଂସୀ ଇଣ୍ଟରନ୍ୟାଶନାଲ ବୁକ ଅଫ୍ ରେକଡ୍ସର୍ର୍ର ପ୍ରଥମ ପର୍ଯ୍ୟାୟରେ ଯୋଗ୍ୟ ବିବେଚିତ ହେବା ପରେ ଗତ ୨୩ ଅଗଷ୍ଟରେ ଚୂଡାନ୍ତ ଭିଡିଓ ଟିମ୍କୁ ପଠାଇଥିଲେ। ଶ୍ରେୟାଂସୀ ଏଥିରେ ଯୋଗ୍ୟ ବିବେଚିତ ହୋଇ ସେପ୍ଟେମ୍ବର ୪ରେ ଇଣ୍ଟରନ୍ୟାଶନାଲ ବୁକ୍ ଅଫ ରେକଡ୍ସର୍ର୍ରେ ତାଙ୍କ ନାମ ଘୋଷଣା କରାଯାଇଛି। ଶ୍ରେୟାଂସୀଙ୍କ ବାପା ସୁବ୍ରତ ମହାନ୍ତ ନୂଆଦିଲ୍ଲୀରେ ଆଇଟିବିପିର ପାରା ମେଡିକାଲ ବିଭାଗରେ କାର୍ଯ୍ୟରତ।