କୋଲକାତା,୧୬।୨: ଆଗାମୀ ଆଇପିଏଲ ପାଇଁ ମିଡ୍ଲ ଅର୍ଡର ବ୍ୟାଟର ଶ୍ରେୟାସ ଆୟାରଙ୍କୁ ଅଧିନାୟକ ଭାବେ ନିଯୁକ୍ତ କରିଛି କୋଲକାତା ନାଇଟ୍ ରାଇଡର୍ସ (କେକେଆର୍)। ଏ ନେଇ ଫ୍ରାଞ୍ଚାଇଜ ପକ୍ଷରୁ ବୁଧବାର ଘୋଷଣା କରାଯାଇଛି। ବେଙ୍ଗାଲୁରୁରେ ଆୟୋଜିତ ମେଗା ଅକଶନରେ ତାଙ୍କୁ ୧୨.୨୫ କୋଟି ଟଙ୍କାରେ କିଣିଥିଲା କୋଲକାତା।
ତାଙ୍କ ପାଖରେ ଆଇପିଏଲରେ ନେତୃତ୍ୱ ନେବାର ଅଭିଜ୍ଞତା ରହିଛି। ସେ ୨୦୧୯ ଓ ୨୦୨୦ରେ ଦିଲ୍ଲୀ କ୍ୟାପିଟାଲ୍ସ (ଡିସି) ଦଳର ଅଧିନାୟକ ଥିଲେ। ତାଙ୍କ ନେତୃତ୍ୱରେ ଦିଲ୍ଲୀ ପ୍ରଥମ ଥର ପାଇଁ ୨୦୨୦ରେ ଆଇପିଏଲ ଫାଇନାଲ ଖେଳିଥିଲା। କିନ୍ତୁ ଆହତ ଜନିତ ସମସ୍ୟା କାରଣରୁ ୨୦୨୧ ଆଇପିଏଲର ପ୍ରାରମ୍ଭିକ ପର୍ଯ୍ୟାୟରେ ସେ ଖେଳିପାରି ନ ଥିଲେ। ଏଥିଯୋଗୁ ତାଙ୍କ ବଦଳରେ ରିଷଭ ପନ୍ତଙ୍କୁ ଦିଲ୍ଲୀ ଦଳର ଅଧିନାୟକ କରାଯାଇଥିଲା। ୟୁଏଇରେ ଖେଳାଯାଇଥିବା ଦ୍ୱିତୀୟ ଲେଗ୍ରେ ସେ ଦଳକୁ ଫେରିଥିଲେ। ହେଲେ ଡିସି ରିଷଭ ପନ୍ତଙ୍କୁ ଅଧିନାୟକ ପଦରେ ବଜାୟ ରଖିବାକୁ ନିଷ୍ପତ୍ତି ନେଇଥିଲା। ଏଣୁ ଚଳିତ ବର୍ଷ ଆଇପିଏଲ୍ ଲାଗି ଶ୍ରେୟାସଙ୍କୁ ରିଟେନ କରି ନ ଥିଲା ଦିଲ୍ଲୀ ଫ୍ରାଞ୍ଚାଇଜ। ଏବେ ଶ୍ରେୟାସ ଇଂଲଣ୍ଡର ସୀମିତ ଓଭର ଦଳର ଅଧିନାୟକ ଇଆନ ମୋର୍ଗାନଙ୍କ ସ୍ଥାନ ନେବେ। ତାଙ୍କ ନେତୃତ୍ୱରେ କେକେଆର୍ ଗତ ବର୍ଷ ଫାଇନାଲରେ ପହଞ୍ଚିଥିଲା।
ଦଳର ନେତୃତ୍ୱ ଗ୍ରହଣ କରିବା ପରେ ଶ୍ରେୟାସ କହିଛନ୍ତି, କେକେଆର ଭଳି ସମ୍ମାନଜନକ ଦଳର ନେତୃତ୍ୱ ନେବାର ସୁଯୋଗ ପାଇ ମୁଁ ଗର୍ବିତ। ଆଇପିଏଲ ଏଭଳି ଏକ ଟୁର୍ନାମେଣ୍ଟ, ଯେଉଁଥିରେ ବିଶ୍ୱର ଶ୍ରେଷ୍ଠ ଖେଳାଳିମାନେ ଖେଳନ୍ତି। ପ୍ରତିଭାଶାଳୀ ଖେଳାଳିଙ୍କ ଗ୍ରୁପ୍ର ନେତୃତ୍ୱ ନେବା ପାଇଁ ମୁଁ ଉତ୍ସାହିତ। ମୋତେ ସୁଯୋଗ ଦେବା ପାଇଁ ମାଲିକ, ମ୍ୟାନେଜମେଣ୍ଟ ଓ ସପୋର୍ଟ ଷ୍ଟାଫଙ୍କୁ ଧନ୍ୟବାଦ।
