ନୂଆଦିଲ୍ଲୀ,୧୫।୫: ଭାରତୀୟ କ୍ରିକେଟ ଟିମ୍ର ମିଡିଲ୍ ଅର୍ଡର ବ୍ୟାଟ୍ସମ୍ୟାନ୍ ଶ୍ରେୟସ ଆୟର ଫିଟ୍ ହେବାରେ ବିଳମ୍ବ ହେବ। ଇଂଲଣ୍ଡ ବିପକ୍ଷ ସୀମିତ ଓଭର ସିରିଜ୍ ବେଳେ ତାଙ୍କ କାନ୍ଧରେ ଆଘାତ ଲାଗିଥିଲା। ଏଥିଲାଗି ସେ ସିରିଜ ଏବଂ ପରେ ଆଇପିଏଲ୍ ୨୦୨୧ ଖେଳିବାରୁ ବଞ୍ଚିତ ହୋଇଥିଲେ। ତେବେ ସେ ଜୁଲାଇ ସୁଦ୍ଧା ସୁସ୍ଥ ହୋଇ ଜାତୀୟ ଦଳରେ ଯୋଗଦେବେ ବୋଲି ଆଶା କରାଯାଉଥିଲା। ହେଲେ କୋଭିଡ-୧୯ ପ୍ରତିବନ୍ଧକ ଯୋଗୁ ତାଙ୍କ ପ୍ରତ୍ୟାବର୍ତ୍ତନରେ ବିଳମ୍ବ ହୋଇପାରେ। ଏବେ ସେ ସେପ୍ଟେମ୍ବର ସୁଦ୍ଧା ଫିଟ୍ ହୋଇ ଫେରିବେ ବୋଲି ଅନୁମାନ କରାଯାଉଛି।
ଭାରତ ଜୁଲାଇରେ ଶ୍ରୀଲଙ୍କା ଗସ୍ତରେ ୩ଟି ଦିନିକିଆ ଏବଂ ଟି-୨୦ ମ୍ୟାଚ୍ର ସିରିଜ୍ ଖେଳିବ। ଏହି ସମୟରେ ଶ୍ରେୟସଙ୍କ ଅନୁପସ୍ଥିତି ଦଳ ପାଇଁ ଝଟ୍କାଠାରୁ କମ୍ ନୁହେଁ। ୨୬ ବର୍ଷୀୟ ଏହି ଖେଳାଳିଙ୍କ ଅନୁପସ୍ଥିତିରେ କିଛି ଖେଳାଳି ସୁଯୋଗ ପାଇପାରନ୍ତି। ଆସନ୍ତୁ ଜାଣିବା ୩ ପ୍ରମୁଖ ଦାବିଦାର କିଏ?
-ଈଶାନ କିଶନ: ଆଇପିଏଲ୍ ୨୦୨୧ରେ ଫ୍ଲପ୍ ହୋଇଥିଲେ ହେଁ ଏହି ଯୁବ ଉଇକେଟକିପର ବ୍ୟାଟ୍ସମ୍ୟାନ୍ ୪ନଂ ସ୍ଥାନରେ ଭଲ ବ୍ୟାଟିଂ କରିଥାଆନ୍ତି। ସେ ଶେୟସଙ୍କ ସ୍ଥାନରେ ଯୋଗ ଦେଇପାରନ୍ତି।
-ସଞ୍ଜୁ ସାମସନ୍: ବର୍ତ୍ତମାନ ପର୍ଯ୍ୟନ୍ତ ଗୋଟିଏ ବି ଦିନିକିଆ ଖେଳିନାହାନ୍ତି ଏହି ଖେଳାଳି। ସେ ମାତ୍ର ୭ଟି ଟି୨୦ ଅନ୍ତର୍ଜାତୀୟ ମ୍ୟାଚ୍ରେ ସ୍ଥାନ ପାଇଛନ୍ତି। ଏହାସତ୍ତ୍ୱେ ସଞ୍ଜୁ ଆଇପିଏଲ୍ରେ ଭଲ ପ୍ରଦର୍ଶନ କରିଥିଲେ। ଏଣୁ ସେ ଶ୍ରୀଲଙ୍କା ଗସ୍ତ ବେଳେ ଦଳରେ ସାମିଲ ହୋଇପାରନ୍ତି।
-ସୂର୍ଯ୍ୟ କୁମାର ଯାଦବ: ଇଂଲଣ୍ଡ ବିପକ୍ଷ ଦୁଇ ଟି୨୦ ଅନ୍ତର୍ଜାତୀୟ ପାଳିରେ ସେ ୮୯ରନ୍ କରିଥିଲେ। ଏଣୁ ସେ ଶ୍ରୀଲଙ୍କା ବିପକ୍ଷ ଦିନିକିଆରେ ସାମିଲ ହୋଇପାରନ୍ତି। ଶ୍ରୀଲଙ୍କା ମଇଦାନ ସ୍ପିନ ପାଇଁ ଭଲ। ଅପରପକ୍ଷେ ସୂର୍ଯ୍ୟକୁମାର ସ୍ପିନରଙ୍କୁ ବହୁତ ଭଲ ଖେଳନ୍ତି।