ବିଶୋଇ,୨ା୪(ଡି.ଏନ.ଏ.): ମାତ୍ର ୨ ବର୍ଷ ୭ ମାସ ବୟସରେ ପ୍ରଥମେ ଇଣ୍ଡିଆ ବୁକ୍ ଅଫ୍ ରେକର୍ଡସଓ ୩ ବର୍ଷ ବୟସରେ ଇଣ୍ଟରନ୍ୟାଶନାଲ ବୁକ୍ ଅଫ୍ ରେକର୍ଡସରେ ସ୍ଥାନ ପାଇବା ପରେ ଚଳିତ ୨୦୨୨ ବର୍ଷରେ ପୁଣି ଥରେ ୟୁନିଭର୍ସାଲ ୱାଲର୍ଡ ରେକର୍ଡସରେ ସ୍ଥାନ ପାଇଛନ୍ତି ମୟୂରଭଞ୍ଜର କୁନି ଝିଅ ଶ୍ରେୟାଂଶୀ ମହାନ୍ତ। ରରୁଆଁ ବ୍ଲକ ଘାଗରାବେଡ଼ା ପଞ୍ଚାୟତ ବାଟିସାହି ଗ୍ରାମର ଶ୍ରେୟାଂସି ମାତ୍ର ୩ ବର୍ଷ ୩ ମାସ ବୟସରେ ଜାତୀୟ ଓ ପାରମ୍ପରିକ ପ୍ରତୀକ,ଆକୃତି,ମାନବର ବିଭିନ୍ନ ଅଙ୍ଗ, ବନ୍ୟଜନ୍ତୁ, ପକ୍ଷୀ, ବିଭିନ୍ନ ଦେଶର ଜାତୀୟ ପତାକା, ଗାଣିତିକ ପ୍ରତୀକ, ଉଦ୍ଭିଦର ବିଭିନ୍ନ ଅଂଶ, ଦେଶର ଜାତୀୟ ପତାକା ଅତି ସହଜରେ ଚିହ୍ନଟ କରିବା ସହିତ ୧୨ ମାସର ନାମ, ଦେଶର ରାଜଧାନୀ, ସପ୍ତାହର ୭ ଦିନ, ସପ୍ତର୍ଷି ମଣ୍ଡଳ,ଗ୍ରହ,ଫଳ,ପନିପରିବା,ଭାରତୀୟ ମୁଦ୍ରା,ମଣିଷର ଆଭ୍ୟନ୍ତରୀଣ ଅଙ୍ଗ ଆଦି ଅନର୍ଗଳ ଭାବରେ ଉଚ୍ଚାରଣ କରି ପ୍ରତିଭା ଦେଖାଇ ୟୁନିଭର୍ସାଲ ୱାଲର୍ଡ ରେକର୍ଡସରେ ନିଜର ସ୍ଥାନ ପକ୍କା କରିଛନ୍ତି। ଏନେଇ ୟୁନିଭର୍ସାଲ ୱାଲର୍ଡ ରେକର୍ଡସର ଏଡିଟରିଆଲ ବୋର୍ଡ ଦ୍ୱାରା ମନୋନୀତ ହୋଇ ୟୁନିଭର୍ସାଲ ୱାଲର୍ଡ ରେକର୍ଡସର ‘ଷ୍ଟାର କିଡ୍ ଆୱାର୍ଡ’ ଶୀର୍ଷକରେ ଶ୍ରେୟାଂଶୀଙ୍କ ନାମ ଘୋଷଣା କରଯାଇଛି। ସୁବ୍ରତ ମହାନ୍ତ ଓ ତୃପ୍ତିଲତାଙ୍କ ଏକମାତ୍ର ଝିଅ ଶ୍ରେୟାଂଶୀ ଗତ ଫେବୃୟାରୀରେ ନିଜର ଦକ୍ଷତା ସମ୍ପନ୍ନ ଭିଡିଓ ୟୁନିଭର୍ସାଲ ୱାଲର୍ଡ ରେକର୍ଡସ ଟିମ୍ ନିକଟକୁ ପଠାଇଥିଲେ। ପରେ ୨୩ ମାର୍ଚ୍ଚରେ ଶ୍ରେୟାଂସିଙ୍କ ନାମ ଘୋଷଣା କରାଯିବା ସହିତ ତାଙ୍କୁ ମେଡାଲ ଓ ପ୍ରମାଣପତ୍ର ପ୍ରଦାନ କରାଯାଇଛି। ଶ୍ରେୟାଂଶୀଙ୍କ ବାପା ସୁବ୍ରତ ମହାନ୍ତ ଅର୍ଦ୍ଧ ସାମରିକ ବାହିନୀର ଭାରତ-ତିବ୍ବତ ସୀମା ପୋଲିସ (ଆଇଟିବିପି)ନୂଆଦିଲ୍ଲୀଠାରେ ପାରା ମେଡିିକାଲ ବିଭାଗରେ କାର୍ଯ୍ୟରତ। ଶ୍ରେୟାଂଶୀ ନିଜ ଅଭିଭାବକଙ୍କ ସହିତ ବର୍ତ୍ତମାନ ଦିଲ୍ଲୀରେ ରହୁଛନ୍ତି। ଅଳ୍ପ ବୟସରୁ ପାଠ ପଢ଼ିବାରେ ରୁଚି ରଖିବା ସହିତ ନିଜର ବିଚକ୍ଷଣ ସ୍ମରଣ ଶକ୍ତି ପାଇଁ ସେ ଏହି ସଫଳତା ପାଇ ପାରିଛନ୍ତି। ତେବେ ବର୍ତ୍ତମାନ ସେ ଲିମ୍କା ବୁକ୍ ଅଫ୍ ରେକର୍ଡସରେ ସ୍ଥାନ ପାଇବା ପାଇଁ ପ୍ରୟାସ ଜାରି ରଖିଛନ୍ତି।